Click for more information.
view counter

ᓂᔑᓇᐯ ᐊᐢᑭ ᔑᒪᑲᓂᔑᐎᐣ ᐅᓇᑕᐌᑕᓇᐗ ᒋᑎᐱᓭᐠ ᔑᒪᑲᓂᔑᐎᐣ ᐊᓄᑭᐎᐣ: ᑭᒋ ᐅᑭᒪᑲᓀᐢ

Wednesday February 20, 2013

ᑲᑭᐗᐸᒋᑲᑌᐠ ᑲᑭᐳᓂᐱᒪᑎᓯᐨ ᑲᓴᐸᓇᑲ ᐃᑴ ᐊᔕ ᒥᓇ ᐊᓂᑕᔑᒋᑲᑌ ᔑᒪᑲᓂᔑᐎ ᐊᓄᑭᐎᐣ ᐊᓂᔑᓂᓂᐤ ᐃᐡᑯᓂᑲᓂᐠ, ᓂᔑᓇᐯ ᐊᐢᑭ ᑭᒋᐅᑭᒪᑲᓀᐢ ᑭᐃᑭᑐ ᐊᓂᔑᓇᐯ ᐊᐢᑭ ᑭᑐᑕᓇᐎᓭᒥᐣ ᐊᐱᐨ ᒥᓯᐌ ᐅᐅᒪ ᐊᑭᐠ ᑲᓇᑲᒋᒋᑲᑌᐠ ᔑᒪᑲᓂᔑᐎ ᐊᓄᑭᐎᐣ᙮
ᐊᓬᐱᐣ ᐱᑎᓬᐅᕒ ᐃᑭᑐ ᒋᑎᐱᓭᐠ ᔑᒪᑲᓂᔑᐎ ᐊᓄᑭᐎᐣ ᒥᓇ ᐱᒥᐎᒋᑫᐎᐣ ᑲᐎᐣ ᒪᔑ ᒋᐸᑭᑎᓂᑲᑌᐠ ᐊᔕ ᒥᓂᑯᐠ ᓂᓵᓯ ᑕᓱ ᐊᐦᑭ ᑲᑭᐳᓂᐱᒪᑎᓯᐗᐸᐣ ᓂᔑᐣ ᓇᐯᐗᐠ ᐃᐃᒪ ᑭᔑᒋᐗᐣ ᑕᑯᓂᑫᐎᑲᒥᑯᐠ ᑲᑭᒐᑭᑌᑭᐸᐣ ᒥᓇ ᐊᔕ ᓂᐅ ᐱᐳᐣ ᑲᑭᐸᑭᑎᓇᑭᐸᐣ ᐅᓇᓇᑐᑭᑫᒋᑫ ᐁᑭᐃᑭᑐᓇᓂᐗᑭᐸᐣ ᒋᐊᑎᒥᒋᑲᑌᐠ ᔑᒪᑲᓂᔑᐎ ᐊᓄᑭᐎᐣ ᐅᐅᒪ ᓂᔑᓇᐯ ᐊᐢᑭ ᐃᐡᑯᓂᑲᓂᐠ᙮
“ᐯᔑᐠ ᐃᑭᑐᐎᓇ ᑲᑭᐸᑭᑎᓂᑲᑌᑭᐸᐣ ᐃᐃᒪ ᑭᔑᒋᐗᐣ ᓇᓇᑐᑭᑫᒋᑫᐎᐣ ᑭᐃᑭᑐᓇᓂᐗᓄᐸᐣ ᓂᔑᓇᐯ ᐊᐢᑭ ᔑᒪᑲᓂᔑᐎ ᐱᒥᐎᒋᑫᐎᐣ ᒋᑭᓇᑭᒋᑲᑌᑭᐸᐣ ᑲᑭᒋᓇᑭᑌᐠ ᐱᒥᐎᒋᑫᐎᐣ,” ᐃᑭᑐ ᐱᑎᓬᐅᕒ᙮ “ᑕᑭᐃᓯᓭᐸᐣ, ᑕᑭᐃᓇᑯᓂᑫᐎᓄᐸᐣ ᒥᓇ ᐅᑕᑭᑌᐱᓇᓇᐗᐸᐣ ᐁᔑᐱᒥᐊᓄᑭᓇᓂᐗᐠ ᓂᔑᓇᐯ ᐊᐢᑭ ᔑᒪᑲᓂᔕᐠ ᑲᑭᐱᒥᓂᔕᐦᐊᒧᐗᐸᐣ᙮ ᔕᑯᐨ ᓄᑯᒼ ᑲᐃᓯᓭᐠ, ᑲᐎᐣ ᐃᓇᑭᒋᑲᑌᓯᓄᐣ ᒋᑭᒋᓇᑭᒋᑲᑌᐠ: ᒥᐌ ᐁᔑᑲᓇᐗᐸᑕᒧᐗᐨ ᐁᒧᒋᐱᒥᐎᒋᑲᑌᐠ ᐃᑭᐌᓂᐗᐠ ᑲᓂᔕᑭᐣ ᐅᑭᒪᐎᓇᐣ ᒥᓇ ᐅᐅᐌ ᑲᐃᔑᑲᓇᐗᐸᒋᑲᑌᐠ ᐱᒥᐎᒋᑫᐎᐣ, ᑲᐎᐣ ᑭᓇᑕᐌᑕᑯᓯᓯᒥᐣ ᒥᓇ ᑲᐎᐣ ᑌᐱᒥᓂᑯᐠ ᑭᒥᓂᑯᓯ,ᐃᒼ ᔓᓂᔭ ᒋᑌᐱᒋᑲᑌᑭᐣ ᑲᐃᓇᓄᑭᐗᐨ ᔑᒪᑲᓂᔕᐠ᙮”
ᓇᓇᑐᑭᑫᒋᑫᐎᐣ ᑲᑭᑐᒋᑲᑌᑭᐸᐣ ᑲᑭ ᐃᐡᑾᐱᒪᑎᓯᐗᐸᐣ ᕒᐃᑲᕒᑐ ᐌᓯᓬᐃ ᒥᓇ ᒉᒥ ᑯᑙᐣ ᑲᑭᐅᒋᐗᐨ ᑭᔑᒋᐗᐣ, ᑭᐸᑭᑎᓂᑲᑌᐸᐣ ᒣ 21, 2009, ᐁᑭᑲᓄᓇᑲᓀᐗᐨ ᑲᓇᑕ ᒥᓇ ᐅᐣᑌᕒᐃᔪ ᒋᑭᐅᓇᒋᑫᐗᐸᐣ ᐊᓂᐣ ᑫᑭᑐᒋᑲᑌᑭᐸᐣ ᒋᐊᑎᒥᒋᑲᑌᐠ ᔑᒪᑲᓂᔑᐎ ᐊᓄᑭᐎᐣ ᑲᐃᔑ ᑲᓇᐗᐸᒋᑲᑌᐠ ᑲᔦ ᐱᒥᐎᒋᑫᐎᐣ ᐃᐃᒪ ᐃᐡᑯᓂᑲᓂᐠ ᒥᓇ ᐅᑌᓇᐠ ᑲᐃᔑ ᑲᓇᐗᐸᒋᑲᑌᐠ ᔑᒪᑲᓂᔑᑫᐎ ᐊᓄᑭᐎᐣ᙮
ᒥᓇ ᑭᐃᑭᑐᒪᑲᐣ ᐃᐃᐌ ᒪᓯᓇᐦᐃᑲᐣ ᐊᐊᐌ ᑲᓇᑕ ᒥᓇ ᐅᐣᑌᕒᐃᔪ ᒋᐅᑕᑕᒪᐗᐗᐨ ᓂᔑᓇᐯ ᐊᐢᑭ ᔑᒪᑲᓂᐡ ᐱᒥᐎᒋᑫᐎᐣ ᔓᓂᔭᓇᐣ ᑲᓇᑕᐌᓂᒪᑲᓀᐨ ᒋᑭᐅᒋ ᑲᐡᑭᑐᐗᐨ ᐅᑕᓄᑭᐎᓂᐗ ᑲᐃᔑ ᑲᓇᐗᐸᒋᑲᑌᑭᐣ ᑯᑕᑭᔭᐣ ᐅᑌᓇᐣ, ᒋᑭᑫᒋᑲᑌᐠ ᐊᐊᐌ ᔓᓂᔭ ᑲᐸᑭᑎᓇᑲᓀᐨ ᒋᑌᐱᓭᐨ ᒋᐅᒋ ᑲᐡᑭᑐᐗᐨ ᓂᔑᓇᐯ ᐊᐢᑭ ᔑᒪᑲᓂᔑ ᐎ ᐱᒥᐎᒋᑫᐎᐣ ᒋᑌᐱᓇᒧᐗᐨ ᑲᐃᓇᓄᑭᐗᐨ ᔑᒪᑲᓂᔕᐠ ᑲᐃᓇᑌᐠ ᐃᐃᒪ ᐅᐣᑌᕒᐃᔪ ᔑᒪᑲᓂᔑᐎ ᐱᒥᐎᒋᑫᐎᐣ ᐃᓇᑯᓂᑫᐎᐣ ᒥᓇ ᔑᒪᑲᓂᔑᐎ ᐊᓄᑭᐎᐣ ᑎᐸᐸᒋᑲᐣ ᑲᑭᐅᔑᑐᐗᐨ ᐅᑭᒪᐎᐣ ᑲᐅᒋᐊᐣᑾᒥᒋᑫᐨ ᒥᓇ ᑲᑭᐸᐦᐅᐨ ᑲᓇᓇᑲᒋᐦᐊᐗᐨ ᑲᔦ ᑲᒥᐢᑾᐱᓱᐗᐨ ᔑᒪᑲᓂᔕᐠ ᑲᐃᔑᑲᓇᐗᐸᒋᑫᐗᐨ᙮
“ᐅᑕᓇᐠ ᑲᑭᑐᒋᑲᑌᐠ ᑭᔑᒋᐗᐣ ᓇᓇᑐᑭᑫᒋᑫᐎᐣ ᙮᙮᙮ ᒥᓇ ᐃᐳᕒᐗᐡ ᓇᓇᑐᑭᑫᒋᑫᐎᐣ, ᑭᓇᓇᓴᐱᐎᒋᑲᑌ ᐃᑭᑐᐎᓇᐣ ᐃᐃᒪ ᐃᐡᑯᓂᑲᓂᐠ ᔑᒪᑲᓂᔑᑫᐎ ᐊᓄᑭᐎᐣ ᒋᑭᐃᓇᒋᑲᑌᑭᐸᐣ ᐃᐃᒪ ᐅᓇᑯᓂᑫᐎᓂᐠ ᒋᐅᒋ ᑲᓇᐗᐸᒋᑲᑌᐠ, ᒥᓇ ᐁᑭᑐᓇᓂᐗᐠ, ᒋᐅᒋ ᑲᓇᐗᐸᒋᑫᒪᑲᐠ ᔑᒪᑲᓂᔑᐎ ᐱᒥᐎᒋᑫᐎᐣ ᒥᓇ ᐃᓇᑯᓂᑫᐎᓇᐣ ᑲᑭᓇ ᑯᑕᑭᔭᐠ ᔑᒪᑲᓂᔑᐎ ᐱᒥᐎᒋᑫᐎᓇᐣ ᐎᓇᐗ ᑲᑲᓇᐗᐸᑕᒧᐗᐨ ᐅᐅᒪ ᑭᑕᑭᒥᓇᐣ,” ᐃᑭᑐ ᒍᓬᐃᔭᐣ ᐸᓬᑯᓄᕒ, ᐅᑕᔭᒥᑕᒪᑫ ᑲᔭᓄᑭᑕᐗᐨ ᐊᓂᔑᓇᐯ ᐊᐢᑭ᙮ “ᑲᒪᔑ ᐃᐃᐌ ᐃᓯᓭᓯᓄᐣ, ᒥᓇ ᐃᔑᑌᐺ, ᐊᓂᔑᓇᐯ ᐊᐢᑭ ᑭᒪᐡᑲᐎ ᑲᓄᒋᑫᑕᒪᑫ ᐃᓂᐌᓂᐗᐣ ᐃᑭᑐᐎᓇᐣ ᑲᑭᐸᑭᑎᓂᑲᑌᑭᐣ ᐃᐃᒪ ᑭᔑᒋᐗᐣ ᒥᓇ ᐁᑭᐎᒋᑲᐸᐎᑕᒧᐗᐨ᙮”
ᐸᓬᑲᓄᕒ ᐅᑭᐎᑕᐣ ᐅᐅᐌ ᐊᓂᔑᓇᐯ ᐊᐢᑭ ᔑᒪᑲᓂᔑᐎ ᐱᒥᐎᒋᑫᐎᐣ ᐁᔑᑲᓇᐗᐸᒋᑲᑌᐠ ᐱᒥᐎᒋᑫᐎᐣ, ᑲᐎᐣ ᐃᐃᒪ ᐃᔑᐊᒋᑲᑌᓯᓄᐣ ᐃᓇᑯᓂᑫᐎᓂᐠ, ᑲᓇᐗᐸᒋᑫᐎᓇᐣ ᒥᓇ ᑫᑭᐃᓇᒋᑲᓂᐗᑭᐸᐣ ᒋᒪᓇᒋᐦᐊᑲᓀᐗᐨ ᐊᓂᔑᓂᓂᐗᐠ ᐎᓇᐗ ᑲᐃᔑ ᑲᓇᐗᐸᑕᒧᐗᐨ ᑯᑕᑭᔭᐣ ᔑᒪᑲᓂᔑᐎ ᐱᒥᐎᒋᑫᐎᓇᐣ ᑎᓄᑲᐣ ᐅᐣᑌᕒᐃᔪ ᔑᒪᑲᓂᔑᐎ ᐊᓄᑭᐎᐣ᙮
ᐯᔑᐠ ᑭᑭᓇᐗᒋᒋᑲᐣ ᑲᑭᐃᓯᓭᐠ ᔐᐱᐌᕒᐃ 1 ᑲᑭᐳᓂᐱᒪᑎᓯᐨ ᑲᑭ ᓂᔑᑕᓇᔑᓂᓱᐱᐳᓀᐨ ᐃᑴ ᐃᐃᒪ ᑲᓴᐸᓇᑲ, ᐁᑭᐃᓯᓭᐠ ᒣᑾᐨ ᐊᐊᐌ ᐃᑴ ᐁᑲᓇᐌᓂᒥᑯᐨ ᔑᒪᑲᓂᔕᐣ᙮ ᑭᐡᐱᐣ ᑭᐃᐡᑾᐱᒪᑎᓯᑯᐸᓀᐣ ᐁᑲᓇᐌᓂᒥᑯᐨ ᐅᐣᑌᕒᐃᔪ ᔑᒪᑲᓂᔕᐣ, ᑲᐱᑭᔑᑲᐸᐎᐗᐨ ᔑᒪᑲᓂᔕᐠ ᐅᑕᑭᓇᓇᑐᑭᑫᑕᓇᐗ ᑲᑭᐃᓯᓭᐠ᙮ ᐃᐃᒪᑕᐡ ᐃᐡᑯᓂᑲᓂᐠ ᑲᐃᔑᐊᓄᑭᐗᐨ ᓂᔑᓇᐯ ᐊᐢᑭ ᔑᒪᑲᓂᔕᐠ, ᑲᐎᐣ ᐅᐣᑌᕒᐃᔪ ᑲᓇᓇᑐᑭᑫᒋᑫᐗᐨ ᔑᒪᑲᓂᔕᐠ ᐅᒋᓇᑕᐌᑕᑯᓯᓯᐗᐠ ᐃᑭᐌᓂᐗᐠ ᐅᑭᓇᓇᑲᒋᑐᓇᐗ ᐅᐣᑌᕒᐃᔪ ᔑᒪᑲᓂᔕᐠ ᑲᑭᓇᓇᑐᑭᑫᒋᑫᐗᐨ᙮
ᐱᑎᓬᐅᕒ ᐃᑭᑐ ᐊᓂᔑᓇᐯ ᐊᐢᑭ ᐁᓇᓇᑕᐗᐸᑕᒧᐗᐨ ᓂᔑᓇᐯ ᐊᐢᑭ ᔑᒪᑲᓂᔑᑫᐎᐣ ᒋᑭᐃᓇᑯᓂᑫᐎᓂᐗᑭᐸᐣ ᐊᐱᐨ ᐱᒥᐎᒋᑫᐎᐣ ᑲᐃᔑ ᑲᓇᐗᐸᒋᑲᑌᐠ᙮
“ᑲᑭᓇᑕᐌᑕᑯᓯᒥᐣ ᑾᔭᐠ ᒋᔑᑲᓇᐗᐸᑕᒣᐠ ᔑᒪᑲᓂᔑᑫᐎᐣ ᒥᓇ ᑲᑭᓇᑕᐌᑕᒥᐣ ᔓᓂᔭ ᒋᑭᐱᒥᑎᑐᔭᐠ ᔑᒪᑲᓂᔑᑫᐎᐣ ᑲᐃᔑᓇᑕᐌᑕᑯᐠ,” ᐱᑎᓬᐅᕒ ᐃᑭᑐ᙮ “ᐅᐅᐌ ᑲᐃᔑᐱᒥᐎᒋᑫᔭᐠ, ᒥᓇ ᑲᐃᔑᓇᑯᑭᐣ ᔑᒪᑲᓂᔑᐎ ᐗᑲᐦᐃᑲᓇᐣ, ᒥᓇ ᑲᑭᓇ ᐱᑯ ᑫᑯᐣ ᔑᒪᑲᓂᔑᑫᐎᐣ, ᑲᑭᐃᔑᑲᓇᐗᐸᑕᒥᐣ ᔑᒪᑲᓂᔑᑫᐎᐣ ᑲᐃᔑᓇᑕᐌᑕᑯᐠ᙮ ᐅᐅᐌᑕᐡ ᓄᑭᒼ ᑲᐃᓯᓭᐠ, ᑲᐎᐣ ᐃᐃᐌ ᐃᓯᓭᓯᓄᐣ᙮”
ᐱᑎᓬᐅᕒ ᐃᑭᑐ ᓂᔑᓇᐯ ᐊᐢᑭ ᔑᒪᑲᓂᔑᑫᐎᐣ ᐅᒋᐊᓄᑭᒪᑲᐣ ᐊᔕ 18 ᑕᓱᔭᑭ, ᐊᐱ ᑲᑭᒪᑕᓄᑭᒋᑲᑌᑭᐸᐣ, ᐱᒥᐎᒋᑫᐎᐣ ᐁᑭᑎᐱᒥᓇᑲᓀᐗᐨ ᔓᓂᔭᓇᐣ ᒥᓇ ᐁᑭᑭᐡᓂᒥᐨ ᔓᓂᔭᓇᐣ᙮
“ᑭᑎᐡᑯᓂᑲᓂᓇᐣ ᓇᑕᐌᑕᑯᐣ ᑾᔭᐠ ᒋᔑᓇᑯᐠ ᔑᒪᑲᓂᔑᑫᐎᐣ ᒥᓇ ᑾᔭᐠ ᒋᐸᑭᑎᓇᑲᓀᐨ ᔓᓂᔭ ᑾᔭᐠ ᒋᐊᓄᑭᒋᑲᑌᐠ ᔑᒪᑲᓂᔑᑫᐎᐣ,” ᐱᑎᓬᐅᕒ ᐃᑭᑐ᙮ “ᔑᒪᑲᓂᔑᑫᐎᐣ ᐊᓄᑭᐎᐣ, ᐊᐱ ᑲᐱᑲᓄᓇᑲᓀᐗᐨ, ᑕᓂᔑᐗᐠ ᐃᑯ ᔑᒪᑲᓂᔕᐠ ᐃᔕᐗᐨ ᐃᐃᒪ ᑲᑭᐅᒋᑲᓄᓇᑲᓀᐗᐨ᙮ ᑭᓇᐎᐟ ᑲᐃᓯᓭᔭᐠ, ᐃᑭᐌᓂᐗᐠ ᓂᔑᓇᐯ ᐊᐢᑭ ᔑᒪᑲᓂᔕᐠ ᐃᐃᒪ ᑲᐃᔑᐊᓄᑭᐗᐨ ᐃᐡᑯᓂᑲᓂᐠ, ᐊᐎᔭ ᑲᑲᓄᓇᐨ ᔑᒪᑲᓂᔕᐣ ᒥᐌ ᐁᓯᓭᐠ ᐁᐯᔑᑯᐨ ᐊᐊᐌ ᔑᒪᑲᓂᐡ ᐁᐃᔕᐨ ᐃᐃᒪ ᑲᑭᐱᐅᒋᑭᑐᓇᓂᐗᐠ᙮ ᑲᐎᐣᑕᐡ ᐃᐃᐌ ᑎᓄᑲᐣ ᔑᒪᑲᓂᔑᑫᐎᐣ ᑲᓇᑕᐌᒋᑲᑌᐠ ᐃᐃᒪ ᑭᑕᔑᑫᐎᓂᓇᐣ᙮”
ᑭᔑᒋᐗᐣ ᓇᓇᑐᑭᑫᒋᑫᐎᐣ ᑭᐃᑭᑐᓇᓂᐗᓄᐸᐣ ᐃᓂᐌᓂᐗᐣ ᓂᔑᓇᐯ ᐊᐢᑭ ᔑᒪᑲᓂᔑᑫᐎᐣ ᐗᑲᐦᐃᑲᓇᐣ ᒋᑭᐊᓯᓂᐗᑭᐣ ᒥᓇ ᑲᑲᒐᑭᑌᐠ ᒋᐊᐸᒋᒋᑲᑌᑭᐣ, ᐁᔑᑭᑫᒋᑲᑌᐠ ᑲᒪᐡᑲᐗᑌᑭᐣ ᔑᒪᑲᓂᔑᐎᑲᒥᑯᐣ ᐁᐅᒋᑭᑫᑕᑯᐠ ᐁᑎᐱᐡᑯᓯᒋᑲᑌᐠ ᔑᒪᑲᓂᔑᑫᐎᐣ, ᒋᑭᒋᓀᑕᒧᐗᐨ ᔑᒪᑲᓂᔕᐠ ᐅᑕᓄᑭᐎᓂᐗ ᒥᓇ ᒋᑭᒋᓀᑕᒧᐗᐨ ᑲᐃᓇᓄᑭᐗᐨ᙮
ᑲᑭᐃᑭᑐᒪᑲᐠ ᐃᑭᑐᐎᐣ ᐃᓂᐌᓂᐗᐣ 19 ᑕᓯᐣ ᓂᔑᓇᐯ ᐊᐢᑭ ᔑᒪᑲᓂᔑᐎᑲᒥᑯᐣ ᐁᑲ ᑾᔭᐠ ᐁᑭᐃᔑᓇᑯᑭᐣ ᒋᑭᐃᔑᓇᑯᑭᐣ ᐗᑲᐦᐃᑲᓇᐣ ᒥᓇ ᐁᑲ ᐁᑕᑯᒋᑲᑌᑭᐣ ᑲᔭᑕᐌᔭᐸᐗᒋᑫᒪᑲᐠ᙮


Email to a Friend
qr code
add to del.icio.us

Stumble It!

Post new comment

Comment policy

All comments submitted to Wawatay News Online must have a correct name, location and email address of the user. Wawatay will not approve comments without the required information.

The approval of comments will also be subjected to relevancy, laws of defamation and good taste.

Once posted, comments become the property of Wawatay News. Wawatay News reserves the right to publish or use this comment in any way in the future for online use, in print, and by any other media at the discretion of Wawatay News.

The content of this field is kept private and will not be shown publicly.