view counter

ᑲᑭᒋᐱᒪᑫᐧᐸᐦᐃᑲᓂᐊᐧᐠ ᒪᑎᓭ ᐅᐅᐁᐧ ᑲᐱᒥᑯᓇᑲᐠ

Thursday February 14, 2013

ᐊᓂᔑᓂᓂᐃᐧ ᐊᐊᐧᔑᔕᐠ ᑲᐱᒪᑫᐧᐸᐦᐃᑫᐊᑲᓄᐊᐧᐨ

ᐅᐡᑭᑕᐸᐣ 2013 ᑲᑌᓴᐧᓇᑭᑎᔦᐨ ᑕᑲᑫᐧ ᐸᑭᓇᑲᓂᐊᐧᐣ ᐃᐃᐁᐧ ᒣᑲᐧᐨ ᐊᐊᐧᔑᔕᐠ ᐱᒪᑫᐧᐸᐦᐃᑫᐊᑲᓄᐊᐧᐨ ᑲᒐᑲᐧᑭᓯᐨ ᐱᓯᑦ ᐯᔑᑯᔕᑊ ᓀᐃᐧᐨ ᓂᓴᐧᓱᔕᑊ ᐃᓇᑭᓯᐨ ᐃᐃᒪ ᑐᕑᐊᑎᐣ᙮
ᔐᐳᓫᐁ ᑲᓇᑕ ᐸᑭᑎᓂᑫ ᑲᑌᓴᐧᓇᑭᑎᔦᓂᐨ ᐅᐡᑭᑕᐸᓇᐣ ᒥᐡᑯᐨ ᒋᑲᑫᐧᐸᑭᓇᑲᓂᐊᐧᓂᓂᐠ ᐃᑫᐧᓂᐊᐧᐠ ᐁᑕ ᑫᒥᑯᓇᑲᓄᐊᐧᐨ ᑕᑲᑫᐧᑕᑲᐧᐁᐊᐧᐠ᙮ ᐊᐱᑕᐦᐃᐧᓯᑲᐧᑦ ᑕᐅᒋ ᒪᒋᑕᐊᐧᐠ ᐁᑲᐧ ᓂᐃᐧᒥᒋᒐᐣ ᒥᓇ ᓂᔭᓄᒥᒋᒐᐣ ᑕᔭᐱᒐᓂ ᑫᐃᔑ ᑲᑫᐧᐱᓇᐦᐃᑫᐊᐧᐨ᙮ ᐁᐃᓇᓀᐤ ᐃᓯᓭᐠ ᐊᐣᑎᐱᑲᐠ ᐃᐡᑲᐧᔭᐨ ᐁᐱᒪᑫᐧᐸᐦᐃᑲᓂᐊᐧᐠ ᐃᐃᐁᐧᑭᔑᑲᐠ ᐊᒥᐁᐧ ᐸᐢᑲᐣ ᑫᑐᒋᑲᑌᐠ ᐊᒪᐧᔦ ᑭᒋᒧᓀᐃᐦᑲᓂᐊᐧᐠ᙮ ᓂᓴᐧᓱ ᒥᑕᓇ ᓴᑲᓱᔕᑊ ᒪᒪᐤ ᑕᓴᐧ ᑕᒧᓀᐅᑎᐊᐧᐠ ᐁᑲᐧ ᐯᔑᑯᔕᑊ ᐃᓇᑭᓯᐨ ᑲᑕᑲᐧᑭᓯᐨ ᑕᐅᒋᒪᒋᑕᐊᐧᐠ᙮ ᐊᐊᐧᔑᒣ ᓂᐦᓱᒥᑕᓇ ᑲᐃᔑ ᑕᑎᐸᓂᓯᐊᐧᐨ ᐅᐱᒪᑫᐧᐸᐦᐃᑫᐠ ᑕᒧᓀᐅᑎᐊᐧᐠ ᐁᑲᐧ ᓂᔑᐣ ᐱᒪᑕᐦᐁᐃᐧᓇᐣ ᑕᔭᐸᑕᓄᐣ᙮ ᑭᔭᑦ ᐱᑯ ᓂᐃᐧᐣ ᐸᑲᐣ ᐊᐃᐧᔭᐣ ᐅᑲᑭᐃᐧᒋᐦᐃᑯᐊᐧᐣ ᐅᑫᐧᓂᐊᐧᐠ ᑲᔭᑲᔐᔑᐊᐧᐨ ᐁᑲᐧ ᑲᒥᑎᑎᐊᐧᐨ ᑭᔭᑦ ᐱᑯ ᓂᔑᐣ ᐸᑲᐣ ᐊᐃᐧᔭᐣ᙮ ᓂᔭᓄᔕᑊ ᐃᓇᑭᓯᐨ ᐁᑲᐧ ᐯᔑᑯᔕᑊ ᒥᓇᐱᑕ ᐃᓯᓭᐠ ᑕᐃᔑ ᒪᒋ ᓴᓴᑭᑕᑯᐁᐧᐸᐦᐅᑎᐊᐧᐠ᙮

ᑲᑭᒋᐱᒪᑫᐧᐸᐦᐃᑫᐊᐧᐨ ᑭᐁᐧᑎᓄᐠ ᑕᔑᑫᐃᐧᓇᐣ ᑲᑕᑲᐧᑭᐣ

ᐅᐅᐁᐧ ᑭᒋᐱᒪᑫᐧᐸᐦᐃᑫᐃᐧᐣ ᒥᓇ ᒪᒋᒋᑲᑌ ᐅᐅᐁᐧ 2013 ᑲᔭᑭᐊᐧᐠ ᐁᑲᐧ ᐳᑕᓇᐠ ᐅᑭᒋᐱᒪᑫᐧᐸᐦᐃᑫᐃᐧᓂᐊᐧᐠ ᐁᐧᐣ ᐸᐦᐊᐱᐨ ᒥᓇ ᑕᐧᒪᐢ ᐃᐡᑎᐣ ᑕᐱᔕᐊᐧᐠ᙮ “ᐅᐅᐁᐧ ᐱᑯ ᒍᒋᒪᒧᐣᒋᑫᐣᑕᑲᐧᐠ ᒥᓇ ᐱᑯ ᐊᐧᐃᐧᔭᐠ ᒋᑕᔑᐱᔕᐊᐧᐨ,” ᐃᑭᑐ ᓫᐊᐸᐧᐟ ᑲᑭᑫᑲᒥᐠ ᐊᒪᐧᐁᐧ ᐱᔑᐠ ᑲᐊᓄᑲᑕᐠ ᓀᑲᐃᐧᓴᑲᐦᐃᑲᓂᐠ ᐅᒋ᙮ “ᓂᐡᑕᑦ ᒥᐢᑯᓴᑲᐦᐃᑲᓂᐠ ᐅᐅᐁᐧ ᑭᒋᐱᒪᑕᐦᐁᐃᐧᐣ ᑭᐅᒋᒪᒋᒋᑲᑌᐸᐣ ᐁᐧᐡᑲᐨ ᐳᑕᓇᐠ ᓇᐣᑕ ᐱᑯ 1960’s ᑲᔭᑭᐊᐧᐠ᙮ ᐊᐧᓂᓇᐊᐧᑲᐠ ᐊᐱᐣ ᑭᐃᔑ ᐊᑎᓂᑲᑌᐸᐣ᙮ ᒥᑕᓱᔭᑭ ᐅᑕᓇᐠ ᐊᐱᐣ ᑕᐣᑕᐯ ᑲᑭᐃᔓᒋᑲᑌᑭᐸᐣ ᐁᑲᐧ ᓇᐱᐨ ᐊᒋᓇᐃᐧᐢ ᑭᒣᑕᐊᐧᓂᐊᐧᓄᐸᐣ ᐊᐱᐣ ᑲᑭᑭᐱᒋᓭᑭᐸᐣ᙮” ᓂᔑᑕᓇ ᓂᐃᐧᔕᑊ ᐊᔕ ᓇᑯᑕᒥᐊᐧᐠ ᐅᐅᐁᐧ ᐁᐃᓇᓀᐤ ᑲᑭᓇᑭᓯᐨ ᑲᑕᑲᐧᑭᓯᐨ ᐱᓯᑦ ᐁᑲᐧ ᒪᔭᑦ ᐯᔑᑯᔕᑊ ᓀᐃᐧᐨ ᓂᑯᑕᐧᓱᔕᑊ ᒥᑭᓯ ᐱᓯᑦ ᑲᐃᐧᔑᒣᑕᐊᐧᓂᐊᐧᐠ᙮ ᐅᑐᓇᒋᑫᐠ ᓂᔑᑕᓇ ᐁᐃᓇᓀᐃᐧᔕᑊ ᐅᓇᑕᐁᐧᓂᒪᐊᐧᐣ ᐅᐱᒪᑫᐧᐸᐦᐃᑫᐣ ᐊᔕ $65,000 ᐊᔭ ᒪᒪᐤ ᔓᓂᔭᐣ ᑫᔭᐸᑎᓯᐨ᙮ $25,000 ᑕᒥᓇᑲᓄᐊᐧᐠ ᑲᑭᒋᐸᑭᓇᑫᐊᐧᐨ ᐁᑲᐧ $15,000 ᑲᐸᑭᓇᐃᐧᑕᐧ᙮ $10,000 ᑕᒥᓇᑲᓄᐊᐧᐠ ᑭᓂᐊᓂᑫ ᐸᑭᓇᑫᐊᐧᐨ ᐁᑲᐧ $7,000 ᑲᐸᑭᓇᐃᐧᑕᐧ᙮ $5,000 ᑕᒥᓇᑲᓄᐊᐧᐠ ᒪᐊᐧᐨ ᒐᐸᔑᐡ ᑲᐸᑭᓇᑫᐊᐧᐨ ᐁᑲᐧ $3,000 ᑲᐸᑭᓇᐃᐧᑕᐧ᙮ ᑎᑭᓇᑲᓂᐤ ᐃᐡᑯᓂᑲᓇᐣ ᐁᑕ ᑕᐸᑭᑎᓇᑲᓄᐊᐧᐠ ᒋᒧᓀᐃᑫᐊᐧᐨ ᑕᐱᐡᑯᐨ ᐅᑫᐧᓂᐊᐧᐠ ᐅᑕᓇᐠ ᑲᑭᐱᒧᓀᐅᑎᐊᐧᐸᐣ᙮ ᑲᐃᐧᒧᓀᐅᑎᐊᐧᐨ ᐊᐦᐃᐠ ᒍᒋᑎᐯᓂᑕᑯᓯᐊᐧᐨ ᐅᑎᐡᑯᓂᑲᓂᐊᐧᐠ ᒥᓇ ᐱᑯ ᐃᐃᒪ ᒋᐃᔑᑲᐯᔑᐊᐧᐨ᙮ ᑭᔭᑦ ᐱᑯ ᑲᔭ ᐊᐧᓴ ᑲᐅᑕᒥᐡᑯᓄᐊᐧᐨ ᒥᓇ ᐸᑲᐣ ᑲᑕᓇᓄᑭᐊᐧᐨ ᔕᑯᐨ ᐱᑯ ᐅᑎᐡᑯᓂᑲᓂᐊᐧᐠ ᒍᒋᑎᐯᓂᑕᑯᓯᐊᐧᐨ ᑕᐸᑭᑎᓇᑲᓄᐊᐧᐠ ᒋᒧᓀᐃᑫᐊᐧᐨ᙮ “ᔕᑯᐨ ᔕᐊᐧᓂᐃᐧ ᐅᐱᒪᑕᐦᐁᐠ ᑲᐃᐧᐣ ᑕᑭᒧᓀᐃᑫᓯᐊᐧᐠ ᑕᐱᐡᑯᐨ ᐅᑫᐧᓂᐊᐧᐠ ᑫᑲᐟ ᑲᑭᑌᐱᓇᒥᐊᐧᐨ ᒪᐊᐧᐨ ᑲᐃᐡᐸᐠ ᑭᒋᐱᒪᑫᐧᐸᐦᐃᑫᐃᐧᐣ,” ᐃᑭᑐ ᑲᑭᑫᑲᒥᐠ᙮ “ᑲᐧᓂᐣ ᒋᒥᓂᓴᐦᐃᑯᐊᐧᐨ ᐁᑫᐧᓂᐊᐧᐠ ᑭᐁᐧᑎᓄᐠ ᑲᑲᐯᔑᐊᐧᐨ ᐅᓴᑦ ᐁᓇᐃᓂᐨ ᔕᐊᐧᓄᐠ ᑲᐅᒋᓂᐨ᙮” ᑲᑭᑫᑲᒥᐠ ᐃᑭᑐ ᒪᐊᐧᐨ ᑕᒥᓀᐣᑕᒥᐊᐧᐠ ᑭᐁᐧᑎᓄᓂᐊᐧᐠ ᒧᓀᐃᐧᑎᐊᐧᐨ ᒥᓇ ᐱᑯ ᒋᑲᓇᐊᐧᐸᒪᑲᓄᐊᐧᐨ᙮

ᑭᐁᐧᑎᓄᐠ ᐊᓂᔑᓇᐯᐃᐧ ᑭᒋᐱᒪᑫᐧᐸᐦᐃᑫᐃᐧᐣ

ᓂᐦᓱᔕᐱᔭᑭ ᐊᔕ ᐅᐅᐁᐧ ᐅᒋᑭᒋᐱᒪᑫᐧᐸᐦᐃᑲᓂᐊᐧᐣ ᐁᑲᐧ ᒥᑭᓯ ᐱᓯᑦ ᐯᔑᑯᔕᑊ ᓀᐃᐧᐨ ᓂᓴᐧᓱᔕᑊ ᐃᓇᑭᓯᐨ ᐃᔓᓇᑌ ᒋᐃᔑᒣᑕᐊᐧᓂᐊᐧᐠ᙮ ᓂᐦᓱᔕᑊ ᐊᔕ ᐅᓇᑯᑕᓇᐊᐧ ᐁᐃᐧᐱᔕᐊᐧᐨ ᐃᐃᐁᐧ ᒥᑲᐧᐨ ᓴᑲᓱ ᑲᐃᓇᑭᓯᐨ ᑲᑕᑲᐧᑭᓯᐨ ᐱᓯᑦ᙮ ᑲᐅᓇᑐᐊᐧᐨ ᓂᐦᓱᒥᑕᓇ ᓂᔓᔕᑊ ᐅᓇᑕᐁᐧᓂᒪᐊᐧᐣ ᒋᐱᒧᓀᐃᑫᓂᐨ ᐊᔕ $44,000 ᒥᓂᑯᐠ ᐊᔭ ᔓᓂᔭᐣ ᑫᔭᐸᑎᓯᐨ᙮ $18,000 ᑕᒥᓇᑲᓄᐊᐧᐠ ᑲᑭᒋᐸᑭᓇᑫᐊᐧᐨ ᐁᑲᐧ $12,000 ᑲᐸᑭᓇᐃᐧᑕᐧ᙮ $5,000 ᑕᒥᓇᑲᓄᐊᐧᐠ ᑭᓂᐊᓂᑫ ᐸᑭᓇᑫᐊᐧᐨ ᐁᑲᐧ $4,000 ᑲᐸᑭᓇᐃᐧᑕᐧ᙮ $3,000 ᑕᒥᓇᑲᓄᐊᐧᐠ ᒪᐊᐧᐨ ᒐᐸᔑᐡ ᑲᐸᑭᓇᑫᐊᐧᐨ ᐁᑲᐧ $2,000 ᑲᐸᑭᓇᐃᐧᑕᐧ᙮ ᐅᐱᔑᑯᑲᐃᐧᓂᐊᐧᐠ ᐅᑭᐸᑭᓇᐊᐧᐊᐧᐣ ᒥᒋᑲᓂᓴᑲᐦᐃᑲᓂᐃᐧᓂᐊᐧᐣ ᐅᑕᓇᐠ ᑲᑭᔭᑭᐊᐧᐠ ᐁᑲᐧ ᒥᓇ ᓀᑲᐃᐧᓴᑲᐦᐃᑲᓂᐃᐧᓂᐊᐧᐠ ᐅᑭᐸᑭᓇᐊᐧᐊᐧᐣ ᐃᔭᐱᒪᑐᓂᐊᐧᐣ᙮ ᐁᑲᐧ ᐱᒪᒋ ᐅᑭᐸᑭᓇᐊᐧᐊᐧᐣ ᐱᑲᐣᒋᑲᑦ ᒧᐢ᙮ ᐁᑲᐧ ᐊᐊᐧᓯ ᐱᐳᓂᐠ ᐅᐱᔑᑯᑲᐃᐧᓂᐊᐧᐠ ᒥᓇ ᑭᐸᑭᓇᑫᐸᓂᐠ ᐁᐦᐊᐣ ᐅᑭᐸᑭᓇᐊᐧᐊᐧᐣ ᐃᔭᐱᒪᑐᓂᐊᐧᐣ᙮ ᐱᑲᐣᒋᑲᑦ ᐅᑭᐸᑭᓇᐊᐧᐸᓂᐣ ᐅᐱᔑᑯᑲᐃᐧᓂᐊᐧᐣ 2010 ᑲᔭᑭᐊᐧᐠ᙮ ᐃᔭᐱᒪᑐᓂᐊᐧᐠ ᐅᑭᐸᑭᓇᐊᐧᐸᓂᐣ ᐅᐱᔑᑯᑲᐃᐧᓂᐊᐧᐣ 2009 ᑲᔭᑭᐊᐧᐠ᙮


Email to a Friend
qr code
add to del.icio.us

Stumble It!

Post new comment

Comment policy

All comments submitted to Wawatay News Online must have a correct name, location and email address of the user. Wawatay will not approve comments without the required information.

The approval of comments will also be subjected to relevancy, laws of defamation and good taste.

Once posted, comments become the property of Wawatay News. Wawatay News reserves the right to publish or use this comment in any way in the future for online use, in print, and by any other media at the discretion of Wawatay News.

The content of this field is kept private and will not be shown publicly.