view counter

ᓀᑲᐃᐧᓴᑲᐃᑲᓂᐠ ᐅᐡᑭᓂᑭᓴᐠ ᐅᐱᒪᑫᐧᐸᐦᐃᑫᐠ ᑲᑭᐸᑭᓇᑫᐊᐧᐸᐣ ᑕᑕᑭᐧᐊᐧᐠ ᑭᒋᐦᐊᐃᐧ ᐱᒪᑫᐧᐸᐦᐃᑫᐃᐧᓂᐠ

Friday March 7, 2014
Eugene Capay/Special to Wawatay News

A Sandy Lake novice player plays the puck.

ᓀᑲᐃᐧᓴᑲᐃᑲᓂᐠ ᑲᐅᐣᒋᐊᐧᐨ ᐊᒥ ᐅᑯ ᐊᑎᐟ ᑲᑭ ᑭᒋᐸᑭᓇᑫᐊᐧᐸᐣ ᒣᑲᐧᐨ ᐊᐊᐧᔑᔕᐠ ᒥᓇ ᐅᐡᑲᑎᓴᐠ ᑲᑭ ᐱᒪᑫᐧᐸᐦᐃᑫᐦᐃᑕᐧᐸᐣ ᐊᐧᓂᓇᐊᐧᑲᐠ ᐁᑲᐧ ᑕᐡ ᐊᑎᐟ ᐃᑭᐁᐧᓂᐊᐧᐠ ᐅᒣᑕᐁᐧᐠ ᒥᒋᐟᐢ ᑲᐃᓂᑕᐧ ᑲᑭᐃᔑᑕᑭᐧᐊᐨ ᒥᓇᐊᐧ ᑕᑭᐁᐧᐡᑲᐊᐧᐠ ᒋᑕᑭᐧᐊᐧᐨ ᑭᒋᐦᐊᐠ ᑲᐃᐧ ᑭᒋᐱᒪᑫᐧᐸᐦᐃᑫᐊᐧᐨ.

ᓀᑲᐃᐧᓴᑲᐃᑲᓂᐠ ᑭᐸᑭᓇᑫᐸᓂᐠ ᒥᒋᐟᐢ A-Side, ᐱᐃᐧᐢ A-Side, ᐃᑫᐧᓭᓴᐠ B-Side, ᓇᐧᐱᐢ B-Side, ᐊᑕᑦ C-Side ᐁᑲᐧ ᒥᓇ ᐸᐣᑕᑦ C-Side ᒪᒋᐨ ᐸᑭᓇᑐᐃᐧᓇᐣ ᒣᑲᐧᐨ ᐊᐱ ᐊᓂᔑᓂᓂᐃᐧ ᐊᐊᐧᔑᔕᐠ ᒥᓇ ᐅᐡᑲᑎᓴᐠ ᑲᑭ ᑭᒋᐱᒪᑫᐧᐸᐦᐃᑫᐊᐧᐨ ᑭᔐᐱᓯᑦ 10-16 ᐁᐧᑎ ᐊᐧᓂᓇᐊᐧᑲᐠ ᐱᒪᑫᐧᐸᐦᐃᑫᐃᐧᑲᒥᑯᐠ ᐁᑲᐧ ᒥᓇ ᐁᐧᑎ ᐅᐱᔑᑯᑲᐠ ᐱᒪᑫᐧᐸᐦᐃᑫᐃᐧᑲᒥᑯᐠ.

ᒥᔑᐣ ᐃᑭᐁᐧᓂᐊᐧᐠ ᓀᑲᐃᐧᓴᑲᐃᑲᓂᐠ ᒥᒋᐟᐢ ᑲᑭᐸᑭᓇᑫᐊᐧᐨ ᐅᐱᒪᑫᐧᐸᐦᐃᑫᐠ ᑕᑕᑭᐧᐊᐧᐠ ᑲᐃᐧ ᑭᒋᐱᒪᑫᐧᐸᐦᐃᑲᓄᐊᐧᐠ ᒣᑲᐧᐨ ᒥᓯᑭᐃᐧᐱᓯᑦ 10-16 ᑭᐁᐧᑎᓄᐠ ᐊᓂᔑᓂᓂᐃᐧ ᐱᒪᑫᐧᐸᐦᐃᑫᐃᐧᐣ ᑲᐃᒋᑲᑌᐠ.

“ᐊᔕ ᒥᐢᑕᐦᐃ ᐊᓂᓇᐦᐃᐊᐧᐠ ᒥᓇ ᐱᑯ ᐅᑕᓂᑭᑫᐣᑕᓇᐊᐧ ᑫᐃᔑᑲᓇᐧᐊᐸᒥᑎᐊᐧᐨ,” ᐃᑭᑐ ᓇᐧᕑᐊ ᒉᐣ ᒥᑭᐢ, ᒥᒋᐟᐢ ᐅᐱᒪᑫᐧᐸᐦᐃᑫᐠ ᑲᑭᐱᒥᓂᑲᓂᐡᑲᐊᐧᐨ. “ᒥᔑᐣ ᐊᔕ ᐊᓂᔑᐱᒪᑕᐦᐁᐊᐧᐠ ᑭᒋᐦᐊᐠ ᑲᐃᔑᐱᒪᑕᐦᐁᐊᐧᐨ, ᒥᐦᐃᒪ ᑫᐃᔑᑕᑭᐧᐊᐨ ᑲᐃᐧ ᑭᒋᐱᒪᑫᐧᐸᐦᐃᑲᓂᐊᐧᐠ ᒣᑲᐧᐨ ᒥᑭᓯᐃᐧᐱᓯᑦ.”

ᒥᑭᐢ ᐃᑭᑐ ᑫᑲᐟ ᑲᑭᓇ ᐅᐱᒪᑫᐧᐸᐦᐃᑫᐠ ᓀᑲᐃᐧᓴᑲᐃᑲᓂᐠ ᑲᐅᐣᒋᐊᐧᐨ ᑲᑭᐃᔕᐊᐧᐨ 2014 ᐊᐊᐧᔑᔕᐠ ᒥᓇ ᐅᐡᑲᑎᓴᐠ ᐱᒪᑫᐧᐸᐦᐃᑫᐃᐣ A-Side ᒪᒋᐨ ᑲᑭᐸᑭᓇᑫᐊᐧᐨ ᒥᒋᐟᐢ ᑲᐃᓂᑕᐧ 18 ᑕᓱᐊᐦᑭᐃᐧᓀᐊᐧᐠ.

“ᐊᒥ ᐃᐡᑲᐧᔭᐨ ᐁᑭᐃᓂᑕᐧᐸᐣ ᒋᒣᑕᐁᐧᐊᐧᐨ ᐅᑕᓇᐠ ᐱᐳᓄᐠ, ᐁᑲᐧ ᐊᐱᐣ ᑫᑕᑕᐃᐧᐣ ᑭᐅᐣᒋ ᐊᐣᑎᓂᑲᑌᓂ ᑲᑕᓱᐊᐦᑭᐃᐧᓀᐊᐧᐨ ᒥᒋᐟᐢ ᑲᐃᔑᒣᑕᐁᐧᐊᐧᐨ,” ᒥᑭᐢ ᐃᑭᑐ. “ᐅᑕᓇᐠ ᐱᐳᓄᐠ ᓂᐣᑭᐃᓇᐸᓂᐠ ᐊᒥ ᑭᓇᐊᐧ ᐃᐡᑲᐧᔭᐨ ᐅᒪ ᐁᒣᑕᐁᐧᔦᐠ ᐊᑯᓇᐠ ᐁᑕ 17 ᑲᑕᓱᐊᐦᑭᐃᐧᓀᐊᐧᐨ ᐸᑭᑎᓇᐊᐧᐠ ᒋᒣᑕᐁᐧᐊᐧᐨ.”

ᒥᑭᐢ ᑲᐃᐧᐣ ᒋᑫᒋᓇᐧᐁᐣᑕᐠ ᐊᐁᐧᓀᐣ ᑫᐅᐣᒋᓂᑲᓂᐡᒪᑫᐨ ᒥᓇᐊᐧ ᐱᐳᓂᐠ ᒥᒋᐟᐢ ᑲᐃᔑᒣᑕᐁᐧᐊᐧᐨ.

“ᓂᑯᑕᐧᓱ ᐁᑕ ᒣᑲᐧᐨ ᓄᑯᑦ ᒪᓯᓇᐦᐃᑲᓱᐊᐧᐠ,” ᐃᑭᑐ ᒥᑭᐢ. “ᑲᐃᐧᐣ ᒪᔑ ᓂᑭᑫᑕᓯᐣ ᐊᐣᑕᓯᐣ ᑫᐱᐊᐣᒋᐡᑲᐊᐧᐨ ᐃᒪ ᐸᐣᑕᑦ ᑲᐃᔑᒣᑕᐁᐧᐊᐧᐨ.”
ᒥᑭᐢ ᐅᑭᔭᓂ ᒪᒋᓂᑲᓂᐡᑲᐊᐧᐸᓂᐣ ᒥᒋᐟᐢ ᑲᐃᔑᒣᑕᐁᐧᐊᐧᐨ ᒣᑲᐧᐨ ᐱᐃᐧ ᑲᐃᔑᒣᑕᐁᐧᐊᐧᐸᐣ.

“ᓂᐢᑕᑦ ᓂᑭᒧᒋ ᐸᐸᒥ ᑲᓇᐁᐧᓂᒪᐸᓂᐠ,” ᒥᑭᐢ ᐃᑭᑐ. “ᐁᑲᐧ ᑕᐡ ᐊᔕ ᓂᐦᓱᐊᐦᑭ ᓂᐣᑐᒋᐱᒥ ᓂᑲᓂᐡᑲᒪᐊᐧᐠ ᐅᑯᐁᐧᓂᐊᐧᐠ ᒥᒋᐟᐢ ᑲᐃᔑᒣᑕᐁᐧᐊᐧᐨ.”

ᑫᕑᐃ ᒪᓄᑭᓯᐠ, ᐊᑕᑦ ᑲᐃᔑᒣᑕᐁᐧᐊᐧᐨ ᑲᐱᒥ ᑭᑭᓄᐦᐊᒪᐊᐧᐨ, ᐊᔕ ᓂᐅᐊᐦᑭ ᐅᑐᐣᒋᐱᒥ ᑭᑭᓄᐦᐊᒪᐊᐧᐣ, ᓂᐢᑕᑦ ᐧᓇᐱᐢ ᑲᑭ ᐃᔑᒣᑕᐁᐧᐊᐧᐸᐣ ᐁᑲᐧ ᓄᑯᑦ ᐊᑕᑦ ᐃᔑᒣᑕᐁᐧᐊᐧᐠ.

“ᓂᔑᐣ ᓇᐯᓴᐠ ᓂᑕᔭᐊᐧᐠ ᐅᑌᐦᐃᐠ ᑲᐃᔑᐊᑯᓯᐊᐧᐨ ᐊᑕᑦ ᑲᐃᔑᒣᑕᐁᐧᐊᐧᐨ,” ᒪᓄᑭᓯᐠ ᐃᑭᑐ, ᐯᔑᐠ ᐃᓂᐁᐧᓂᐊᐧᐣ ᐅᑯᓯᓴᐣ ᐃᐁᐧ ᐃᓇᐱᓀᐊᐧᐣ. “ᒥᑕᐡ ᑲᐅᐣᒋ ᐊᐧᐃᐧᒋᐊᐧᑲᐧ ᐯᑭᐡ ᐁᐅᐣᒋ ᑲᓇᐁᐧᓂᒪᐠ ᓂᑯᓯᐢ, ᐁᑲᐧ ᒥᓇ ᐅᑐᑌᒪᐣ ᐯᔑᑲᐧᐣ ᐁᐃᓇᐱᓀᓂᐨ ᐅᑌᐦᐃᐊᐧᐠ.”

ᒪᓄᑭᓯᐠ ᐃᑭᑐ ᐊᓂᒥᔑᓄᐊᐧᐠ ᓀᑲᐃᐧᓴᑲᐃᑲᓂᐠ ᑲᐅᒋᐊᐧᐨ ᐁᓂᒣᑕᐁᐧᐊᐧᐨ ᐱᒪᑫᐧᐸᐦᐃᑫᐃᐧᓂᐠ ᑲᐊᑲᔐᔑᐊᐧᐨ.

“ᐊᑕᑦᐢ ᒥᓇ ᓇᐧᐱᐢ ᑲᐃᔑᒣᑕᐁᐧᐊᐧᐨ ᒪᐊᐧᐨ ᐃᑯ ᑕᓂᓇᐦᐃᐊᐧᐠ ᐊᐱ ᐊᓂᐅᑎᑕᒧᐊᐧᐨ ᐱᐃᐧ ᒥᓇ ᐸᐣᑕᑦ ᐊᓂᔑᑕᑭᐧᐊᐧᐨ,” ᒪᓄᑭᓯᐠ ᐃᑭᑐ. “ᒪᐊᐧᐨ ᐃᑯ ᓇᐦᐃᐊᐧᐠ ᐃᑭᐁᐧᓂᐊᐧᐠ ᒥᒋᐟᐢ ᑲᐃᔑᐱᒪᑕᐦᐁᐊᐧᐨ - ᐅᑯᐁᐧᓂᐊᐧᐠ ᒥᒋᐟᐢ ᒣᑲᐧᐨ ᐃᒪ ᐱᐃᐧᐢ ᑲᐃᔑᑕᑭᐧᐊᐧᐸᐣ ᑭᐅᐣᒋᒪᒋᑕᐸᓂᐠ. ᓂᑕᔭᐊᐧᒥᐣ ᐅᐱᒪᑫᐧᐸᐦᐃᑫᐠ ᓂᐅᐊᐦᑭ ᐅᑕᓇᐠ ᑲᑭᒪᒋᑕᐊᐧᐸᐣ ᐁᑲᐧ ᑲᐃᐧᐣ ᑲᓇᑫ ᒪᔑ ᐱᐃᐧᐢ ᒋᔑᒣᑕᐁᐧᐊᐧᐨ.”

ᒪᓄᑭᓯᐠ ᐃᑭᑐ ᐅᑯᐁᐧᓂᐊᐧᐠ ᐅᒣᑕᐁᐧᐠ ᑲᐧᔭᐠ ᑕᓂᒣᑕᐁᐧᐊᐧᐠ ᑭᐡᐱᐣ ᐁᑲ ᓄᑌᐳᓂᑐᐊᐧᐨ, ᑲᐧᔭᐠ ᐃᓇᐣᒋᑫᐊᐧᐨ, ᑲᐯᐦᐃ ᐊᐧᐊᐧᑲᐃᐧᐊᐧᐨ ᒥᓇ ᑲᐧᔭᐠ ᒋᔑᒪᒥᑐᓀᑕᒧᐊᐧᐨ.

“ᑲᑭᓇ ᑫᑯᐣ ᑲᑐᒋᑫᑕᒪᐊᐧᑭᑕᐧ ᐅᑯᐁᐧᓂᐊᐧᐠ ᐊᐊᐧᔑᔕᐠ ᐁᐧᑎ ᐅᓂᑲᓂᒥᐊᐧ ᒪᐊᐧᐨ ᐅᑲᓂᐃᐧᒋᐦᐃᑯᓇᐊᐧ,” ᐃᑭᑐ ᒪᓄᑭᓯᐠ.

ᒥᑭᐢ ᐃᑭᑐ ᐃᒪ ᐅᑕᔑᑫᐃᐧᓂᐠ ᑭᔓᓂᔭᑫᐊᐧᐠ $60,000 ᐊᐊᐧᔑᒣ ᐯᔑᑯᐊᐦᑭ ᐁᑭᐊᑕᐁᐧᐃᐧᓂᑫᐊᐧᐨ, ᐱᐣᑯᑫᐊᐧᐨ ᒥᓇ ᒥᒋᒥᐊᑕᐁᐧᐊᐧᐨ ᒋᐃᐧᒋᐦᐃᑯᐊᐧᐨ ᑲᓂᑯᑕᐧᓭᐧᐊᐧᓀᓯᐊᐧᐨ ᐅᒣᑕᐁᐧᐠ ᑲᑭᐃᔕᐊᐧᐨ ᒣᑲᐧᐨ ᑭᔐᐱᓯᑦ 10-16 ᑭᒋ ᐱᒪᑫᐧᐸᐦᐃᑫᐃᐧᐣ ᐁᐧᑎ ᐊᐧᓂᓇᐊᐧᑲᐠ ᒥᓇ ᐅᐱᔑᑯᑲᐠ.
“ᒪᐊᐧᐨ ᓂᑭᒥᓀᐧᑕᒥᐣ A-Side ᑲᑭᐸᑭᓇᑫᐊᐧᐨ ᒥᓇ ᓂᑭ ᑭᒋᓀᓂᒪᒥᐣ ᑲᑭᓇ ᐣᑕᐊᐧᔑᔑᒥᓇᓂᐠ ᑲᑭᐱᑭᐁᐧᐃᐧᑐᐊᐧᐨ ᐅᐸᑭᓇᑫᐃᐧᓂᐊᐧ,” ᐃᑭᑐ ᐁᐧᐣ ᑲᑭᐱᑕᑦ, ᐅᓇᔓᐁᐧᐃᐧᓂ, ᑲᐅᐣᒋᑲᓇᐊᐧᐸᑕᐠ ᒣᑕᐁᐧᐃᐧᓂ ᒥᓇ ᑯᑕᑭᔭᐣ ᐃᔑᒋᑫᐃᐧᓇᐣ. “ᒪᐊᐧᐨ ᐃᑯ ᐅᑭᒪᒥᓀᐧᑕᓇᐊᐧ ᐊᐊᐧᔑᔕᐠ ᑭᔭᑦ ᐁᑭᐸᑭᓇᑫᐊᐧᐨ ᒥᓇ ᐁᑲ ᑲᑭᐸᑭᓇᑫᐊᐧᐨ, ᒥᐱᑯ ᑲᐃᔑ ᒪᒥᓀᐧᑕᒧᐊᐧᐨ.”

ᑲᑭᐱᑕᑦ ᐃᐧᐣ ᐅᑭᐱᒥ ᑭᑭᓄᐊᒪᐊᐧᐸᓂᐣ ᐃᑫᐧᓭᓴᐠ ᐅᐱᒪᑫᐧᐸᐦᐃᑫᐠ ᐅᑕᓇᐠ ᐱᐳᓄᐠ, ᔕᑯᐨ ᐅᑭᐳᓂᑐᐣ ᐊᐱ ᑲᑭᐃᐡᑲᐧ ᐅᓇᑭᒪᑲᓄᐸᐣ ᒋᐅᓇᔓᐁᐧᐃᐧᓂᓂᐃᐧᐨ.

“ᒪᐊᐧᐨ ᑲᔦ ᑭᒐᒋᑫᐣᑕᑲᐧᐣ,” ᑲᑭᐱᑕᑦ ᐃᑭᑐ. “ᒪᐊᐧᐨ ᑲᔦ ᓂᑭᒪᒪᑲᑌᓂᒪᐠ ᐃᑫᐧᓭᓴᐠ, ᐊᓇᐃᐧᐣ ᑲᐃᐧᐣ ᐃᐧᑲ ᒋᑭᐅᐣᒋᐸᑭᓇᑫᐊᐧᐸᐣ ᐅᑕᓇᐠ ᐱᐳᓄᐠ. ᐅᑕᓇᐠ ᐱᐳᓄᐠ ᑲᐃᐧᐣ ᑭᐅᐣᒋᐊᔭᓯᐊᐧᐠ ᑯᑕᑭᔭᐠ ᐃᑫᐧᓭᓴᐠ ᐅᐱᒪᑫᐧᐸᐦᐃᑫᐠ, ᐁᑲᐧ ᑕᐡ ᐅᑭᒪᐃᐧᓀᐊᐧᐊᐧᐣ ᓇᐯᓴᐣ.”

ᑎᓫᐊᕑᐊᐢ ᑲᑭᑲᒥᐠ, ᐃᑫᐧᓭᓴᐠ ᐅᐱᒪᑫᐧᐸᐦᐃᑫᐠ ᑲᓂᑲᓂᐡᑲᐊᐧᐨ, ᐃᑭᑐ ᓄᑯᑦ ᑲᑭᐱᒪᑫᐧᐸᐦᐃᑲᓂᐊᐧᐠ ᒪᐊᐧᐨ ᑭᒋᑫᐣᑕᑲᐧᐣ ᐃᐧᒋᐃᑫᐧᓭᓴᐦᐃ ᑲᑭᒪᒪᐃᐧᓀᐦᐅᑎᐊᐧᐨ.

“ᓂᑭᑫᐣᑕᐣ ᐁᑭᒥᓀᐧᑕᒧᐊᐧᐨ ᑲᑭᒣᑕᐁᐧᐊᐧᐨ, ᔕᑯᐨ ᐅᑯᐁᐧᓂᐊᐧᐠ ᐃᑫᐧᓭᓴᐠ ᐊᔕ ᐃᐁᐧ ᑲᐃᓂᑭᓂᐊᐧᐨ ᐊᓂ ᐅᐡᑭᓂᑭᑫᐧᐊᐧᑎᓯᐊᐧᐠ,” ᑲᑭᑲᒥᐠ ᐃᑭᑐ. “ᐁᑲᐧ ᐱᓇᒪ ᐁᐃᐧ ᐊᐧᐁᐧᔑᐦᐅᐊᐧᐨ ᒥᓇ ᐁᒥᓇᑯᐦᐅᐊᐧᐨ ᐁᓂᒪᐧᔦ ᒣᑕᐁᐧᐊᐧᐨ ᐁᑲᐧ ᐊᐱᐣ ᐁᓂᒪᑲᑌᐃᐧᐡᑭᔑᑫᐧᐊᐧᐨ ᑲᓂᒪᐧᔦ ᑭᔑᒣᑕᐁᐧᐊᐧᐨ ᑲᓂᓴᐯᐧᓱᐊᐧᐨ. ᒪᐊᐧᐨ ᐃᑯ ᑭᐊᐧᐃᐧᔭᓯᓇᑯᒋᑫᐊᐧᐠ.”

ᑲᑭᑲᒥᐠ ᐃᑭᑐ ᐃᑫᐧᓭᓴᐠ ᑭᔭᓂᓇᐦᐃᐊᐧᐠ ᒣᑲᐧᐨ ᑲᑭ ᑭᒋᐱᒪᑫᐧᐸᐦᐃᑲᓂᐊᐧᓂᐠ, ᒥᓇ ᐃᐧᓀᑕᐊᐧ ᐅᐱᒪᑫᐧᐸᐦᐃᑫᐠ ᐃᒪ ᑲᐃᐧᐣ ᒋᑭᐅᐣᒋ ᓄᑌᑭᐱᑎᓂᑲᑌᓂᐠ ᐅᒣᑕᐁᐧᐃᐧᓂᐊᐧ ᒣᑲᐧᐨ A-Side ᑲᑭᐊᓂᔕᐊᐧᐸᐣ ᑲᒪᐃᐧᓀᐊᐧᐊᐧᐨ ᒥᒋᑲᐣᓴᑲᐃᑲᓂᐠ ᐅᐱᒪᑫᐧᐸᐦᐃᑫᐠ.

“ᐊᓇᐃᐧᐣ ᑲᐃᐧᐣ ᒋᑭᐅᐣᒋᐱᓇᐦᐃᑫᔭᐣᐠ, ᒥᐱᑯ ᑲᑭᐃᔑᐱ ᒣᑕᐁᐧᔭᐣᐠ,” ᑲᑭᑲᒥᐠ ᐃᑭᑐ. “ᐁᑲᐧ ᒥᓇ ᓂᔕᐧ ᓂᑭᒪᐃᐧᓀᐊᐧᒥᐣ ᐅᐱᔑᑯᑲᐠ. ᓂᐢᑕᑦ ᓂᑭᐸᑭᓇᑯᒥᐣ 5-0 ᐁᑲᐧ ᒥᓇᐊᐧ ᑲᑭᒪᐃᐧᓀᐊᐧᔭᐣᐠ 4-4 ᑭᐃᓯᓭ, ᒥᑕᐡ ᐃᒪ ᒥᐢᑕᐦᐃ ᑲᑭᐅᐣᒋ ᓇᐦᐃᔭᐣᐠ ᓂᔕᐧ ᑲᑭᔭᓂ ᒪᐃᐧᓀᐊᐧᔭᐠ.”

ᑲᑭᑲᒥᐠ ᐃᑭᑐ ᐃᑫᐧᓭᓴᐠ ᐅᐱᒪᑫᐧᐸᐦᐃᑫᐠ ᓂᔑᐣ ᐅᒣᑕᐁᐧᐠ ᑕᐅᐣᒋᐃᐡᑲᐧᑕᐊᐧᐠ ᒥᓇᐊᐧ ᐊᓂᐱᐳᓂᐠ ᔕᑯᐨ ᑯᑕᑭᔭᐠ ᐊᔕ ᑕᓂᐊᔭᐊᐧᐠ ᑫᒣᑕᐁᐧᐊᐧᐨ.

“ᑭᐡᐱᐣ ᐊᓂᒪᒋᑕᐊᐧᐨ ᒥᓇ ᐊᓂᐱᒥᓇᐦᐃᐊᐧᐨ, ᓂᑌᐸᑫᓂᒪᐠ ᒋᑲᐡᑭᐦᐅᐊᐧᐨ,” ᑲᑭᑲᒥᐠ ᐃᑭᑐ. “ᐁᑲᐧ ᒥᓇ ᓂᑕᔭᐊᐧᒥᐣ ᐃᑫᐧᓭᓴᐠ ᑲᑲᐯᔑᐊᐧᐨ ᐁᐧᑎ ᑕᐣᑐᕑ ᐯ ᐅᑌᓇᐠ, ᑲᑭᑕᑭᐧᐊᐧᐨ ᐱᒪᑫᐧᐸᐦᐃᑫᐃᐧᓂᐠ, ᓴᑫᐣ ᒪᐃᐧᐣ ᑕᐃᐧᔭᓂ ᓇᑲᒋᐊᐧᐠ.”

ᑲᑭᑲᒥᐠ ᐃᑭᑐ ᐃᑫᐧᓭᓴᐠ ᐅᐱᒪᑫᐧᐸᐦᐃᑫᐠ ᑭᔭᓂᓇᐦᐃᐊᐧᐠ ᓄᑯᑦ ᑲᐱᐳᓂᐠ ᐊᐱ ᑲᑭᐃᐡᑲᐧ ᒪᐃᐧᓀᐊᐧᐊᐧᐸᐣ ᐊᑕᑦ ᐅᐱᒪᑫᐧᐸᐦᐃᑫᐠ.

“ᐅᑭᑐᑕᓇᐊᐧ ᑕᓱᑭᔑᑲ ᐁᑭᒣᑕᐁᐧᐊᐧᐨ, ᑫᐃᐧᓇᐊᐧ ᐊᑕᑦᐢ ᑕᓱᑭᔑᑲ ᑭᒣᑕᐁᐧᐊᐧᐠ,” ᑲᑭᑲᒥᐠ ᐃᑭᑐ, ᐁᑲᐧ ᒥᓇ ᑭᐃᑭᑐ ᓂᐦᓴᐧ ᐯᔑᑯᐱᒥᑯᓇᑲ ᐁᑕ ᐊᑯ ᑭᒣᑕᐁᐧᐸᓂᐠ. “ᐃᑭᐁᐧᓂᐊᐧᐠ ᑲᔦ ᐱᐃᐧᐢ ᑫᐃᐧᓇᐊᐧ ᐅᑭᓇᑕᐁᐧᑕᓇᐊᐧ ᐁᐃᐧ ᐃᐧᒋᐊᐧᐊᐧᐨ, ᐁᐃᐧᐅᐣᒋ ᑲᑭᑭᓇᐊᐧᐸᑕᐦᐊᐊᐧᐨ ᐃᑫᐧᓭᓴᐣ ᐊᓂᐣ ᐊᐊᐧᔑᒣ ᑫᓂᔑ ᓇᓇᐦᐃᐊᐧᐸᐣ. ᐁᑲᐧ ᑕᐡ ᐯᔑᑲᐧ ᐅᑭᒪᐃᐧᓀᐊᐧᐊᐧᐣ ᐱᐃᐧᐢ ᑲᐃᔑᒣᑕᐁᐧᐊᐧᐨ ᐁᑲᐧ ᑲᐧᔭᐠ ᐃᑯ ᑭᒪᒣᑕᐁᐧᐊᐧᐠ.”

ᑕᕑᓫᐃᐣ ᑲᑭᐱᑕᑦ, ᑲᐱᒥ ᑭᑭᓄᐊᒪᐊᐧᐨ ᐃᑫᐧᓭᓴᐠ ᐅᐱᒪᑫᐧᐸᐦᐃᑫᐠ, ᐃᑭᑐ ᐃᑭᐁᐧᓂᐊᐧᐠ ᐃᑫᐧᓭᓴᐠ ᒪᐊᐧᐨ ᐃᑯ ᑭᒪᒥᓀᐧᐣᑕᒧᐠ ᑲᑭᐃᔑ ᑭᒋ ᐱᒪᑫᐧᐸᐦᐃᑲᓂᐊᐧᓂᐠ.

“ᐅᑭᒥᓀᐧᐣᑕᓇᐊᐧ ᑲᔦ ᑲᑭᒪᐃᐧᓀᐊᐧᐊᐧᐨ ᓇᐊᐧᐨ ᑲᒪᒪᑎᑐᐊᐧᐨ ᐃᑫᐧᓭᓴᐦᐃ, ᐃᑭᐁᐧᓂᐊᐧᐠ ᐅᑎ ᒪᐊᐧᐨ ᒥᒋᑲᐣᓴᑲᐃᑲᓂᐠ ᐅᒣᑕᐁᐧᐠ,” ᑕᕑᓫᐃᐣ ᐃᑭᑐ. “ᑭᓴᓇᑭᓯᐊᐧᐣ ᑲᑭᑯᒋᐦᐊᐊᐧᐨ ᔕᑯᐨ ᑕᐡ ᑲᐧᔭᐠ ᑭᒣᑕᐁᐧᐊᐧᐠ.”

ᑕᕑᓫᐃᐣ ᐃᑭᑐ ᐅᑯᐁᐧᓂᐊᐧᐠ ᐃᑫᐧᓭᓴᐠ ᐅᑕᔕᐊᐧᐸᑕᓇᐊᐧ ᒥᓇᐊᐧ ᐁᐧᑎ ᐊᓂᐱᐳᓂᐠ ᒋᒣᑕᐁᐧᐊᐧᐨ, ᐁᑲᐧ ᐃᑭᑐᐊᐧᐠ ᐊᔕ ᒥᓇᐊᐧ ᐁᐱᒥ ᒣᑕᐁᐧᐊᐧᐨ ᐅᑕᔑᑫᐃᐧᓂᐊᐧᐠ ᐊᐊᐧᔑᒣ ᒋᔭᓂ ᓇᐦᐃᐊᐧᐨ.

“ᐅᓇᑯ ᑭᐱᒪᑫᐧᐸᐦᐃᑫᐊᐧᐠ ᐁᑲᐧ ᒥᓇᐊᐧ ᑲᐊᓂᑎᐱᑲᓂᐠ ᐅᑲᑯᒋᐦᐊᐊᐧᐣ ᓇᐊᐧᐨ ᑲᑭᒋᑫᐧᐃᐧᐊᐧᐨ ᐅᐱᒪᑫᐧᐸᐦᐃᑫᐠ,” ᑕᕑᓫᐃᐣ ᐃᑭᑐ. “ᒥᐦᐃᒪ ᐁᐅᐣᒋ ᐃᐧᒋᐦᐃᑯᐊᐧᐨ ᐃᑫᐧᓭᓴᐠ ᐅᐁᐧᓂ ᑲᐃᔑᐊᐧᐃᐧᒋᐦᐃᐣᑕᐧ ᐅᐱᒪᑫᐧᐸᐦᐃᑫᐃᐧᓂᐊᐧᐠ - ᐱᓂᐡ ᒋᑭᔭᓂ ᓇᐦᐃᐊᐧᐨ ᒥᓇ ᐁᑲ ᒋᔕᑫᐧᓂᒧᐊᐧᐨ.”

ᑕᕑᓫᐃᐣ ᐅᑌᐯᐧᑕᐣ ᐃᑫᐧᓭᓴᐠ ᑫᐃᐧᓇᐊᐧ ᑲᐱᑭᓯᓄᐦᐃᐣᑕᐧ ᒋᐱᒪᑫᐧᐸᐦᐃᑫᐊᐧᐨ ᐅᑐᐣᒋ ᐃᐧᒋᐦᐃᑯᓇᐊᐧ ᐃᑫᐧᓭᓴᐠ ᓂᑲᐣ ᒋᐃᓇᐱᐊᐧᐨ ᑫᓂᔑ ᐅᓇᑕᒪᓱᐊᐧᐨ ᒥᓯᐁᐧ ᐊᐧᑲᐦᐃ ᑭᐁᐧᑎᓄᐠ ᐅᐣᑌᕑᐃᔪ.

“ᐅᑐᐣᒋ ᒋᑭᐦᐃᑯᓇᐊᐧ ᑲᔦ ᐃᑫᐧᓭᓴᐠ ᑲᐱᒪᑫᐧᐸᐦᐃᑫᐊᐧᐨ ᒥᓯᐁᐧ ᐊᐧᑲᐦᐃ ᑭᐁᐧᑎᓄᐠ ᐃᓀᑫ,” ᑕᕑᓫᐃᐣ ᐃᑭᑐ.


Email to a Friend
qr code
add to del.icio.us

Stumble It!

Post new comment

Comment policy

All comments submitted to Wawatay News Online must have a correct name, location and email address of the user. Wawatay will not approve comments without the required information.

The approval of comments will also be subjected to relevancy, laws of defamation and good taste.

Once posted, comments become the property of Wawatay News. Wawatay News reserves the right to publish or use this comment in any way in the future for online use, in print, and by any other media at the discretion of Wawatay News.

The content of this field is kept private and will not be shown publicly.