Click for more information.
view counter

23 ᑭᑭᓄᐦᐊᒪᐊᐧᑲᓇᐠ ᐅᑭᔑᑐᓇᐊᐧ ᐅᑭᑭᓄᐦᐊᒪᑯᐃᐧᓂᐊᐧ ᑌᓇᐢ ᑲᕑᐊᒧᑎ ᐦᐊᔾ ᐢᑯᓫ

Friday May 30, 2014
23 ᑭᑭᓄᐦᐊᒪᐊᐧᑲᓇᐠ ᐅᑭᔑᑐᓇᐊᐧ ᐅᑭᑭᓄᐦᐊᒪᑯᐃᐧᓂᐊᐧ ᑌᓇᐢ ᑲᕑᐊᒧᑎ ᐦᐊᔾ ᐢᑯᓫ

ᐅᐣᑌᕑᐃᔪ ᐦᐊᔾ ᐢᑯᓫ ᐯᔑᑯᔭᑭ ᐁᑭᑕᔑ ᑭᑭᓄᐦᐊᒪᑯᓯᐨ ᐅᑕᓇᐠ ᑲᔭᑭᐊᐧᓂᐠ ᐅᑭᐊᓂᒥᐦᐃᑯᐣ ᐁᐧᐱᑫᐧ ᐁᐅᐣᒋᐨ ᑭᓫᐊᔾᐟ ᒧᓂᔭᐢ ᐅᑭᐃᐧᒋᐦᐃᑯᐣ ᑲᑭᐊᐣᒋᐡᑲᐸᐣ ᒋᑭᑭᓄᐦᐊᒪᑯᓯᐨ ᑌᓇᐢ ᑲᕑᐊᒧᑎ ᐦᐊᔾ ᐢᑯᓫ, ᒥᐦᐃᒪ ᑲᑭ ᑭᔑᑐᐨ ᐅᑭᑭᓄᐦᐊᒪᑯᓯᐃᐧᐣ ᒣᑲᐧᐨ ᒪᑯᐱᓯᑦ 13 ᐁᑲᐧ ᐊᔑᐨ ᑯᑕᑭᔭᐠ 22 ᑭᑭᓄᐦᐊᒪᐊᐧᑲᓇᐠ.

“ᐊᐱ ᑲᑭᐊᐧᓂᐦᐊᑭᐸᐣ ᓂᐢᑌᐢ, ᓂᑭᒪᒋᔭᐸᒋᑐᐣ ᒥᓂᑫᐧᐃᐧᐣ ᐁᐅᒋ ᑲᑫᐧᓇᑕᐃᐧᐦᐃᑎᓱᐊᐧᑫᔭᐣ,” ᐃᑭᑐ ᒧᓂᔭᐢ. “ᓂᑭᐊᐧᓂᑐᑕᐣ ᑕᐡ ᐃᐁᐧ ᑲᑭᑐᑕᒪᐣ. ᐊᐱ ᐊᐊᐧᔑᒣ ᑲᑭᔭᓂ ᒥᓂᑫᐧᔭᐣ, ᓂᑭᔭᓂ ᐊᐧᓂᑫᐣᑕᐊᐧᐠ ᓂᐊᐧᑯᒪᑲᓇᐠ ᒥᓇ ᓂᑐᑌᒪᐠ. ᐁᑲᐧ ᑕᐡ ᓄᑯᑦ ᑲᓂᐊᐧᑲᒥᐱᒪᑎᐢ, ᓂᐱᒥᓂᔕᐦᐊᐣ ᓂᑕᓂᔑᓂᓂᐃᐧ ᐱᒪᑎᓯᐃᐧᐣ ᑫᓄᒋᐱᒥ ᒥᓄᔭᔭᐣ. ᓂᑭᒋᓀᑕᐣ ᑲᑭ ᑭᔑᑐᔭᐣ ᓂᑭᑭᓄᐦᐊᒪᑯᐃᐧᐣ, ᓂᑭᒋᓀᑕᐣ ᑲᔦ ᐁᓂᒥᔭᐣ ᒥᓇ ᐁᒪᑌᐧᐦᐃᑫᔭᐣ.”

ᒧᓂᔭᐢ ᐅᑭᐊᐧᓂᐦᐊᐸᓂᐣ ᐅᐢᑌᓴᐣ, ᕑᐊᐣᑎ ᒧᓂᔭᐢ, ᒣᑲᐧᐨ ᒍᓫᐊᔾ ᐱᓯᑦ 2012.

“ᒥᑐᓂ ᐅᑭᐱᐊᓂᒥᐦᐃᑯᐣ ᐁᓂᐱᒥ ᑭᐁᐧᒥᓄᔭᐨ,” ᐃᑭᑐ ᐃᐧᓂᔭᑦ ᒧᓂᔭᐢ, ᑭᓫᐊᔾᐟ ᐅᑕᑕᒪᐣ. “ᓂᓇᓇᑯᒪᐠ ᑕᐡ ᑌᓇᐢ ᑲᕑᐊᒧᑎ ᐦᐊᔾ ᐢᑯᓫ ᑲᐱᒧᑐᐊᐧᐨ ᑲᑭᐸᑭᑎᓇᐊᐧᐨ ᐃᒪ ᒋᑕᔑ ᑭᑭᓄᐊᒪᑯᓯᓂᐨ.”

ᐃᐧᓂᔭᑦ ᐃᑭᑐ ᐁᑭᒥᓀᐧᑕᐠ ᑲᑭᐊᐧᐸᒪᐨ ᐅᑯᓯᓴᐣ ᐁᑭᔑᑐᓂᐨ ᐅᑭᑭᓄᐦᐊᒪᑯᐃᐧᐣ.

“ᐅᑭᐱᓇᑭᐡᑲᐣ ᐊᓂᒥᓭᐃᐧᓇᐣ,” ᐃᑭᑐ ᐃᐧᓂᔭᑦ. “ᓂᑯᑕᐧᓱ ᓇᐣᑕ ᐁᓂᓴᐧᓱᔭᑭᐃᐧᓇᑲᓂᐠ ᒪᐊᐧᐨ ᓂᐢᑕᑦ ᑲᑭᐱᑲᐯᔑᐸᐣ ᐅᑌᓇᐠ ᐁᑲᐧ ᓂᑌᐱᓇᐁᐧᐢ ᑲᐊᐧᐸᒪᐠ ᐁᑭᔑᑐᐨ 12 ᑭᑭᓄᐦᐊᒪᑫᐃᐧᓂ.”

ᓭᕑᐊ ᒧᓂᔭᐢ, ᑭᓫᐊᔾᐟ ᐅᒪᒪᒪᐣ, ᐅᑭ ᑭᒋᓀᑕᐣ ᐁᑭᐊᐧᐸᒪᐨ ᐅᑯᓯᓴᐣ ᐁᑭᔑᑐᓂᐨ ᐅᑭᑭᓄᐦᐊᒪᑯᐃᐧᓂᐣ.

“ᐣᑐᑭᐡᑲᑯᐣ ᑲᐊᐧᐸᒪᐠ ᐁᑭᔑᑐᐨ ᐅᑭᑭᓄᐦᐊᒪᑯᐃᐧᐣ, ᒥᐦᐊᐁᐧ ᑲᔦ ᒪᐊᐧᐨ ᐣᑎᐡᑫᐧᐅᔕᐣ,” ᐃᑭᑐ ᓭᕑᐊ. “ᑫᑲᐟ ᐁᑭᒪᐃᐧᔭᐣ ᐁᐱᒋ ᑭᒋᓀᑕᒪᐣ. ᒥᓀᐧᑕᑲᐧᐣ ᐁᑭᐊᐧᐸᒪᐠ ᐁᒥᓇᑲᓄᐨ ᑭᔑᑐ ᒪᓯᓇᐦᐃᑲᐣ.”

ᓭᕑᐊ ᑭᐃᑭᑐ ᑭᓫᐊᔾᐟ ᐊᔕ ᑭᐱᐣᑎᑫᐱᐦᐅᑎᓱ ᒋᑭᑭᓄᐦᐊᒪᐧᐊᑲᓄᐨ ᑭᒋ ᑭᑭᓄᐦᐊᒪᑎᐃᐧᑲᒥᑯᐠ ᐁᐧᑎ ᓫᐁᐟᐁᐟ ᔪᓂᐯᕑᓯᑎ.

“ᐅᑭᑫᐣᑕᐣ ᐊᓂᐣ ᑫᔭᓂᐊᐃᐣᑐᑕᐠ,” ᐃᑭᑐ ᓭᕑᐊ. “ᓂᐱᐊᓱᐡᑲᐊᐧ ᑫᓂᐣ ᐅᒪ ᑲᑭᐅᐣᒋᐱᔕᔭᐣ.”

ᑭᓫᐊᔾᐟ ᓂᐢᑕᑦ ᐅᑭᒪᒥᑐᓀᑕᓇᐸᐣ ᒋᔑᑭᑭᓄᐦᐊᒪᑯᓯᐨ ᑲᐧᐣᐯᑐᕑᐁᔑᐣ ᑲᐧᓫᐃᐨ, ᐁᑲᐧ ᐅᑭᑫᐧᑫᐣᑕᐣ ᑕᐊᐧᐨ ᐁᐧᑎ ᓫᐁᐠᐁᐟ ᔪᓂᐯᕑᓯᑎ ᒋᔕᐨ.
“ᓂᑲᐅᑕᐱᓇᐣ ᐊᓂᔑᓂᓂᐃᐧ ᑭᑭᓄᐦᐊᒪᐊᐧᑲᓇᐠ ᑲᐅᑕᐱᓇᒧᐊᐧᐨ ᑭᑭᓄᐦᐊᒪᑫᐃᐧᓂ ᐁᑲᐧ ᓂᒥᓴᐁᐧᑕᐣ ᒋᐊᓂᐅᑕᐱᓇᒪᐣ ᐊᓂᔑᓂᓂᐃᐧ ᐃᓯᓭᐃᐧᓇᐣ ᑲᑭᑭᓄᐦᐊᒪᑲᓂᐊᐧᐠ,” ᐃᑭᑐ ᑭᓫᐊᔾᐟ.

ᑭᓫᐊᔾᐟ ᑭᐃᑭᑐ ᐁᑭᐃᐧᒋᐦᐃᑯᐨ ᑲᑭᒥᓀᐧᑕᑲᑭᐣ ᐃᑭᒋᑫᐦᐃᑯᐃᐧᓇᐣ ᐃᒪ ᑌᓇᐢ ᑲᕑᐊᒧᑎ ᐦᐊᔾ ᐢᑯᓫ ᐁᑲ ᒋᐅᒋ ᐊᐧᓇᐦᐃᑯᐨ ᐸᑲᐣ ᑫᑯᓇᐣ.

“ᒪᐊᐧᐨ ᒥᓀᐧᑕᑲᐧᐣ ᐃᒪ ᑌᓇᐢ ᑲᕑᐊᒧᑎ ᐦᐊᔾ ᐢᑯᓫ” ᐃᑭᑐ ᑭᓫᐊᔾᐟ. “ᑕᐱᐡᑯᐨ ᐃᑯ ᓂᑲᐯᔑᐃᐧᓂᐠ ᐃᒪ ᑲᐊᔭᔭᐣ ᐃᓀᑕᑲᐧᐣ, ᑲᐯᔑᐃᐧᓂᐠ ᑲᐊᔭᐊᐧᐨ ᐅᑐᑌᒥᒪᐠ ᒥᓇ ᐊᐧᑯᒪᑲᓇᐠ. ᐁᑲᐧ ᒥᓇ 150 ᐁᑕ ᑕᓯᓄᐊᐧᐠ ᑭᑭᓄᐦᐊᒪᐊᐧᑲᓇᐠ ᑕᑕᓱᔭᑭ ᑲᐱᒥ ᑭᑭᓄᐦᐊᒪᐃᐧᑕᐧ. ᓇᐊᐧᐨ ᑲᔦ ᐅᐣᒋᒥᓀᐧᑕᑲᐧᐣ ᐊᐱᐨ ᐃᐧᐣ ᑲᐃᔑᒥᔕᐠ ᑭᑭᓄᐦᐊᒪᑎᐃᐧᑲᒥᑯᐠ ᑲᐊᔭᓂᐊᐧᐠ ᒥᓇ ᐊᐊᐧᔑᒣ ᑭᒋᒥᑕᓱᒥᑕᓇ ᑭᑭᓄᐦᐊᒪᐊᐧᑲᓇᐠ ᑲᑕᔑ ᒪᒪᐃᐧᔭᐊᐧᐨ.”

ᑭᓫᐊᔾᐟ ᐅᑐᒋᔕᔑᑭᒪᐣ ᑯᑕᑭᔭᐠ ᑲᐅᐡᑲᑎᓯᐊᐧᐨ ᒋᑲᑫᐧᐱᒥᓂᔕᐦᐊᒧᐊᐧᐨ ᐅᑭᑭᓄᐦᐊᒪᑯᐃᐧ ᐅᓇᒋᑫᐃᐧᓂᐊᐧ.

“ᐁᑲ ᑲᔦ ᒋᔑᓄᑌᐳᓂᒋᑫᔭᐣ,” ᐃᑭᑐ ᑭᓫᐊᔾᐟ. “ᓂᑭᐳᓂᒋᑫᓇᐸᐣ ᐅᑕᓇᐠ ᑲᔭᑭᐊᐧᐠ ᑲᐃᐧᐣ ᑕᐡ ᒋᐅᒋ ᑭᔑᑐᔭᐣ ᓂᑭᑭᓄᐦᐊᒪᑯᐃᐧᐣ. ᔕᑯᐨ ᓂᑭᐱᑭᐁᐧᐡᑲ ᑲᔭᓂᑕᑲᐧᑭᐠ ᐁᑭᐊᐃᑲᒣᐣᑕᒪᐣ ᒋᑲᑫᐧᑌᐱᓇᒪᐣ ᐦᐊᔾ ᐢᑯᓫ ᑭᔑᑐ ᒪᓯᓇᐦᐃᑲᐣ.”

ᒥᒋᑲᐣᓴᑲᐃᑲᓂᐠ ᐁᐅᒋᐊᐧᐨ ᒉᓫᐃᐣ ᐯᕑᑎ, ᐁᕑᐊᐣ ᒪᑫ ᒥᓇ ᒉᓯᑲ ᒥᑭᓇᐠ ᑫᐃᐧᓇᐊᐧ ᐅᑭᑭᔑᑐᓇᐊᐧ ᐅᑭᑭᓄᐦᐊᒪᑯᐃᐧᓂᐊᐧ ᐁᑲᐧ ᐊᔑᐨ ᐊᑎᑯᓴᑲᐃᑲᓂᐠ ᑲᐅᒋᐊᐧᐨ ᒍᐃᐧᐣ ᐁᔾᓯᓇᐯ, ᒧᕑᐊᐣᑕ ᐁᔾᓯᓇᐯ, ᒥᐢᑎ ᐦᐊᕑᑎᐣᐠ, ᕑᐊᓄᐟ ᑫᐧᓫ ᒥᓇ ᑫᐱᐣ ᕑᐁ ᐁᑲᐧ ᒥᓇ ᐊᒋᑯᓴᑲᐃᑲᓂᐠ ᐁᐅᒋᐊᐧᐨ ᒪᕑᐃᑕ ᐸᕑᐠᒪᐣ ᒥᓇ ᕑᐁᐱᐣ ᒪᐣᕑᐅ.

“ᒪᐊᐧᐨ ᑭᒋᒥᓀᐧᑕᑲᐧᐣ,” ᐃᑭᑐ ᒪᐣᕑᐊ ᑲᑭᔑᑐᐨ ᐅᑭᑭᓄᐦᐊᒪᑯᐃᐧᐣ. “ᒥᔑᓄᑎᐱᑲ ᐁᑭᓇᓂᐯᐱᔭᐣ ᒥᓇ ᐁᑭᒋᔭᓄᑲᑕᒪᐣ ᓂᑎᐡᑯᓄᐃᐧ ᐊᓄᑭᐃᐧᐣ, ᐊᔕ ᑕᐡ ᑭᑎᐸᐦᐃᑫᓭ. ᓂᑭ ᑭᒋᐊᓄᑲᑕᐣ ᐅᐁᐧ ᓄᑯᑦ ᑲᑭᔑᑲᐠ ᑲᑭᑌᐱᓇᒪᐣ.”

ᒪᐣᕑᐅ ᐃᑭᑐ ᑭᑭᓄᐦᐊᒪᑫᐃᐧᑭᒪ ᒥᓇ ᐅᑕᓄᑭᐠ ᐃᒪ ᑌᓇᐢ ᑲᕑᐊᒧᑎ ᐦᐊᔾ ᐢᑯᓫ” ᒪᐊᐧᐨ ᑲᐧᔭᐠ ᐱᒥᐊᓱᐡᑲᒪᑫᐊᐧᐠ.”

“ᑭᐡᐱᐣ ᐁᑲ ᐊᔭᐊᐧᑭᑕᐧᐸᐣ, ᑲᐃᐧᐣ ᐣᑕᑭᐅᐣᒋ ᑭᔑᑐᓇᐸᐣ ᓂᑭᑭᓄᐦᐊᒪᑯᐃᐧᐣ.” ᐃᑭᑐ ᒪᐣᕑᐅ. “ᐣᑐᑕᐊᐧᔑᔑᑦ ᐁᑲᐧ ᑭᑭᓄᐦᐊᒪᑫᐃᐧᑭᒪ ᓂᑭᒋ ᐊᐧᐃᐧᒋᐦᐃᐠ ᒋᒥᑲᒧᐊᐧᐠ ᑫᐃᔑ ᑲᓇᐁᐧᐣᑕᑯᓯᐨ ᓂᑕᔑᐊᐧᔑᔑᑦ. ᓂᑭᐊᐧᐃᐧᒋᐦᐃᐠ ᐁᑭ ᓇᑕᐁᐧᓂᒥᔑᐨ ᒋᑭᔑᑭᑭᓄᐦᐊᒪᑯᓯᐊᐧᐠ, ᓂᑭᓇᑕᐁᐧᓂᒥᐠ ᒋᒥᓄᓭᐦᐃᑎᓱᐊᐧᐠ ᓂᑕᓂᓴᐣ ᐅᒋ.”

ᒪᐣᕑᐅ ᐃᑭᑐ ᑭᔭᓂᒪᐣ ᒋᑭᒥᑲᐠ ᑲᓇᐁᐧᓂᒪᐊᐧᓱᑲᒥᑯᓂ ᑫᐃᔑᑲᓇᐁᐧᑕᑯᓯᓂᐨ 15 ᐁᑕᓱᐱᓯᒣᓂᐨ ᐅᑕᓂᓭᓴᐣ, ᔕᑯᐨ ᑕᐡ ᐅᑲᔭᑲᐡᑭᑐᐣ ᑲᑭᐅᓀᑕᑭᐸᐣ ᒋᑭᔑᑐᐨ ᐅᑭᑭᓄᐦᐊᒪᑯᐃᐧᐣ.

“ᑕᐱᐡᑯᐨ ᐁᑭᐸᑭᒋᐊᐧᓀᔭᐣ ᑭᒋᒥᑕᓱᒥᑕᓇ ᐁᑭᒋᑯᓯᑲᐧᐠ ᑲᐱᒧᐊᐧᓀᔭᐣ ᓂᑭᐃᓀᑕᐣ,” ᐃᑭᑐ ᒪᐣᕑᐅ. “ᐁᑲᐧ ᐊᓂᑕᑲᐧᑭᐠ ᓂᑲᐃᔕ ᑲᐧᓫᐃᐨ ᐊᐧᑲᐦᐃᑫᐃᐧ ᑭᑭᓄᐦᐊᒪᑫᐃᐧᓂᐠ. ᓂᐃᐧᑲᑫᐧᑲᐡᑭᑐᐣ ᒋᓂᑕᐊᐧᑲᐦᐃᑫᑕᒪᑫᔭᐣ ᐣᑎᐡᑯᓂᑲᓂᐠ ᒥᓇ ᒋᔑᐊᓄᑭᔭᐣ ᐊᐧᑲᐦᐃᑫᐃᐧ ᐊᓄᑭᐃᐧᓂᐠ.”

ᒪᐣᕑᐅ ᑫᐃᐧᐣ ᐅᔕᔑᑭᒪᐣ ᑯᑕᑭᔭᐠ ᑲᐅᐡᑲᑎᓯᐊᐧᐨ ᐃᐧᐸᐨ ᒋᔭᓂᑲᑫᐧ ᑭᔑᑐᐊᐧᐨ ᐦᐊᔾ ᐢᑯᓫ, ᐁᑭᐃᑭᑐᐨ ᓂᑯᑕᐧᓱ ᓇᐣᑕ ᓂᓴᐧᓱᔭᑭ ᐅᑭᐱᒥᑲᐣ ᐁᑭᑲᑫᐧ ᑭᔑᑐᐨ ᐦᐊᔾ ᐢᑯᓫ.

“ᓇᐊᐧᐨ ᑕᐁᐧᐣᒋᓭ ᐁᐡᑲᐧᑕᐃᐧᓭᓭᔭᐣ ᒋᐱᒥᐃᐡᑯᓄᐃᐧᔭᐣ,” ᐃᑭᑐ ᒪᐣᕑᐅ. “ᐊᔕ ᒋᑲᑫᐧ ᑭᔑᑐᔭᐸᐣ ᓂᐅᔭᑭ ᑭᔭᓂᓯᓭᐠ ᑕᐱᓇᑲ ᑕᓂᓯᓭ ᒋᔭᓂᐊᓂᒥᐦᐃᑯᔭᐣ ᐊᓂᐸᐧᑕᐃᐧᑐᑕᒪᐣ. ᑭᐡᐱᐣ ᑕᐡ ᐁᑲ ᐳᓂᑐᔭᐣ, ᑭᔭᑦ ᐃᑯ ᒋᔑᐱᒪᓄᑲᑕᒪᐣ ᑭᑎᐡᑯᓄᐃᐧᐣ, ᑲᒥᓀᐧᑕᐣ ᐊᐱᐣ ᑭᑭᔑᑐᔭᐣ. ᒥᐱᑯ ᐃᔑᐱᒥᔭᓄᑲᑕᐣ, ᒥᐁᑕ ᑫᑭᐃᑭᑐᔭᐸᐣ.”

ᑫᓫᐊ ᑲᑭᐱᑕᑦ ᑭᐁᐧᐃᐧᐣ ᐅᐣᒋ; ᒍᑎᐟ ᐸᐧᑐ ᒪᓯᑫᔭᐡ ᒣᐡᑭᑲᐧᑲᒪᐠ ᐅᐣᒋ; ᐳᕑᐃᑎᓂ ᐱᐟᓫᐊᕑ, ᑌᕑᐅ ᐱᐟᓫᐊᕑ, ᒍᐃᐧᓫᐢ ᐱᐟᓫᐊᕑ, ᑊᕑᐃᐢ ᑯᐟᐃᐧᐣ, ᑲᓯ ᓫᐃᐣᑭᓫᐁᑐᕑ, ᓭᐨ ᒪᐊᐧᑭᓯᐠ, ᐳᕑᐃᑎᓂ ᒥᑭᐢ ᒥᓇ ᐢᑲᐧᐟ ᒥᑭᐢ ᓀᑲᐃᐧᓴᑲᐃᑲᓂᐠ ᐅᐣᒋᐊᐧᐠ; ᒪᐃᑯ ᒣᒣᑫᐧ ᐊᐧᐱᑭᑲᐠ ᐅᐣᒋ ᒥᓇ ᑲᓂᔕ ᑲᓇᑲᑭᓯᐠ ᐊᐃᐧᔦᑲᒪᐠ ᐅᐣᒋ ᒥᐅᑯ ᑫᐃᐧᓇᐊᐧ ᑲᑭ ᑭᔑᑐᐊᐧᐨ.

ᑭᐁᐧᑎᓄᐠ ᐊᓂᔑᓇᐯᐠ ᑭᑭᓄᐦᐊᒪᑫᐃᐧᐣ ᑲᐅᓇᔓᐊᐧᑕᒧᐊᐧᐨ ᑲᐅᑭᒪᐃᐧᐨ ᓇᐧᓫᒪ ᑭᒋᐠ ᐃᑭᑐ ᐅᑭᐃᓀᑕᐣ ᑕᐱᐡᑯᐨ ᒪᐊᐧᐨ ᑲᑭᒋᓀᑕᐠ ᐅᒪᒪᒥᒪ ᒣᑲᐧᐨ ᐁᑲᓇᐊᐧᐸᒪᐨ ᑭᑭᓄᐦᐊᒪᐊᐧᑲᓇᐠ ᑲᑭᐊᔭᑭᓀ ᒪᒥᓂᑕᐧ ᐅᑭᔑᑐ ᒪᓯᓇᐦᐃᑲᓂᐊᐧ.

“ᒥᑐᓂ ᐊᓂᒥᓭᓂ ᐅᑭᑭᓄᐦᐊᒪᑯᐃᐧ ᐊᓄᑭᐃᐧ ᐱᒧᒋᑫᑕᒪᑯᐃᐧᓂᐊᐧ ᐊᓂᔑᓂᓂᐊᐧᐠ ᓄᑯᑦ ᑲᑭᔑᑲᐠ,” ᐃᑭᑐ ᑭᒋᐠ. “ᑕᒪᑌᒪᐊᐧᒋᐦᐃᑎᓇᓂᐊᐧᐣ ᐊᐧᐸᐠ (ᒪᑯᐱᓯᑦ 14) ᐁᐧᑎ ᐊᑐᐊᐧ ᒋᑭᑫᐣᑕᒧᐦᐃᑎᓇᓂᐊᐧᐠ … Bill C-33 ᐅᑭᒪᐃᐧᐣ ᑲᑲᑫᐧ ᐅᓇᑐᐨ ᐅᐡᑭᐅᓇᑯᓂᑫᐃᐧᓂ ᑫᐸᑭᑌᐡᑲᑫᒪᑲᐠ ᐊᓂᔑᓂᓂᐃᐧ ᑭᑭᓄᐦᐊᒪᑫᐃᐧᓂᐠ. ᑭᓇᐊᐧ ᑕᐡ 23 ᑲᑭᑭᔑᑐᔦᐠ ᑭᑎᐡᑯᓄᐃᐧᓂᐊᐧ ᑲᐅᑲᐧᐱᔦᐠ ᐅᒪ, ᑭᐊᐧᐸᑕᐦᐃᐁᐧᓇᐊᐧ ᒋᑭᑲᐡᑭᑕᒪᓱᔭᑭᐸᐣ ᐊᐱ ᐃᐧᓇᐊᐧ ᐊᓂᔑᓂᓂᐊᐧᐠ ᐱᒥᐃᐧᑕᒪᓱᐊᐧᐨ ᐅᑭᑭᓄᐦᐊᒪᑫᐃᐧᓂᐊᐧ.”

ᑭᒋᐠ ᑭᐃᑭᑐ ᐊᓂᔑᓂᓂᐃᐧ ᑭᑭᓄᐦᐊᒪᐊᐧᑲᓇᐠ ᐅᓇᑭᐡᑲᓇᐊᐧ ᐊᓂᒥᓭᐃᐧᐣ ᑲᓇᑲᑕᒧᐊᐧᐨ ᐅᑕᔑᑫᐃᐧᓂᐊᐧ ᑲᐊᐣᑕᐃᐧ ᐃᐡᑯᓄᐊᐧᐨ ᐦᐊᔾ ᐢᑯᓫ ᐁᐃᔕᐊᐧᐨ ᑭᒋᑕᔑᑫᐃᐧᓂᐠ ᐁᑲ ᑲᐃᔑᑭᑫᓂᒪᐊᐧᐨ ᐊᐃᐧᔭᐣ.

“ᓂᑭᐱᑭᒋᐊᓄᑭᒥᐣ ᐁᐊᐧᐃᐧᑕᓄᑭᒪᑭᑕᐧ ᐅᑌᓇᐃᐧᑭᒪᐠ ᒥᓇ ᐅᑕᓄᑭᓇᑲᑭᒥᐊᐧ ᐊᓂᐣ ᐊᐊᐧᔑᒣ ᑫᑭᐃᔑᒥᓄᓭᑭᐣ ᐃᐧᑕᓄᑭᒥᑐᐃᐧᐣ ᐅᒪ ᑲᐱᒧᑐᔭᐠ ᑌᓇᐢ ᑲᕑᐊᒧᑎ ᐦᐊᔾ ᐢᑯᓫ ᒥᓇ ᐱᑯ ᑭᒋᐅᑌᓇᐠ ᑕᐣᑐᕑ ᐯ,” ᐃᑭᑐ ᑭᒋᐠ. “ᒥᔑ ᑭᑭᓄᐦᐊᒪᐊᐧᑲᓇᐠ ᐅᑭᐱᔕᔕᐳᐡᑲᓇᐊᐧ ᐅᓄᐁᐧᓂᐊᐧᐣ ᒥᔑᐣ ᑫᑯᓇᐣ ᑲᑭᐱᐡᑲᑯᐊᐧᐨ ᒥᓇ ᐊᓂᒥᓭᐃᐧᓇᐣ ᐅᒪ ᒋᐱᑕᔑᑫᐊᐧᐨ. ᐯᔑᐠ ᑭᑭᓄᐦᐊᒪᐊᐧᑲᐣ ᒪᔭᑦ ᐅᑭᐃᐧᐣᑕᐣ ᓄᑯᑦ ᑲᑭᔑᑲᓂᐠ ᐊᓂᐣ ᑲᐃᓀᐣᑕᐠ - ᐣᑎᑭᑐᒥᓇᐸᐣ ᓇᐱᐨ ᐁᐅᒋ ᑭᒋᐸᑲᓂᓇᑯᓯᐨ ᐁᑲ ᐁᑭᑭᐡᑲᐠ ᑲᓂᑕᑭᑭᐡᑲᐠ ᐅᑕᐢᑎᑎᐣ ᐁᑲᐧ ᑭᐃᑭᑐ: ‘ᒪᐊᐧᐨ ᓂᑭ ᑭᒋᐊᓄᑭ ᒋᑭᑭᐡᑲᒪᐣ ᐅᐁᐧ ᑭᔑᑐ ᐊᐢᑎᑎᐣ ᑲᑭᑭᐡᑭᒪᐣ ᓄᑯᑦ ᑲᑭᔑᑲᐠ.’ ᐁᑲᐧ ᑌᐯᐧ ᒥᔑᓄᐊᐧᐠ ᐁᑭᐱ ᑭᒋᐊᓄᑭᐊᐧᐨ; ᑲᑭᓇ ᐅᑭᔕᐳᐡᑲᓇᐊᐧ ᒥᔑᐣ ᑫᑯᓇᐣ ᑲᑲᑫᐧ ᑭᐱᐡᑭᑫᒪᑲᑭᐸᐣ ᐃᒪ ᑫᑭᐅᐣᒋ ᐊᓂᒥᐦᐃᑯᐊᐧᐨ.”

ᑭᒋᐠ ᐅᑭᓇᓇᑯᒪᐣ ᑕᔑᑫᐃᐧᓇᐣ ᑲᑭᐱᐅᒋᐊᐧᐨ, ᐅᓂᑭᐦᐃᑯᒪᐠ ᒥᓇ ᐅᒥᔓᒥᒪᐠ ᒥᓇ ᐅᑯᒥᒪᐠ ᑲᑭᐱᔑ ᐱᒥ ᐊᔭᓱᐡᑲᐊᐧᐊᐧᐨ ᑭᑭᓄᐦᐊᒪᐊᐧᑲᓇᐠ.
“ᓂᓇᓇᑯᒪᐠ ᑲᔦ ᑌᓇᐢ ᑲᕑᐊᒧᑎ ᐦᐊᔾ ᐢᑯᓫ ᐊᓄᑭᓇᑲᓇᐠ ᑲᐱᒥᓯᑐᐡᑲᒪᑫᐊᐧᐨ, ᑲᐅᒋᐱᒥ ᐅᓂᑭᐦᐃᑯᒪᐃᐧᐡᑲᐊᐧᐊᐧᐨ ᐅᑯᐁᐧᓂᐊᐧᐠ ᑭᑭᓄᐦᐊᒪᐊᐧᑲᓇᐠ,” ᐃᑭᑐ ᑭᒋᐠ. “ᐅᑯᐁᐧᓂᐊᐧᐠ ᑭᑭᓄᐦᐊᒪᐊᐧᑲᓇᐠ ᑲᐃᐧᐣ ᐅᒋᓀᑕᓯᐊᐧᐠ ᒋᐸᑭᒋᐊᐧᐨ ᐁᑲᐧ ᑕᐡ ᐁᐡᑲᑦ ᐃᓯᓭ ᐯᔑᐠ ᐊᐃᐧᔭᐣ ᐁᐅᒋᐃᐧᒋᐦᐃᑯᐊᐧᐨ ᐊᐣᑎ ᑫᓄᒋ ᑲᐡᑭᑕᒪᓱᐊᐧᐨ ᒋᔭᓂᒥᓄᓭᐊᐧᐨ.”


Email to a Friend
qr code
add to del.icio.us

Stumble It!

Post new comment

Comment policy

All comments submitted to Wawatay News Online must have a correct name, location and email address of the user. Wawatay will not approve comments without the required information.

The approval of comments will also be subjected to relevancy, laws of defamation and good taste.

Once posted, comments become the property of Wawatay News. Wawatay News reserves the right to publish or use this comment in any way in the future for online use, in print, and by any other media at the discretion of Wawatay News.

The content of this field is kept private and will not be shown publicly.