view counter

ᕑᐁ ᐅᑭᐊᓂᒧᑕᐣ ᒋᒥᓄᓭᒋᑲᑌᑭᐣ ᐊᓄᑭᐃᐧᓇᐣ ᒥᓇ ᑯᑕᑭᔭᐣ ᐱᒪᑎᓯᐃᐧᓂᐠ ᑫᒥᓄᓭᐊᐧᑲᓂᐊᐧᐠ

Thursday April 3, 2014

ᑫᑌ ᐅᐣᑌᕑᐃᔪ ᐅᑭᒪᐃᐧᐣ ᐸᐧᑊ ᕑᐁ ᐅᑭᔭᓂᒧᑕᐣ ᐁᓇᑕᐁᐧᑕᑲᐧᐠ ᒋᑕᑲᐧᐠ ᑎᐸᐸᒥᑎᐃᐧᓂᐠ ᐃᓀᑫ ᒋᐃᓇᑫᑲᐸᐃᐧᒪᑲᐠ ᑲᐃᐧᑕᓄᑭᒥᑎᓇᓄᐊᐧᐠ ᐊᐦᑭᑲᐠ ᑲᐅᐣᒋᒪᓂᔓᓂᔭᐊᐧᑌᐠ ᒣᑲᐧᐨ ᑲᑭᒪᐊᐧᒋᐦᐃᑎᓇᓂᐊᐧᐠ ᒥᑭᓯᐃᐧᐱᓯᑦ 17-18 ᐁᐧᑎ ᑕᐣᑐᕑ ᐯ.

“ᐅᑕᓇᐠ ᑭᐱᑐᑕᒧᐠ ᐃᑭᐧᐁᓂᐊᐧᐠ ᑲᑦᐸᓂᐊᐧᐣ ᐃᐧᓇᐊᐧ ᐱᑯ ᑲᐃᓀᑕᒧᐊᐧᐨ ᐁᑭᐱᒥᓂᔕᐦᐊᒧᐊᐧᐨ ᐅᑎᔑᒋᑫᐃᐧᓂᐊᐧ ᐁᑲᐧ ᒥᓇ ᐅᑭᒪᐊᐧᑐᓇᐊᐧᐣ ᑫᐊᓄᓇᐊᐧᐨ, ᑐᑲᐣ ᑲᐅᓇᓯᓇᐦᐃᑫᑕᒪᑫᐊᐧᐨ, ᐅᑕᔭᒥᑕᒪᑫᐠ ᒥᓇ ᑲᐊᐦᑭᐃᐧ ᓇᓇᑲᒋᒋᑫᐊᐧᐨ, ᒋᐅᓇᓯᓇᐦᐃᑫᑕᒪᑯᐊᐧᐨ ᐁᑲᐧ ᐊᐱᐣ ᒋᒪᒪᐃᐧᓇᒧᐊᐧᐨ ᑲᑭᐅᔑᑕᒪᐃᐧᑕᐧ ᑎᐸᒋᒧᐃᐧᓇᐣ ᐁᑭᐅᓇᐡᑭᓇᑐᐊᐧᐨ ᐯᐸᓄᐊᐧᔑᐠ,” ᑭᐃᑭᑐ ᒪᑕᐊᐧ ᐊᓂᔑᓂᓂᐊᐧᐠ ᑲᐅᐣᒋ ᐱᒥᓂᑲᓂ ᐊᔭᒥᑕᒪᑯᐊᐧᐨ ᒥᓇ ᐅᑕᓇᐠ ᕑᐃᐳᕑᐊᓫ ᑲᑭᐱᔑᑕᑭᐧᐨ ᐅᑭᒪᐃᐧ ᐱᒧᒋᑫᐃᐧᓂᐠ. “ᐁᐡᑲᑦ ᑭᐊᔭᐊᐧᓄᐣ 2,000 ᐁᑲᐧ ᒥᓇ ᐁᐡᑲᑦ ᑭᐊᔭᐊᐧᓄᐣ 3,000 ᐁᑲᐧ ᒥᓇᐊᐧ 4,000 ᑭᑕᓱᐸᐸᑭᑭᓂᑲᓀᔭᐊᐧᐣ, ᒥᑕᐡ ᐊᐱᐣ ᑲᑭᔭᓂᔑᓂᔕᐦᐊᒧᐊᐧᐨ ᐸᐣᐟ ᐊᐸᓱᐠ ᐁᑭᑐᐊᐧᐨ ‘ᒥᐅᓄ ᓂᑐᓇᒋᑫᐃᐧᓂᓇᐣ, ᒪᑎ ᐱᓇᑫᐧᐁᐧᔑᑐᐠ ᓂᔓᐱᒥᑯᓇᑲ ᑭᔭᓂᓯᓭᐠ.’”

ᕑᐁ ᑭᐃᑭᑐ ᐃᒪ ᒪᑕᐊᐧ ᑕᓇᐱᐃᐧᓇᐣ ᑲᐊᔭᑭᐣ ᑭᐃᑭᑐᐊᐧᐠ ᑲᐃᐧᐣ ᑭᑭᓇᐊᐧᐨ ᐅᐁᐧᓂ ᐅᑲᐸᑭᑎᓇᓇᐊᐧ ᒋᑐᑕᐃᐧᑕᐧ ᐅᐁᐧ ᒣᑲᐧᐨ.

“ᓂᓇᑕᐁᐧᑕᒥᐣ ᑫᒋᐊᐧᐠ ᐃᑯ ᒋᐱᓇᑭᐡᑲᑯᔭᐠ ᑫᑯᐣ ᑲᐃᐧᑲᑫᐧ ᒪᒋᒋᑲᑌᐠ, ᓂᓇᑕᐁᐧᑕᒥᐣ ᑲᔦ ᑫᒋᐊᐧᐠ ᐊᐃᐧᔭᐠ ᒋᐱᒥᑐᑕᒧᐊᐧᐨ ᒋᐱᐸᔕᐊᐧᐨ ᑕᓇᐱᐃᐧᓇᐣ ᑲᐧᔭᐠ ᒋᐱᐊᐧᐃᐧᑕᒪᑫᐊᐧᐨ ᑫᑯᓀᐣ ᐃᓂᐁᐧᓂᐊᐧᐣ ᑲᐃᐧᐃᔑ ᐅᓇᒋᑫᐊᐧᐨ ᒥᓇ ᒋᑲᑫᐧᒋᒪᐊᐧᐨ ᑕᓇᐱᐃᐧᓂᐠ ᑲᑲᐯᔑᐊᐧᐨ ᐊᓂᐣ ᑫᐃᔑᓇᑫᐧᐁᐧᔑᑐᐊᐧᐨ,” ᐃᑭᑐ ᕑᐁ. “ᐁᑲᐧ ᒥᓇ ᑕᓇᐱᐃᐧᓇᐣ ᑲᑲᐯᔑᐊᐧᐨ ᒋᑕᐃᐧᓇᒪᐃᐧᑕᐧ ᒋᔭᐸᒋᑐᐊᐧᐨ ᑲᔭᐡ ᐅᑭᑫᑕᒪᐃᐧᓂᐊᐧ, ᒋᑲᑫᐧᒋᒪᐊᐧᐨ ᑲᑭᒋᐦᐊᐃᐧᐡᑲᒪᑫᐊᐧᐨ, ᒋᐊᔭᑭᓀ ᐊᔭᒥᐦᐊᐊᐧᐨ ᐊᓂᔑᓂᓂᐊᐧᐣ ᒥᓇ ᒋᐸᐸᐊᐃᓇᐱᐊᐧᐨ ᐅᑕᑭᒥᓂᐠ ᒋᐃᑯᐊᐧᐨ ‘ᒧᔕᐦᐅᒪ ᐯᑲᐧᐨ
ᐣᑫᑌᓂᑲᐧᐦᐊᑲᓂᓇᐣ, ᒧᔕᐦᐅᒪ ᐊᐦᑭᐠ ᑲᑭᐱᐅᐣᒋ ᐊᐸᒋᑐᐊᐧᐨ ᒥᓯᐁᐧ ᐃᒪ ᑕᓇᐱᐃᐧᓂᐠ ᑲᑲᐯᔑᐊᐧᐨ ᐊᔕ ᒥᔑᓇᐧ ᑭᒋᒥᑕᓱᒥᑕᓇ ᑕᓱᔭᑭ. ᒥᑕᐡ ᐅᓄᐁᐧᓂᐊᐧᐣ ᑫᑯᓇᐣ ᑲᑲᑭᑫᐣᑕᒪᑭᐣ ᒥᓇ ᐊᓂᐣ ᐁᓂᔑᐱᒥᒋᐊᐧᐠ ᓂᐱ ᒥᓇ ᐊᐣᑎ ᐁᓂᔕᒪᑲᐠ ᓂᐱ ᒥᓇ ᐊᐣᑎ ᐁᔑᑭᓄᔐᑲᐠ ᒥᓇ ᐊᓂᐣ ᑫᑐᒋᑫᒪᑲᐠ ᑲᐃᐧᐃᔑᒪᒋᒋᑲᑌᐠ ᑫᑯᐣ. ᓂᑲᑫᐧᒋᒪᒥᐣ ᑕᐡ ᐅᐣᑌᕑᐃᔪ ᐅᑭᒪᐃᐧᐣ ᒋᑭᒋᓀᑕᑭᐣ ᐅᓄᐁᐧᓂᐊᐧᐣ ᑭᑫᑕᒪᐃᐧᓇᐣ ᑫᐃᐧᓇᐊᐧ ᒋᐊᔑᑎᓂᑕᐧ ᐊᓂᔑᓂᓂᐊᐧᐠ ᑲᐃᐧᐃᐊᓂᔑ ᐅᓇᐸᒋᑌᐠ ᐊᓄᑭᐃᐧᐣ.’”

ᑫᕑᐁ ᒥᓇᐊᐧ ᑯᑕᑭᓂ ᐅᑭᐃᐧᐣᑕᐣ ᐁᑲ ᑲᓇᐦᐁᑕᒥᐦᐃᑯᐊᐧᐨ ᒪᑕᐊᐧ ᐊᓂᔑᓂᓂᐊᐧᐠ ᑲᐃᐧᔭᓂᔑ ᐅᔑᒋᑲᑌᑭᐣ ᐅᑕᐸᓂᒥᑲᓇᑫᐃᐧᐣ ᐁᐧᑎ ᐅᐡᑭᐱᐊᐧᐱᑯᑫᐃᐧ ᐊᓄᑭᐃᐧᐣ ᑲᐃᐧᐃᔑᒪᑕᓄᑲᑌᐠ ᒋᐃᓇᒧᒋᑲᑌᐠ ᐁᑲᐧ ᒥᓇ ᐃᔑᓇᑲᐧᐣ ᒋᐅᒋ ᐱᒋᐳᐃᐧᒋᑫᒪᑲᐠ ᐊᐱ ᐊᓂᒧᓇᐦᐃᑲᓂᐊᐧᐠ ᑲᐃᐧᐃᔑᐱᐊᐧᐱᑯᑲᓂᐊᐧᐠ.

“ᐊᓂᐣ ᑕᐡ ᐊᐱᐣ ᑫᐃᓯᓭᐠ ᑭᐡᐱᐣ ᑲᐱᒥᓄᐁᐧᐠ ᐁᑲᐧ ᒥᓇ ᐊᓂᐣ ᑫᐃᓯᓭᐠ ᑭᐡᐱᐣ ᑲᑭᒥᐊᐧᐠ ᒥᓇ ᑲᓱᑭᐸᐧᐠ ᐁᑲᐧ ᐊᐱᐣ ᑫᑯᐣ ᑲᔕᐸᐧᔑᑲᐃᐧᐠ ᐊᓂ ᓂᐣᑲᐧᑲᒥᑭᑕᒪᑲᐠ ᒋᔭᓂᓇᔑᑲᐃᐧᐠ ᑲᓂᔑᓯᐱᐊᐧᐠ ᓇᐣᑕ ᓴᑲᐦᐃᑲᓂᐠ,” ᐃᑭᑐ ᕑᐁ. “ᐊᐣᑎ ᑕᐡ ᐊᐱᐣ ᐁᓂᔕᒪᑲᐠ, ᐁᑲᐧ ᒥᓇ ᑫᑯᓀᐣ ᐃᒪ ᑕᑲᐧ ᐃᐁᐧ ᑫᑯᐣ ᑲᔕᐸᐧᔑᑲᐃᐧᐠ. ᑫᑯᓀᓂᐊᐧᐠ ᐃᐃᐁᐧ, ᑫᑯᓀᐣ ᐃᐁᐧ ᑲᐃᒋᑲᑌᐠ. ᐱᒋᐳᐃᐧᓂᐊᐧᐠ ᐃᓇ ᐃᐁᐧ, ᒧᕑᑯᕑᐃ ᓇᐦ ᐃᒪ ᑕᑲᐧᐣ ᑲᐱᐊᐧᐱᑯᐊᐧᐠ ᐱᒋᐳᐃᐧᐣ.”

ᕑᐁ ᐅᑭᔭᓂᒧᑕᐣ ᐅᐁᐧᓂ ᑫᑯᐣ ᑲᔕᐸᐧᔑᑲᐃᐧᓂᐠ ᒪᐡᑯᐨ ᐅᑲᑭᐅᐣᒋ ᒪᒋᑐᑕᑯᓇᐊᐧ ᑭᓄᔐᐠ ᐊᐧᑲᐦᐃ ᑲᐃᔑᑕᑲᐧᑭᐣ ᓯᐱᐣ ᒥᓇ ᓴᑲᐦᐃᑲᓇᐣ.
“ᐊᓂᐣ ᑕᐡ ᑫᑐᒋᑫᒪᑲᐠ ᑲᐃᔑᑭᓄᔐᑲᐠ ᑲᑭᐱᐅᐣᑕᒋᐦᐅᓇᓂᐊᐧᐠ ᐊᔕ ᒥᔑᓇᐧ ᑭᒋᒥᑕᓱᒥᑕᓇ ᑕᓱᔭᑭ,” ᐃᑭᑐ ᕑᐁ. “ᑲᐃᐧᐣ ᑕᐡ ᐃᓯᓭᐸᐣ ᒋᔑᔕᓂᐊᐧᐠ ᒋᐊᐣᑕᐃᐧ ᓂᔑᐊᐧᓇᒋᒋᑲᑌᐠ.”

ᕑᐁ ᐅᑭᐃᐧᐣᑕᐣ ᐅᑯᐁᐧᓂᐊᐠ ᒪᑕᐊᐧ ᐊᓂᔑᓂᓂᐊᐧᐠ ᑲᐃᐧᐣ ᐁᑲᐧ ᒥᓇᐊᐧ ᐅᑲᐸᑭᑎᓇᓯᓇᐊᐧ ᐁᑲ ᒋᐱᓯᐢᑫᓂᒥᑕᐧ.

“ᑫᐃᐧᓇᐊᐧ ᐃᓯᓭᓂ ᒋᐊᔑᒋᐊᐧᐨ ᒋᐸᐸᒥᓯᐃᐧᓂᐠ,” ᐃᑭᑐ ᕑᐁ. “ᑫᐃᐧᓇᐊᐧ ᒋᐸᑭᑎᓂᑕᐧ ᑲᐃᔑᐸᐸᒥᓯᓇᓂᐊᐧᓂᐠ ᓇᐣᑕ ᒋᐃᑭᑐᐊᐧᐨ ᑭᐡᐱᐣ ᒪᒥᑐᓀᑕᒪᐣ ᐁᐃᐧᒥᑲᓇᑫᔭᐣ ᒋᐃᓇᒧᐠ ᐱᐊᐧᐱᑯᑲᓂᐠ, ᑭᐸᑯᓭᓂᒥᑯᓇᐊᐧ ᒋᑭᓇᓇᑲᑕᐁᐧᑕᒣᐠ ᑫᑯᓀᐣ ᑐᑲᐣ ᐊᓄᑭᐃᐧ ᑫᑯᓇᐣ ᑫᑭᐅᔑᑕᒪᐃᐧᔑᔦᑭᐸᐣ. ᐊᓂᐣ ᑲᐃᐧᐣ ᑲᓇᑫ ᑫᑯᐣ ᐅᓄᐁᐧᓂᐊᐧᐣ ᒣᑲᐧᐨ ᓂᑕᔭᓯᒥᐣ. ᐱᒥᓭᐃᐧᓂᐠ ᑭᑐᒋᐱᑕᑯᔑᓇᐊᐧ, ᓂᓇᐃᐧᐟ ᐃᐧᐣ ᐱᐳᓂᒥᑲᓇᐠ ᓂᑐᒋᐱᒥᔭᒥᐣ, 14 ᑕᓱᑎᐸᐦᐃᑲᐣ ᓂᐱᒥᐱᓱᒥᐣ ᐁᐧᐱᑫᐧ ᐁᐅᐣᒋᒪᒋᐱᓱᓇᓂᐊᐧᐠ ᐁᐧᑎ ᑕᐣᑐᕑ ᐯ ᐁᐱᓱᓇᓂᐊᐧᐠ. ᐁᑲᐧ ᑕᐡ ᓂᐅᐱᓯᑦ ᐁᑕ ᐯᔑᑯᐊᐦᑭᐠ ᐃᓯᓭ ᐅᐁᐧ ᒋᑭᑐᑕᒪᐣ.”

ᕑᐁ ᑭᐃᑭᑐ ᒥᓯᐁᐧ ᐃᒪ ᒪᒪᐤ ᑫᐅᐣᒋᒥᓄᓭᐊᐧᑫᐊᐧᐨ ᐊᐃᐧᔭᐠ ᒋᐃᔑᓇᑯᒋᑲᑌᐠ ᒪᒋᒋᑫᐃᐧᓇᐣ ᓇᑕᐁᐧᑕᑲᓇᐣ ᒋᒥᓇᐧᔑᒋᑲᑌᑭᐣ ᑫᑭᐅᐣᒋ ᑕᑲᐧᑭᐣ ᐊᓄᑭᐃᐧᓇᐣ ᒋᐊᓂᑌᐱᓂᑲᑌᑭᐣ.

“ᐊᓂᐣ ᑕᐡ ᑫᑭᑐᑕᒪᑭᐸᐣ ᑫᑭᐅᐣᒋᒪᓂᐱᑐᔭᑭᐸᐣ ᑫᒋᓇᐨ (ᒪᑕᐊᐧ ᑕᓇᐱᐃᐧᓇᐣ) ᐊᓂᔑᓂᓂᐊᐧᐠ ᑫᑯᓇᐣ ᑫᓄᒋᑭᑕᒋᑐᐊᐧᐸᐣ, ᑭᐡᐱᐣ ᒥᓇ ᐊᐱ ᑭᐊᔭᒪᑲᓂᑭᐣ,”ᐃᑭᑐ ᕑᐁ. “ᐊᓂᐣ ᑫᑭᑐᑕᒪᑭᐸᐣ ᒋᑭ ᑭᑭᓄᐦᐊᒪᐃᐧᑕᐧᐸᐣ ᐊᐃᐧᔭᐠ. ᐊᓂᐣ ᑫᑭᐅᐣᒋ ᑫᒋᓇᐁᐧᑕᒪᑭᐸᐣ ᒋᑭᔭᓂ ᐅᔓᓂᔭᒥᐊᐧᐸᐣ ᐊᐃᐧᔭᐠ ᑫᑭᐅᐣᒋ ᒥᓄᓭᐊᐧᑫᐊᐧᐸᐣ ᒥᓇ ᐅᑎᐯᐣᒋᑫᐃᐧᓂᐊᐧ, ᐃᐧᓇᐊᐧ ᐱᑯ ᒋᑭᐅᐣᒋ ᐱᒪᒋᐦᐃᑎᓱᐊᐧᐸᐣ ᒥᓇ ᐅᑎᐯᐣᒋᑫᐃᐧᓂᐊᐧ.”

ᕑᐁ ᒥᓇᐊᐧ ᐅᑭᔭᓂ ᐊᓂᒧᑕᐣ ᑲᓇᑕᐁᐧᑕᑲᐠ ᒋᓇᓇᑲᒋᒋᑲᑌᑭᐸᐣ ᐊᓄᑭᐃᐧ ᐸᑫᐧᓇᒪᑫᐃᐧ ᔓᓂᔭ.

“ᒥᐦᐅᐁᐧᓂ ᐊᓂᔑᓂᓂᐊᐧᐠ ᑲᑭᐱᓇᑕᐁᐧᑕᒧᐊᐧᐨ ᑫᐃᐧᓇᐊᐧ ᒋᑭᐊᔭᐊᐧᐸᐣ ᐅᑕᑭᒥᐊᐧ ᒥᓇ ᐊᐣᑎ ᑫᐅᐣᒋᐱᒥ ᔓᓂᔭᑫᐊᐧᐨ,” ᐃᑭᑐ ᕑᐁ. “ᒥᐦᐅᐁᐧ ᑲᑭᐱᐃᑭᑐᐊᐧᐨ, ᓇᑐᑕᐃᐧᔑᓇᑦ, ᐊᔕ ᓂᒥᓇᐧᑲᑌᐣᑕᒥᐣ ᑲᐯᐦᐃ ᑲᒧᒋᐊᐯᓂᒧᑕᐊᐧᔭᐠ ᑲᓇᑕ ᑭᒋᐅᑭᒪ, ᒥᓇ ᐅᐣᑌᕑᐃᔪ ᐅᑭᒪᐃᐧᐣ ᒋᐊᐧᐃᐧᒋᐦᐃᑯᔭᐠ. ᑲᐃᐧᐣ ᐊᐊᐧᔑᒣ ᓂᓇᑕᐁᐧᑕᓯᒥᐣ ᐅᐁᐧ ᒋᔑᓇᑲᐧᐠ ᓂᐱᒪᑎᓯᐃᐧᓂᓇᐣ. ᑫᓂᓇᐃᐧᐟ ᓂᐃᐧᑐᑕᒥᐣ ᐊᓄᑭᐃᐧᐣ
ᑲᐃᔑᐱᒥᐅᑎᓯᓇᓂᐊᐧᐠ, ᑌᐯᐧ ᐱᑯ ᑲᐅᐣᒋᐅᑎᓯᓇᓂᐊᐧᐠ ᐊᓄᑭᐃᐧᓂᐠ, ᐁᑲᐧ ᑕᐡ ᑭᐊᐧᐸᑕᒥᐣ ᐁᐱᑕᑯᔑᓄᒪᐠ ᐁᑲᐧ ᑕᐡ ᐊᓂᐣ ᑫᑭᓇᐃᐧᐟ
ᑫᑭᑐᑕᒪᑭᐸᐣ ᑕᐱᑕ ᒋᐅᒋ ᑌᐱᓇᒪᓱᔭᑭᐸᐣ ᑲᐅᒋᒥᓄᓭᐊᐧᑲᓂᐊᐧᐠ ᑲᐊᓄᑭᐃᐧᓂᑲᐠ ᐁᑲ ᐃᐧᐣ ᒋᑕᔑᒧᒋᐱᒥᔭᒪᑲᐠ ᐊᐱᐣ ᑕᐱᐡᑯᐨ
ᑲᔭᓂᒪᒋᐁᐧᐸᓯᐠ ᒋᔑᓇᑲᐧᐠ.”

ᕑᐁ ᐅᑭᐸᑭᑎᓇᓇᐸᐣ ᐅᑕᓂᒧᒋᑫᐃᐧᐣ ᒣᑲᐧᐨ ᒥᑭᓯᐃᐱᓯᑦ 18 ᑲᐃᓇᑭᓱᓂᐠ: ᑕᑲᐧᐣ ᑫᑭᔭᓄᒋ ᒪᒋᐱᒧᓴᓂᐊᐧᐠ ᒥᑕᐡ ᐁᔑᓂᑲᑌᐠ ᒋᒥᓄᑲᓇᐊᐧᐸᒥᑎᓇᓂᐊᐧᐠ ᐃᐧᑕᓄᑭᒥᑐᐃᐧᓂᐠ.


Email to a Friend
qr code
add to del.icio.us

Stumble It!

Post new comment

Comment policy

All comments submitted to Wawatay News Online must have a correct name, location and email address of the user. Wawatay will not approve comments without the required information.

The approval of comments will also be subjected to relevancy, laws of defamation and good taste.

Once posted, comments become the property of Wawatay News. Wawatay News reserves the right to publish or use this comment in any way in the future for online use, in print, and by any other media at the discretion of Wawatay News.

The content of this field is kept private and will not be shown publicly.