view counter

ᐊᐣᒋᑲᓀᑊ ᑭᐃᓄᐦᐊᑲᓀ ᑭᑭᓇᐗᑕᑭᒪᑲᓀ ᐅᐅᒪ ᑲᓇᑕ

Wednesday January 16, 2013
Lac Seul’s Garnet Angeconeb received the Order of Canada on Dec. 30.

ᐅᐱᔑᑯᑲᐣᐠ ᑲᐅᒋᐨ ᑲᕒᓀᐟ ᐊᐣᒋᑲᓀᑊ ᑭᐃᓄᐦᐊᑲᓀ ᑭᑭᓇᐗᑕᑭᒪᑲᓀ ᐅᐅᒪ ᑲᓇᑕ ᐁᓂᓯᑕᐎᓂᑲᑌᓂᐠ ᒥᔑᓄᐊᐦᑭ ᐁᒧᑕᓄᑭᑕᒪᑫᐨ᙮
“ᒪᐗᐨ ᑭᒋ ᐃᓀᐣᑕᐣ - ᒪᐗᐨ ᑭᑯᐡᑯᐎᓂᑯ,” ᐃᑭᑐ ᐊᐣᒋᑲᓀᑊ, ᐁᑭᐃᓄᐦᐊᑲᓀᐨ ᒋᑕᑯᑭᒪᑲᓀᐨ ᐃᐃᒪ ᑲᐃᔑᑭᑭᓄᐦᐊᒋᑲᓀᐨ ᑲᓇᑕ ᑎᓭᒼᐳᕒ 30, 2012᙮ “ᒥᓂᑯᐠ ᐃᑯ ᑲᐅᒋᐱᒪᑎᓯᔭᐣ ᑕᓄᑭᑕᐗᐠ ᐊᓂᔑᓇᐯᐠ ᒥᓇ ᒪᐗᐨ ᑭᒋ ᐃᓀᐣᑕᐣ, ᐊᐗᔑᒣ ᐁᑭᐊᓂᑭᒋᓀᐣᑕᒪᐣ ᐊᐸᐣ ᑲᑭ ᐅᒥᔓᒥᒪᔭᐣ᙮ ᐁᑲᑴᒋᒥᑎᓱᔭᐣ ᐁᑯᓀᐣ ᐃᐃᒪ ᐁᑕᑯᐠ ᑕᓂᑯᐱᒋᑲᓇᐠ ᐅᐣᒋ, ᐁᑯᓀᐣ ᐅᓂᑲᓂᒥᐗ ᐁᓇᑲᑕᒪᐗᔭᐠ᙮”
ᐊᐣᒋᑲᓀᑊ ᑭᓂᓯᑕᐎᓂᑲᑌᓂ ᐅᑕᓄᑭᐎᐣ ᑲᑭᐸᑭᑎᓇᐠ ᐃᐃᒪ ᐅᑕᔑᑫᐎᓂᐠ, ᐁᑭᐊᓄᑭᑕᐠ ᒋᐎᒋᐎᑎᓂᐨ ᐊᓂᔑᓇᐯᐣ ᒥᓇ ᐌᒥᑎᑯᔑᐗᐣ ᒥᓇ ᐁᑭᑲᐣᒋᓂᔕᐦᐊᐠ ᐊᓂᔑᓂᓂᐤ ᐱᒪᑎᓯᐎᐣ ᐃᔑᒋᑫᐎᓇᐣ᙮
“ᑲᕒᓀᐟ ᑭᑭᒋᐎᒋᑐ ᑲᑭᑲᐣᒋᓂᔕᐦᐃᑲᑌᐠ ᐌᐡᑲᐨ ᑲᑭᐱᑭᑭᓂᒪᐗᑲᓀᐗᐨ ᒋᑎᐸᐦᐊᒪᐗᑲᓉᐗᐨ ᒥᓇ ᑲᓇᑕ ᒋᐎᑕᐠ ᐅᒧᔑᑐᐎᐣ,” ᐃᑭᑐ ᑭᒋᐅᑭᒪᑲᐣ ᐦᐊᕒᐱ ᔦᓯᓄ᙮ “ᐅᑕᓄᑭᐎᐣ ᓂᓯᑕᐎᓂᑲᑌᓂ ᒥᓇ ᒪᐗᐨ ᑭᒋᓀᒋᑲᑌᓂ ᐅᐅᒪ ᐊᓂᔑᓇᐯ ᐊᐢᑭ ᐊᓂᔑᓇᐯᐠ ᒥᓇ ᑲᑭᓇ ᐊᓂᔑᓂᓂᐗᐠ ᒥᓯᑌᑲᒥᐠ ᑲᓇᑕ᙮ ᐎᐣᑫ ᑌᐺ ᐱᒪᑎᓯᐎᓂᑫ ᒥᓇ ᓂᑲᓂᐢᑲᒪᑫ᙮”
ᐊᐣᒋᑲᓀᑊ ᑫᐎᐣ ᑭᑕᑯᐱᐸᐣ ᑲᑭᒪᑕᓄᑭᒋᑲᑌᐠ ᐗᓂᓇᐗᑲᐣᐠ ᒪᔦᑭᐃᔑᓂᑲᒋᑫᐎᐣ ᐊᐱᐎᐣ, ᒥᓇ ᐁᑕᑯᓯᐠ ᐗᓂᓇᐗᑲᐣᐠ ᐎᑕᓄᑭᒥᑎᐎᐣ ᑲᒥᓄᔭᒋᑫᓇᓂᐗᐠ ᒥᓇ ᑲᒥᓄᐎᓀᒋᑫᓇᓂᐗᐠ ᑲᐃᔑᑕᑶᐗᐨ ᐌᐠᑲᐨ ᑲᑭᐱᑭᑭᓄᒪᐗᑲᓀᐗᐨ ᒥᓇ ᐅᑎᐯᓂᒪᑲᓀᐗᐣ᙮ ᒥᓇ ᓄᑯᒥᑫ ᐅᑭᐅᔑᑐᐣ ᐃᐃᒪ ᐱᐗᐱᑯᐠ, href="http://www.garnetsjourney.com" title="www.garnetsjourney.com" rel="nofollow">www.garnetsjourney.com, ᔭᐎᔭᐠ ᒋᐅᒋ ᐎᒋᐦᐃᑎᐗᐨ ᒥᓇ ᒋᐊᓂᒧᑕᒧᐗᐨ ᐌᐡᑲᐨ ᑲᑭᐱ ᑭᑭᓄᒪᐗᑲᓀᐗᐨ ᐊᐗᔑᔕᐠ ᐃᓯᓭᐎᓇᐣ᙮
ᐊᐣᒋᑲᓀᑊ ᐃᑭᑐ ᑲᔭᓂᒧᒋᑲᑌᐠ ᑲᑭᔑᐗᓂᑐᑕᐗᑲᓀᐗᐨ ᐊᐗᔑᔕᐠ ᑲᑭᐱᑭᑭᓄᒪᐗᑲᓀᐗᐨ ᓴᓇᑫᑕᑯᐣ ᔭᐎᔭ ᑲᐃᔑ ᐯᔑᑯᐨ᙮
“ᐊᓂᐣᑕ ᔭᐎᔭᐠ ᑲᐃᔑᐯᔑᑯᐗᐨ ᑭᐅᓀᐣᑕᒧᐗᐠ ᒋᐊᓂᔑᐱᒪᑎᓯᐗᐨ, ᑭᒋ ᐃᓀᐣᑕᑯᐣ ᐅᐅᐌ - ᓂᓂᓯᑕᐌᐣᑕᐣ ᒥᓇ ᑭᒋᓀᐣᑕᐣ ᐃᐃᐌ ᑲᐃᔑ ᐸᑯᓭᓂᒧᐗᐨ,” ᐊᐣᒋᑲᓀᑊ ᐃᑭᑐ᙮ “ᐁᑯᒥᓇ ᓂᓂᓯᑕᐌᐣᑕᐣ ᒥᓇ ᓂᐎᒋᑲᐸᐌᑕᐣ ᐃᑭᐌᓂᐗᐠ ᑲᒪᔑ ᑲᑲᐎᐣᑕᒧᐗᐨ ᑲᑭᐱᑐᑕᐗᑲᓀᐗᐨ᙮ ᒥᐌ ᐁᓀᐣᑕᒪᐣ ᐁᑭᒋᓀᐣᑕᑯᐠ ᒋᑭᑫᐣᒋᑲᑌᐠ ᐁᑲ ᐁᐯᔑᑯᐠ ᒋᒥᓄᒋᑲᑌᐠ ᐃᐃᐌ ᒪᐗᐨ ᐌᐡᑲᐨ, ᒥᓇ ᑲᓴᓇᑭᓭᐠ ᐃᓯᓭᐎᓇᐣ ᑲᓇᑭᐡᑲᒧᐗᐨ ᑭᑕᓂᔑᓂᓂᒥᓇᐣ ᑲᐃᔑᐊᓂᑯᐱᒪᑎᓯᓇᓂᐗᐠ᙮”
ᐊᐣᒋᑲᓀᑊ ᐃᑭᑐ ᐊᓂᔑᓂᓂᐗᐠ ᐁᐯᐸᑲᓂᓭᓂᐠ ᑲᔭᐱᓯᑲᐗᐨ ᑲᑲᑴᒥᓄᐗᒋᐦᐃᑎᓱᐗᐨ᙮ “ᐊᓂᐣᑕ ᔭᐎᔭᐠ ᑭᒋᐊᓄᑭᐗᐠ ᐁᑲᑴᒥᓄᐗᒋᐦᐃᑎᓱᐗᐨ, ᒥᓇ ᐊᓂᐣᑕ ᔭᐎᔭᐠ ᐱᒋᓇᐠ ᐁᒪᒥᑯᐡᑲᑯᐗᐨ ᑲᑭᐱᓯᓭᐗᐨ ᐌᐡᑲᐨ,” ᐊᐣᒋᑲᓀᑊ ᐃᑭᑐ᙮ “ᑲᑭᑲᑴ ᒪᒐᒥᐣ ᐅᐅᐌᑎ ᓂᑲᓂᐠᒥᓇ ᒋᐗᐎᒋᐦᐃᑎᔭᐠ᙮ ᓂᐎᑲᐣᒋᓂᔕᐦᐊᐣ ᒋᑲᑴᒥᓄᐗᒋᐦᐃᑎᓱᔭᐠ᙮ ᑭᒥᓋᔑᐣ ᑭᑕᓄᑭᐎᓂᓇᐣ ᐅᐅᐌᑎ ᐅᑕᓇᐠ ᒥᑕᓱ ᒥᓇ ᓂᔑᑕᓇ ᑕᓱᔭᑭ: ᑲᑭᑲᑴ ᓂᑲᐣ ᐃᓇᐱᒥᐣ ᒋᐊᓂᐱᒧᓭᔭᐠ ᔕᑯᐨ ᒋᑭᑫᐣᑕᑯᐠ ᐁᓇᑭᐡᑲᒋᑲᑌᐠ ᑲᐊᓂᑯᐱᒪᑎᓯᐗᐨ ᐊᓂᔑᓂᓂᐗᐠ᙮ ᑲᑭᐱᒥᐊᓄᑭᒥᐣ ᒋᑲᐡᑭᒋᑲᑌᑭᐣ ᒥᓇ ᒋᐅᓇᒋᑲᑌᑭᐣ ᑫᐅᒋᒥᓄᔭᐨ ᔭᐎᔭ, ᒋᒧᓄᔭᒪᑲᑭᐣ ᑭᑕᔑᑫᐎᓂᓇᐣ ᒥᓇ ᒋᒥᓄᔭᒪᑲᑭᐣ ᑭᑕᓂᔑᓂᓂᐤ ᑎᐯᒋᑫᐎᓇᐣ᙮”
ᐊᐣᒋᑲᓀᑊ ᐃᑭᑐ ᑫᑐᒋᑲᑌᐠ ᐅᓂᓯᑕᐎᓇᑯᐎᐣ ᐃᐃᒪ ᑭᑭᓇᐗᑕᑭᒥᑯᐎᐣ ᑲᓇᑕ ᑲᑭᐃᓄᐦᐊᑲᓀᐨ ᑕᐃᔑᑐᒋᑲᑌ ᐅᐅᐌ ᑫᐊᓂᓂᐱᐠ᙮
“ᐅᐅᐌ ᑲᑲᓇᐗᐸᑕᒪᐣ ᑭᑭᓇᐗᒋᒋᑲᐣ ᑲᐎᐣ ᑕᑭ ᐅᒋ ᐃᓯᓭᓯᐸᐣ ᑭᐡᐱᐣ ᐁᑲ ᔭᐎᔭᐠ ᐗᐎᒋᐦᐃᔑᐗᑯᐸᓀᐣ,” ᐊᐣᒋᑲᓀᑊ ᐃᑭᑐ᙮ “ᐅᐅᐌᑕᐡ ᐃᓯᓭ, ᑲᑭᓇ ᔭᐎᔭ ᑲᑭᐱᐎᑕᓄᑭᒪᐠ ᐅᐅᒪ ᑕᐎᓂᐠ, ᒥᓇ ᑲᐅᒋᑎᐯᐣᒋᑫᔭᐠ ᒥᓇ ᒥᓯᑌᑲᒥᐠ ᑲᓇᑕ, ᑲᑭᑕᑯᑭᒪᐠ ᑫᐎᓇᐗ ᑲᑭᑭᓇᐗᒋᐦᐊᐠ ᑫᐎᓂᐗ᙮ ᑲᑭᐎᒋᐎᑯᐠ ᐃᑕᐡ ᐅᐅᐌ ᑭᑭᓇᐗᒋᒋᑫᐎᐣ᙮”
ᒥᐅᐌ ᐯᔑᐠ ᑭᑭᓇᐗᒋᒋᑫᐎᐣ ᑲᓇᑕ ᑲᐃᐡᐸᑭᐣᑕᐠ, ᑭᑭᓇᐗᑕᑭᐣᒋᑲᐣ ᐅᐅᒪ ᑲᓇᑕ ᑭᒪᒋᐊᐸᒋᒋᑲᑌ 1967, ᒣᑾᐨ ᑲᓇᑕ ᑲᑎᐱᐡᑲᒧᒪᑲᐠ ᒥᑕᓱᒥᑕᓇ ᑕᓱᔭᑭ, ᒋᓂᓯᑕᐎᓂᑲᑌᑭᐣ ᔭᐎᔭ ᒥᓂᑯᐠ ᑲᐱᒪᑎᓯᐨ ᑲᐃᔑᐗᐎᒋᑐᐨ ᐊᓄᑭᐎᓇᐣ ᑲᑲᑎᐸᐦᐊᒪᐗᑲᓀᐨ ᔭᐎᔭ, ᑲᐃᔑ ᑭᒋᐃᓀᐣᑕᐠ ᐅᑕᔑᑫᐎᐣ ᒥᓇ ᑲᑭ ᐃᔑᐗᐎᒋᑐᐨ ᐅᐎᑕᓂᔑᓂᓂᒪᐣ᙮ ᐊᐗᔑᒣ 5,000 ᐊᓂᔑᓂᓂᐗᐠ ᑲᑭᓇ ᑲᐃᓇᑲᓀᓯᐗᐨ ᐃᓂᓂᐗᐠ ᐊᔕ ᑕᑯᓇᐗᐠ ᐃᐃᒪ ᑭᑭᓇᐗᒋᒋᑫᐎᐣ ᒥᓂᑯᐠ ᑲᑭᒪᒋᓭᐠ ᐅᐅᐌ 1967᙮


Email to a Friend
qr code
add to del.icio.us

Stumble It!

Post new comment

Comment policy

All comments submitted to Wawatay News Online must have a correct name, location and email address of the user. Wawatay will not approve comments without the required information.

The approval of comments will also be subjected to relevancy, laws of defamation and good taste.

Once posted, comments become the property of Wawatay News. Wawatay News reserves the right to publish or use this comment in any way in the future for online use, in print, and by any other media at the discretion of Wawatay News.

The content of this field is kept private and will not be shown publicly.