view counter

ᐊᑎᑯᓴᑲᐃᑲᓂᐠ ᐅᒥᓀᐧᑕᓇᐊᐧ ᑲᑭᐅᐡᑭᐅᔑᑕᒪᐃᐧᑕᐧ ᐱᓯᒧᑲᐠ ᒋᐅᒋᐊᓄᑭᒪᑲᓂᐠ ᐃᐡᑯᑌᓂ

Friday May 2, 2014

ᐊᔕ ᑫᑲᐟ ᓂᔭᓇᐣ ᑎᐯᒋᑫᐃᐧᓇᐣ ᑕᐃᔑᑯᓯᐊᐧᐠ ᐅᐡᑭᐊᐧᑲᐦᐃᑲᓂᐠ ᐊᓂᔕ ᑕᐡ ᑲᐅᒋᐃᓯᓭᓂᐠ ᑲᑭᐅᔑᒋᑲᑌᑭᐸᐣ ᐱᓯᒧᑲᐠ ᒋᐅᒋᐊᓄᑭᒪᑲᐠ ᐃᐡᑯᑌ ᐃᒪ ᐊᑎᑯᓴᑲᐃᑲᓂᐠ ᐃᐡᑯᓄᑲᒥᑯᐠ.

“ᓂᓴᐧ ᒋᐅᒋ ᐱᑭᓯ ᐱᒪᓄᑲᑌᐠ ᓂᑭᐃᔑᐅᓇᒋᑫᒥᐣ ᐁᑲ ᒥᐢᑕᐦᐃ ᒋᒣᒋᓭᐠ ᐃᐡᑯᑌ ᒥᓇ ᒋᐅᒋ ᓴᑲᐱᑫᐦᐃᑲᑌᑭᐣ ᓂᔭᓇᐣ ᐊᐧᑲᐦᐃᑲᓇᐣ, ᐸᑭ ᒣᑎᓂᑫᐃᐧᐣ ᒋᓯᓭᐠ ᒥᓇ ᓂᑭᐅᓇᑐᒥᐣ ᐱᓯᒧᑲᐠ ᑲᐅᒋᐊᓄᑭᒪᑲᐠ ᐃᐡᑯᑌ,” ᐃᑭᑐ ᐊᑎᑯᓴᑲᐃᑲᓂ ᐅᑭᒪᑲᐣ ᕑᐊᔭᓫ ᒥᑭᐢ. “ᑭᒋᓀᑕᑲᐧᐣ ᐅᐁᐧ ᑲᑭᐃᔑᐅᓇᒋᑫᔭᐠ ᑲᐃᐧᐣ ᐃᑯ ᐁᑕ ᐃᑭᐁᐧᓂᐊᐧᐠ ᒋᐅᒋ ᐃᐧᒋᐦᐃᑯᐊᐧᐨ ᑎᐯᒋᑫᐃᐧᓇᐣ ᑲᐱᐦᐅᐊᐧᐨ ᒋᐱᑎᑫᑯᓯᐊᐧᐨ ᐅᐡᑭᐊᐧᑲᐦᐃᑲᓇᐣ, ᒥᓯᐁᐧ ᐱᑯ ᐃᒪ ᐊᑎᑯᓴᑲᐃᑲᓂᐠ ᑲᔦ ᑕᑭᒋᐊᐸᑕᐣ.”

ᐅᓄᐁᐧᓂᐊᐧᐣ ᓂᔭᓇᐣ ᐊᐧᑲᐦᐃᑲᓇᐣ ᑭᐅᔑᒋᑲᑌᐸᓂᐣ ᓂᔓᔭᑭ ᐅᑕᓇᐠ ᐁᑲᐧ ᒥᐱᑯ ᑲᐊᐃᓇᑭᑌᑭᐣ ᐁᑲ ᐁᑭᐃᓇᐱᐦᐃᑲᑌᐠ ᐃᐡᑯᑌ ᐃᐃᒪ ᐃᐡᑯᓂᑲᓂᐠ ᓇᐣᑕ ᐱᑯ 1,100 ᐊᓂᔑᓂᓂᐊᐧᐠ ᐁᑲᐯᔑᐊᐧᐨ.

“ᐊᐱ ᑕᐡ ᐃᐡᑯᑌ (ᐱᓯᒧᑲᐠ ᑲᐅᒋᐊᓄᑭᒪᑲᐠ) ᑭᑭᔑᒋᑲᑌᐠ ᒋᔭᓂ ᐊᓄᑭᒪᑲᐠ, ᓂᐸᑯᓭᑕᒥᐣ ᐊᓂᐃᐡᑲᐧᐊᑭᓱᐨ ᓂᑭᐱᓯᑦ, ᐃᒪ ᐃᐡᑯᓂᑲᓂᐠ ᑲᑲᐯᔑᐊᐧᐨ ᒋᑭᔭᓂ ᐅᓇᐱᑫᐦᐊᒧᐊᐧᐨ ᑯᑕᑭᔭᐣ ᐊᐧᑲᐦᐃᑲᓇᐣ ᑐᑲᐣ ᐊᑕᐁᐧᐃᐧᑲᒥᑯᐣ ᓇᐣᑕ ᐃᐧᓯᓂᐃᐧᑲᒥᑯᐣ, ᐱᑯ ᐊᐣᑎ ᑲᐃᐧᔑᐊᐧᑌᓂᑫᐊᐧᐨ,” ᐃᑭᑐ ᒐᐧᑎ ᑲᑭᐱᑕᑦ, ᑲᐅᑭᒪᐃᐧᐡᑲᐠ ᑭᒋᐊᓄᑭᐃᐧ ᒪᒋᑕᐃᐧ ᐱᒧᒋᑫᐃᐧᓂᐠ, ᐅᐁᐧ ᐊᓄᑭᐃᐧ ᐱᒧᒋᑫᐃᐧᐣ ᐅᐣᒋ ᐊᓄᑲᑌ ᐃᐡᑯᑌᐃᐧ ᐊᓄᑭᐃᐧᐣ ᑲᐅᒋᐱᒧᒋᑲᑌᑭᐣ ᑭᐁᐧᑎᓄᐠ ᐅᑭᒪᑲᓇᐠ ᐃᐡᑯᓂᑲᓇᐣ. “ᑲᐃᐧᐣ ᑕᐡ ᒣᑲᐧᐨ ᐃᐁᐧ ᐅᑭᐃᔑᑲᐡᑭᑐᓇᐊᐧᓯᐣ ᐁᑲ ᐁᑌᐱᓭᐊᐧᐨ ᐃᐡᑯᑌᓂ. ᒥᑕᐡ ᐃᒪ ᑲᔦ ᑫᐅᒋ ᐃᐧᒋᐃᐦᐃᑯᐊᐧᐨ ᒥᔑᐣ ᑫᑯᓇᐣ ᑫᐅᒋ ᒪᒋᑕᓱᐊᐧᐨ ᑲᐃᔑᓇᑕᐁᐧᑕᒧᐊᐧᐨ ᐅᑕᔑᑫᐃᐧᓂᐊᐧᐠ,”

ᐊᑎᑯᓴᑲᐃᑲᓂᐠ ᐃᐡᑯᓄᑲᒥᑯᐠ ᑲᑭᐅᔑᒋᑲᑌᐠ ᐱᓯᒧᑲᐠ ᒋᐅᒋᐊᓄᑭᒪᑲᐠ ᐃᐡᑯᑌ, ᒥᐦᐅᐁᐧ ᒪᐊᐧᐨ ᐁᒥᔕᐠ ᑲᑭᐅᔑᒋᑲᑌᐠ ᒋᐱᑭᓯᐊᓄᑭᒪᑲᐠ ᐃᐡᑯᑌ ᐅᒪ ᐅᐣᑌᕑᐃᔪ ᓄᐱᒪᑲᒥᐠ ᑲᑕᑲᐧᐠ ᑕᔑᑫᐃᐧᐣ, ᑭᐃᔑᓇᑯᒋᑲᑌ ᒋᐱᒥᐊᐸᑕᐠ ᒣᑲᐧᐨ ᑲᑭᔑᑲᐠ ᑲᐱᒥᐃᐡᑯᓄᓇᓂᐊᐧᐠ, ᐁᑲᐧ ᑕᐡ ᒥᐡᑲᐧᐨ ᑯᑕᐠ ᑲᐅᐣᑎᓂᑲᑌᐠ ᐃᐡᑯᑌ ᑕᔑᑫᐃᐧᓂᐠ ᒋᔑᐊᐸᑕᐠ. ᐊᑎᑯᓴᑲᐃᑲᐣ ᐅᑭᐅᐣᑎᓇᐊᐧᐣ $500,000 ᒪᒪᐤ $600,000 ᑲᑭᐸᑭᑎᓂᐨ ᔓᓂᔭ ᐁᑲᐧ ᑲᓇᑕ ᐅᑭᒪᐃᐧᐣ ᑫᐃᐧᐣ ᐅᑭᐸᑭᑎᓇᐣ $100,000 ᑲᑭᐅᔑᒋᑲᑌᐠ ᐱᓯᒧ ᐃᐡᑯᑌᑫᐃᐧᐣ.

“ᓴᑫᐣ ᒪᐃᐧᐣ ᓂᑲᐅᒋᒪᓇᒋᑐᒥᐣ ᐊᐧᓯᑲᓂᐱᒥᑌ ᐊᐱ ᑲᐊᓂᐃᐡᑲᐧ ᐃᐡᑯᓄᓇᓂᐊᐧᐠ (ᑭᔑᑲ),” ᐃᑭᑐ ᒥᑭᐢ. “ᒣᑲᐧᐨ ᐁᑲ ᑲᐊᐸᒋᑐᔭᐣ ᐊᐧᑲᐦᐃᑲᐣ, ᑲᑭᓇ ᑫᑯᐣ ᑭᑭᐸᑯᓇᐣ ᔕᑯᐨ ᑭᔭᐱᐨ ᐱᒥᐊᓄᑭᒪᑲᓄᐣ.”

ᐊᑎᑯᓴᑲᐃᑲᓂᐠ ᑭᒪᒪᐃᐧ ᒥᓇᐧᒋᑲᑌ ᑲᑭᑕᐃᐧᓂᑲᑌᐠ ᐅᐁᐧ ᐅᐡᑭ ᐱᓯᒧᑲᐠ ᑲᐅᒋ ᐊᓄᑭᒪᑲᐠ ᐃᐡᑯᑌ ᒣᑲᐧ ᓂᑭᐱᓯᑦ 15 ᑲᐃᓇᑭᓱᐨ ᐁᑲᐧ ᐯᑭᐡ ᐅᑭᐊᔭᑭᓀ ᐊᐧᐊᐧᐸᑕᓇᐊᐧ ᐃᐡᑯᓄᑲᒥᑯᓂ ᒥᓇ ᑭᒪᑯᔐᐦᐊᐊᐧᐠ ᑲᑭᓇᑐᒥᑕᐧ ᒋᐱᔕᐊᐧᐨ ᐁᑲᐧ ᒥᓇ ᑲᐅᑭᒪᐃᐧᐊᐧᐨ, ᐅᑭᒪᑲᓇᐠ ᒥᓇ ᑭᒋᐅᑭᒪᐃᐧ ᐊᓄᑭᑲᓇᐠ, ᒥᓇ ᐃᐡᑯᓂᑲᓂᐠ ᑲᑲᐯᔑᐊᐧᐨ.

“ᐃᐡᑯᓄᑲᒥᑯ ᐱᒧᒋᑫᐃᐧᐣ ᑕᐅᒋ ᒪᓇᒋᒋᑫᐊᐧᐠ ᐅᑎᐡᑯᑌᐃᐧ ᒪᓯᓇᐦᐃᑫᐃᐧᓂᐊᐧ ᑕᓱᐱᓯᑦ ᒪᐊᐧᐨ ᐊᑯ ᒥᐢᑕᐦᐃ ᐃᓯᓭᐸᐣ,” ᐃᑭᑐ ᐊᔾᓫᐊ ᒪᐊᐧᑭᓯᐠ, ᑲᐃᐡᑯᓄᑭᒪᐃᐧᐨ ᐊᑎᑯᓴᑲᐃᑲᓂᐠ. “ᐁᑲᐧ ᑕᐡ ᒥᐡᑲᐧᐨ ᐸᑲᐣ ᑫᑯᓇᐣ ᓂᑲᐅᒋᐊᔭᑕᐁᐧᒥᐣ ᑐᑲᐣ ᐊᐸᒋᒋᑲᓇᐣ ᒥᓇ ᐃᐡᑯᓄᐃᐧ ᐊᐸᒋᒋᑲᓇᐣ.”

ᑲᑭᐱᑕᑦ ᐃᑭᑐ ᐅᐁᐧ ᐊᑎᑯᓴᑲᐃᑲᓂᐠ ᐃᐡᑯᓄᑲᒥᑯᐠ ᑲᑭᐅᔑᒋᑲᑌᐠ ᐱᓯᒧᑲᐠ ᐃᐡᑯᑌ ᐊᒥᐦᐅᐁᐧ ᒪᐊᐧᐨ ᓂᐢᑕᑦ ᐁᔑᓇᑲᐧᐠ ᑲᑭᐅᓀᑕᑲᐧᑭᐸᐣ ᒋᐃᔑᓇᑯᒋᑲᑌᐠ ᒥᓇ ᑯᑕᑭᔭᐣ ᒥᔑᐣ ᑫᑯᓇᐣ ᑲᐃᐧᔭᓂ ᐅᔑᒋᑲᑌᑭᐣ ᑕᔑᑫᐃᐧᓇᐣ ᑲᐃᔑᑕᑲᐧᑭᐣ ᐊᐧᑲᐦᐃ ᑭᐁᐧᑎᓄᐠ ᐅᐣᑌᕑᐃᔪ.

“ᓂᐃᐧᑲᑫᐧ ᑐᑕᒥᐣ ᒋᐅᔑᒋᑲᑌᑭᐣ ᔕᐸᐧᑌᐊᐱᑯᐣ ᒋᐅᓇᑭᒋᑲᑌᑭᐣ ᑫᐅᒋᒪᐊᒋᑐᐡᑲᒪᑲᐠ ᐃᐡᑯᑌ ᐊᑎᑯᓴᑲᐃᑲᓂᐠ ᐁᑲᐧ ᒋᐅᒋ ᐊᓂᑯᐁᐧᐸᐦᐃᑫᒪᑲᐠ ᒪᔭᑦ ᑲᐅᐣᑕᐱᑫᓂᑫᐊᐧᐨ,” ᐃᑭᑐ ᑲᑭᐱᑕᑦ.

“ᐁᑲᐧ ᑭᐡᐱᐣ ᒥᐢᑕᐦᐃ ᐅᔑᐦᐅᒪᑲᐠ ᐃᐡᑯᑌ ᐱᓯᒧ ᐃᐡᑯᑌᒋᑫᐃᐧᓂᐠ, ᐊᒥ ᑫᑭᑐᑕᒧᐊᐧᐸᐣ ᐃᒪ ᐃᐡᑯᓂᑲᓂᐠ ᒋᐊᑕᒥᑯᐊᐧᐸᐣ ᐃᐡᑯᑌᐃᐧᑭᒪᐣ ᐦᐊᔾᐟᕑᐅ ᐊᐧᐣ ᓇᐣᑕ ᑯᑕᐠ ᐸᑲᐣ. ᐊᐱ ᑕᐡ ᐃᐡᑯᑌᐃᐧᔭᑊ ᐱᑕᐱᑫᑯᒋᑲᑌᐠ ᒥᐦᐃᒪ ᑫᑭᐅᐣᒋ ᓴᑲᐱᑫᓇᒪᐠ (ᐱᓯᒧᐃᐡᑯᑌᑲᐠ) ᐁᑲᐧ ᐃᒪ ᑲᐅᐣᒋᐅᔑᐦᐅᒪᑲᐠ ᐃᐡᑯᑌ, ᓂᑲᐊᑕᐊᐧᑕᒥᐣ.”

ᑲᑭᐱᑕᑦ ᐃᑭᑐ ᑭᒋᐊᓄᑭᐃᐧ ᒪᒋᑕᐃᐧ ᐱᒧᒋᑫᐃᐧᐣ ᑭᐅᒋᑲᓄᒋᑲᑌ ᓂᑯᑕᐧᓱ ᑭᐁᐧᑎᓄᐠ ᐅᑭᒪᑲᓇᐠ ᑕᔑᑫᐃᐧᓇᐣ ᒋᓇᓇᑐᓂᑲᑌᐠ ᐊᐣᑎ ᐸᑲᐣ ᐃᓀᑫ ᑫᑭᐅᐣᑎᓂᑲᑌᑭᐸᐣ ᐃᐡᑯᑌ, ᑐᑲᐣ ᐃᒪ ᐱᓯᒧᑲᐠ, ᓯᐱᑲᐠ ᓇᐣᑕ ᒥᓇ ᓄᑎᓄᐠ.

“ᐯᔑᑲᐧᔦᐠ ᑲᐃᐧᑲᑫᐧᑐᑕᒪᐠ ᒋᐅᒋ ᑲᑫᐧ ᔓᓂᔭᑫᑐᔭᑭᐣ ᓂᑯᑕᐧᓱ ᐃᐡᑯᓂᑲᓇᐣ ᑲᐅᒋᐱᒥ ᓂᑲᓂᐡᑭᑫᑕᒪᑫᔭᐠ,” ᑲᑭᐱᑕᑦ ᐃᑭᑐ. “ᓂᑭᔭᓂ ᓇᓇᑕᐊᐧᐸᑕᒥᐣ ᑕᐡ ᐊᐣᑎ ᐃᓀᑫ ᑫᑭᐅᐣᒋ ᐱᒥᔓᓂᔭᑫᔭᑭᐸᐣ ᒥᓇ ᑫᑭᐅᐣᒋ ᒪᒋᒋᑲᑌᑭᐸᐣ ᐊᓄᑭᐃᐧᐱᒧᒋᑫᐃᐧᐣ ᑐᑲᐣ ᐃᑯ ᑲᑐᒋᑲᑌᑭᐣ ᐊᓄᑭᐃᐧᓇᐣ ᐅᒪ ᑲᓇᑕ ᐊᐦᑭᐠ ᒥᓇ ᒥᓯᐁᐧᑲᒥᐠ.”

ᐅᒪ ᑭᒋᐊᓄᑭᐃᐧ ᒪᒋᑕᐃᐧ ᐱᒧᒋᑫᐃᐧᓂᐠ ᐊᔕ ᐅᑭᓇᓇᑲᒋᑐᓇᐊᐧ ᐊᐊᐧᔑᒣ 80 ᐊᓂᔑᓂᓂᐃᐧ ᑕᔑᑫᐃᐧᓇᐣ ᒥᓇ ᓄᐱᒪᑲᒥᐠ ᑕᔑᑫᐃᐧᓇᐣ ᒋᐅᔑᒋᑲᑌᐠ ᐃᐡᑯᑌᑫᐃᐧᐣ.

“ᐁᑲᐧ ᒥᓇ ᐅᒪ ᑭᒋᐊᓄᑭᐃᐧ ᒪᒋᑕᐃᐧ ᐱᒧᒋᑫᐃᐧᓂᐠ ᓂᒥᓀᐧᑕᒥᐣ ᒋᐃᐧᑕᓄᑭᒥᑯᔭᐠ ᑲᓀᑎᔭᐣ ᓱᓫᐊᕑ ᑭᒋᐊᓄᑭᐧᐃᓂᐠ, ᒋᐱᒥ ᐧᐃᒋᐦᐃᑎᓇᓂᐊᐧᐠ ᑲᐅᒋ ᓂᑲᓂᐱᒧᑐᐊᐧᐨ ᐃᐡᑯᑌᐃᐧ ᐊᓄᑭᐧᐃᓇᐣ ᒥᓇ ᑲᑭᑫᑕᒧᐊᐧᐨ ᐃᐡᑯᑌᑫᐃᐧᓂ ᑫᑭᐅᐣᒋ ᐃᐧᒋᒋᑲᑌᑭᐣ ᑲᓇᑕ ᐊᓂᔑᓂᓂᐃᐧ ᑕᔑᑫᐃᐧᓇᐣ” ᑲᑭᐱᑕᑦ ᐃᑭᑐ. “ᐁᑲᐧ ᐃᐧᓇᐊᐧ ᒪᐊᐧᐨ ᐅᑐᒋ ᓂᑲᓂᐡᑲᓇᐊᐧ ᑭᐁᐧᑎᓄᐠ ᐃᓀᑫᑲᒥᐠ ᑲᐅᔑᑐᐊᐧᐨ ᐱᓯᒧᑲᐠ ᐃᐡᑯᑌᑫᐃᐧᓂ, ᑲᓀᑎᔭᐣ ᓱᓫᐊᕑ ᑲᐃᓂᑕᐧ ᒪᐊᐧᐨ ᓇᐦᐃᐊᐧᐠ ᑲᐊᓄᑲᑕᒧᐊᐧᐨ ᒥᓇ ᑲᐃᔑᓇᐦᐃᐊᐧᐨ ᑕᐅᒋ ᑭᒋᐃᐧᒋᐦᐃᐁᐧᐊᐧᐠ ᑲᐃᐧᔑ ᐱᒪᓄᑲᑕᒪᐠ ᑲᓇᓇᑐᓇᒪᐠ ᑫᐅᒋ ᐃᐧᒋᐦᐃᑎᓱᔭᐠ.”

ᔕᐧᐣ ᑭᔪ, ᑲᓂᑲᓂᐊᐱᑕᒪᑫᐨ ᒥᓇ ᑲᐅᑭᒪᐃᐧᐨ ᑲᓀᑎᔭᐣ ᓱᓫᐊᕑ ᐊᓄᑭᐃᐧ ᐱᒧᒋᑫᐃᐧᓂᐠ, ᒥᐦᐅᐁᐧ ᐯᔑᐠ ᒪᐊᐧᐨ ᑲᒥᔕᐠ ᐃᐡᑯᑌᑫᐃᐧ ᐊᓄᑭᐃᐧ ᐱᒧᒋᑫᐃᐧᐣ, ᑭᐃᑭᑐ ᐅᑯᐁᐧᓂᐊᐧᐠ ᑭᒋᐊᓄᑭᐧᐃ ᒪᒋᑕᐃᐧ ᐱᒧᒋᑫᐃᐧᐣ ᑲᐱᒧᑐᐊᐧᐨ ᐅᐃᐧᑕᓄᑭᒥᑯᐃᐧᓂᐊᐧ ᓂᐦᓱᔭᑭ ᑭᒪᒋᒋᑲᑌᐸᐣ.

“ᑕᐃᔑᐃᐧᒋᒋᑫᒪᑲᐣ ᑲᑭᒪᐡᑲᐃᐧ ᑲᓄᑕᒪᐠ ᑲᓇᑕ ᐊᐦᑭᐠ ᒋᔑᐃᐧᑕᓄᑭᒥᐁᐧᔭᐠ, ᒋᐃᐧᒋᐦᐃᐁᐧᔭᐠ ᒋᐅᔑᒋᑲᑌᑭᐣ ᐱᓯᒧᑲᐠ ᑲᐅᒋ ᐊᓄᑭᒪᑲᐠ ᐃᐡᑯᑌ ᐁᑲ ᐃᐧᑲ ᑲᑭᐅᐣᒋ ᐃᔑᓇᑲᐧᑭᐸᐣ ᒋᑭᐅᒋ ᐊᓂᑲᐧᐱᑫᓂᑲᑌᐠ ᐃᐡᑯᑌᐃᐧᔭᐱᑲᐠ.” ᐃᑭᑐ ᑭᔪ. “ᐅᐁᐧ ᑐᑲᐣ ᑲᐃᔑᓇᑯᒋᑲᑌᑭᐣ ᑲᐃᐧᐣ ᒋᓂᔑᐊᐧᓇᒋᒋᑫᒪᑲᐠ ᒥᓇ ᑲᐃᐧᐣ ᒥᐢᑕᐦᐃ ᒋᒣᑎᓂᑫᐦᐃᐁᐧᒪᑲᐠ ᐁᑲᐧ ᒥᓇ ᐅᑲᑭᐅᒋ ᐃᐧᒋᐦᐃᑯᓇᐊᐧ ᐊᓂᔑᓂᓂᐊᐧᐠ ᐁᑲ ᑲᑌᐱᓭᐊᐧᐨ ᐅᑎᐡᑯᑌᒥᐊᐧ ᒥᓇ ᑯᑕᑭᔭᐣ ᓄᐱᒪᑲᒥᐠ ᑲᐃᔑᑲᐯᔑᐊᐧᐨ. ᓂᑭᒋᓀᑕᒥᐣ ᓂᑕᑭᒥᓇᐣ ᐁᑲ ᒋᐅᒋ ᐃᐧᓂᒋᑲᑌᐠ ᑫᓂᓇᐃᐧᐟ ᐅᒪ ᑲᐃᐧᐃᐸᐸᒥᓯᔭᐠ ᑭᒋᑫᑯᓂᐠ ᐁᑲᐧ ᒥᓇ ᒋᐅᒋ ᐃᐧᒋᐦᐃᑯᐊᐧᐨ ᒥᔑᐣ ᑲᐊᑕᐁᐧᑕᒧᐊᐧᐨ ᐃᐡᑯᑌᓂ ᑎᐯᐣᒋᑫᐃᐧᓇᐣ.”

ᑲᑭᐱᑕᑦ ᐃᑭᑐ ᐱᒥᐸᓂᒋᑫᐃᐧᑲᒥᑯᐣ ᑲᐅᒋᒪᑲᓂᐠ ᐅᑎᐡᑯᑌᒥᐊᐧ ᒥᔑᐣ ᓄᐱᒪᑲᒥᐠ ᑲᐊᔭᑭᐣ ᐃᐡᑯᓂᑲᓇᐣ ᐊᐧᐊᔑᒣ ᐅᑕᓂᒣᑎᓂᑫᐦᐃᑯᓇᐊᐧ ᑲᓂᐱᒥᓇᐣᑲᑭᑌᐠ ᑲᓴᓂ.

“ᐊᑎᐟ ᐊᓂᔑᓂᓂᐃᐧ ᑕᔑᑫᐃᐧᓇᐣ ᑲᐅᐣᒋ ᐊᓄᑲᑕᒪᐠ ᐅᐣᒋᒣᑎᓂᑫᐊᐧᐨ 1 ᒥᓫᐃᔭᐣ ᒥᓇ 2 ᒥᓫᐃᔭᐣ ᑕᓴᐧᐱᐠ ᐯᔑᑯᐊᐦᑭ ᑲᐃᔑᑕᐱᑕᒪᐃᐧᐣᑕᐧ ᐱᒥᑌᓂ ᐅᑕᔑᑫᐃᐧᓂᐊᐧᐠ,” ᐃᑭᑐ ᑲᑭᐱᑕᑦ. “ᑲᐃᐧᐣ ᑕᐡ ᐅᒥᓄᓴᐦᐃᑯᓯᓇᐊᐧ ᐅᐁᐧᓂ. ᑲᐃᐧᐣ ᑲᔦ ᒋᑌᐱᓭᐊᐧᐨ ᐅᑎᐡᑯᑌᒥᐊᐧ ᑲᑭᓇ ᐃᒪ ᐊᐧᑲᐦᐃᑲᓇᐣ ᑲᐊᔭᑭᐣ ᒋᐅᒋ ᓇᐸᐱᑫᓂᑲᑌᑭᐣ, ᒥᓇ ᐊᓄᑭᐃᐧᑲᒥᑯᐣ ᓇᐣᑕ ᒥᓇ ᒋᐅᒋ ᐃᐧᒋᐦᐃᐁᐧᒪᑲᐠ ᐊᓄᑭᐃᐧ ᒪᒋᒋᑫᐃᐧ ᐃᔑᒋᑫᐃᐧᓇᐣ.”

ᐊᓇᐃᐧᐣ ᐊᑎᑯᓴᑲᐃᑲᓂᐠ ᐅᑐᒋᐱᒥ ᐊᐸᒋᑐᓇᐊᐧ 149 ᑭᓫᐅᐊᐧᐟ ᐃᐡᑯᑌᓂ ᓯᐱᐠ ᑲᐅᒋᐊᓄᑭᒪᑲᓇᐠ, ᑲᑭᐅᔑᒋᑲᑌᑭᐸᐣ 1998, ᔕᑯᐨ ᐱᒥᐸᓂᒋᑲᓂ ᐅᑐᒋᒥᓯᐁᐧ ᐊᐸᒋᑐᓇᐊᐧ ᑭᐡᐱᐣ ᐁᑲ ᑲᑭᑌᐱᐅᔑᒋᑫᒪᑲᐠ ᐃᐡᑯᑌ ᓂᐱᑲᐠ ᒣᑲᐧᐨ ᑲᐱᐳᐠ.

“ᒥᑕᐡ ᐃᒪ ᑲᐃᐧᒪᒪᐃᐧ ᐊᓄᑲᑕᒪᐠ ᑲᓀᑎᔭᐣ ᓱᓫᐊᕑ, ᐊᓄᑭᐃᐧ ᒪᒋᒋᑫᐃᐧᓂᐠ ᐅᑭᒪᑕᓄᑲᑕᓇᐊᐧ ᒋᐊᓄᒋ ᐊᒋᐃᐧ ᐊᐸᒋᑐᐊᐧᐨ ᐱᒥᐸᓂᒋᑲᓂᐠ ᑲᐅᒋᐊᓄᑭᒪᑲᐠ ᐃᐡᑯᑌ ᐁᑲᐧ ᒥᐡᑲᐧᐨ ᒋᐊᐸᑕᐠ ᐱᓯᒧ ᐃᐡᑯᑌ,” ᐃᑭᑐ ᑲᑭᐱᑕᑦ.

“ᓄᑯᑦ ᑲᑭᔑᑲᐠ, ᓂᐃᐧᑕᓄᑭᒪᒥᐣ ᑲᐃᐧᑕᓄᑭᒪᑭᑕᐧ, ᓂᑐᒋ ᐅᔑᑐᒥᐣ ᑫᐃᔑᓇᑲᐧᐠ ᐱᓯᒧ ᐃᐡᑯᑌ ᐁᑲ ᓇᐱᐨ ᒋᐊᐸᑕᐠ ᐊᐦᑭᑲᐠ ᑲᐅᐣᒋ ᐊᐸᑕᐠ ᐃᐡᑯᑌ ᐁᐧᑎ ᐊᐧᓴ ᑭᐁᐧᑎᓄᐠ.”

ᒥᑭᐢ ᐃᑭᑐ ᒥᔑᓄᔭᑭ ᐅᑭᐱᒥ ᐃᐧᒋᐦᐃᑯᓇᐊᐧ ᐁᑲ ᐁᐧᓴ ᒥᐢᑕᐦᐃ ᒋᐅᒋ ᒣᑎᓂᑫᐦᐃᑯᐊᐧᐨ ᑲᑭᐅᔑᒋᑲᑌᓂᑭᐸᐣ ᓯᐱᑲᐠ ᒋᐅᒋ ᐊᓄᑭᒪᑲᓂᐠ ᐃᐡᑯᑌᓂ ᒥᓇ ᐱᒥᐸᓂᒋᑫᐃᐧᑲᒥᑯᓂ.

“ᑭᑕᒪᒥᑐᓀᑕᒥᐣ ᐊᐣᑎ ᐃᓀᑫ ᑫᑭᐅᐣᒋ ᒪᓇᒋᒋᑫᔭᑭᐸᐣ ᔓᓂᔭᓂᐠ ᒥᓇ ᐃᐡᑯᑌ ᒥᓇ ᐱᒥᑌ,” ᐃᑭᑐ ᒥᑭᐢ. “ᐊᑎᑲ ᑲᐱᒋᐃᐧᒋᑲᑌᐠ ᐱᒥᑌ ᒪᐊᐧᐨ ᐅᑭᒋᒣᑎᓂᑫᐦᐃᑯᓇᐊᐧ ᐊᐣᑎ ᐱᑯ ᐊᓂᔑᓂᓂᐃᐧ ᑕᔑᑫᐃᐧᓂᐠ.”


Email to a Friend
qr code
add to del.icio.us

Stumble It!

Post new comment

Comment policy

All comments submitted to Wawatay News Online must have a correct name, location and email address of the user. Wawatay will not approve comments without the required information.

The approval of comments will also be subjected to relevancy, laws of defamation and good taste.

Once posted, comments become the property of Wawatay News. Wawatay News reserves the right to publish or use this comment in any way in the future for online use, in print, and by any other media at the discretion of Wawatay News.

The content of this field is kept private and will not be shown publicly.