Click for more information.
view counter

ᑕᐧᕑᐃᐢ ᓯᓫᐃᐳᕑᒐᐠ ᑲᑫᐧᐃᔑᐱᒪᑎᓯ ᑲᐃᔑᐊᑲᐊᐧᑕᐠ ᒋᐃᔑᓇᑲᐧᓂᐠ

Wednesday February 29, 2012
ᐊᒥ ᐁᑲᐧ

ᐊᐱ ᑲᐃᐡᑲᐧ ᑭᔕᑌᓭᐠ ᒥᓇ ᐁᑭ ᑭᐁᐧ ᐊᐧᑌᓂᑲᑌᐠ ᐊᐧᐢᑌᓂᑲᓇᐣ, ᐊᒥ ᐁᑲᐧ ᑲᑭᓂᐸᐃᐧᐨ ᑕᐧᕑᐃᐢ ᓯᓫᐃᐳᕑᒐᐠ ᐁᑭᐊᓴᒥᑲᐸᐃᐧᑕᐊᐧᐨ ᐁᐅᑲᐧᐱᐊᐧᐨ ᐅᐡᑲᑎᓴᐠ ᑲᑭᐱᒪᒪᐃᐧᐡᑲᐊᐧᐨ ᑌᑎᐸᐦᐃ ᐅᐣᑌᕑᐃᔪ ᐁᑭᐅᐣᓭᐊᐧᐨ.
“ᐊᒥ ᐁᑫᐧᓇᐠ ᐁᑭᑌᐯᐧᔭᐣ ᑫᑯᐣ ᑲᐃᑭᑐᔭᐣ ᐁᑲᐧ ᑲᐃᐧᐣ ᐃᐧᑲ ᐣᑲᑭᐅᒋᑲᐡᑭᑐᐣ ᐅᐁᐧ ᒋᑐᑕᒪᐣ ᓂᑭᐃᓀᑕᓇᐸᐣ,” ᑭᐃᑭᑐ 23 ᐁᑕᓱᔭᑭᐃᐧᓀᐨ ᐁᑭᔭᓂᒧᑕᐠ ᑲᑭᐃᐡᑲᐧ ᑲᓇᐊᐧᐸᑕᒧᐊᐧᐨ ᑲᑭᒪᓯᓇᑌᔑᒪᑲᓄᐨ. “ᒪᐊᐧᐨ ᐊᑯ ᐣᑭᓇᓀᐯᐃᐧᐢ, ᒥᓇ ᐣᑭᐃᔑᓇᑯᑐᐣ ᐣᐱᒪᑎᓯᐃᐧᐣ ᐁᑭ ᑭᐸᐦᐅᑎᓱᔭᐣ.”
ᐊᒋᓇ ᑭᑭᐱᒋ, ᒥᓇᐊᐧ ᑭᔭᓂ ᒪᒋᐊᔭᒥ, ᐁᑭᓂᓂᐣᑭᐁᐧᐨ.
“ᓂᒪᒪᑲᑌᑕᐣ ᐅᐁᐧ ᑲᔭᓂᔑᐊᐧᐸᑕᒪᐣ ᒋᔭᓂᔑᓇᐧᑲᐠ ᐣᐱᒪᑎᓯᐃᐧᐣ, ᐃᐁᐧ ᐅᑎ ᒪᐊᐧᐨ ᑲᔭᓂᒪᑭᐣ ᑫᑯᓇᐣ ᐁᑭᐱᓇᓇᑭᐣᑲᒪᓂᐣ. ᑲᐃᐧᐣ ᐃᐧᑲ ᒋᑭᐅᒋ ᐃᓀᑕᒪᐣ ᒥᓄᑫᑯᐣ ᒋᐅᑎᓯᑯᔭᐣ.”
ᑲᐃᔑᓇᑕᐁᐧᑕᒪᐣ ᒋᐃᔑᓇᑲᐧᐠ ᑭᐱᒪᑎᓯᐃᐧᐣ: ᐅᐡᑭᓂᑭᑫᐧ ᑲᑭᐱᔭᓂᒥᐦᐃᑯᐨ ᑲᑌᓂᒥᑯᐨ ᒪᐡᑭᑭᑫᐃᐧᐣ ᑭᒪᓯᓇᑌᓯᒋᑲᑌᐸᐣ ᐃᒪ ᐅᐡᑲᑎᓴᐠ ᓂᑲᐣ ᐅᐣᒋ ᒪᐊᐧᒋᐦᐃᑐᐃᐧᐣ ᒣᑲᐧᐨ ᑭᔐᐱᓯᑦ 9 ᑲᐃᓇᑭᓱᐨ ᐁᐧᑎ ᑕᐣᑐᕑ ᐯ. 34 ᑕᓱᑎᐸᐦᐃᑲᓀᐢ ᒪᓯᓇᑌᓭ, ᐁᑲᐧ ᐅᑭᐅᔑᑐᓇᐊᐧ ᐊᐧᓂᓇᐊᐧᑲᐠ ᐊᓂᔑᓇᐯ ᒪᐡᑭᑭᐃᐧᑭᒪᐃᐧᐣ ᐁᑲᐧ ᐅᑭᒪᓯᓇᑌᓯᑐᓇᐊᐧ ᑕᐣᑐᕑᐢᑐᐣ ᐅᒪᓯᓇᑌᓯᒋᑫᐠ, ᐅᑭᑎᐸᑐᑕᓇᐊᐧ ᑕᐧᕑᐃᐢ ᑲᐱᒥᐊᓂᒥᐦᐃᑯᐨ ᑲᑎᐯᓂᒥᑯᐨ ᐅᒪᐡᑭᑭᑫᐃᐧᐣ ᒥᓇ ᑲᑭ ᓇᓇᑐᓇᐨ ᒋᐃᐧᒋᐦᐊᑲᓄᐨ.
ᐸᐸᑭ ᑭᐊᔭᑲᐃᐧ ᐱᒥᑕᑎᐸᒋᒧ ᒥᓇ ᑭᐱᒥ ᒪᒪᓯᓇᑌᔑᒪ ᑲᐱᒥᑎᐸᒋᒧᐨ, ᐊᐧᐁᐧ ᑕᐧᕑᐃᐢ ᐅᑭᐊᐧᐃᐧᐣᑕᐣ ᑲᑭᐊᐃᐣᑐᑕᑯᐨ ᑲᑎᐯᓂᒥᑯᐨ ᐅᒪᐡᑭᑭᑫᐃᐧᐣ ᒥᓇ ᐊᓂᐣ ᐁᓯᓴᐦᐃᑯᐨ, ᓂᐦᓯᐣ ᐅᑕᐊᐧᔑᔑᒪᐣ, ᐁᑲᐧ ᒥᓇ ᒪᐊᐧᐨ ᐃᑯ ᒥᓯᐁᐧ ᐅᐁᐧᓂ ᐁᑎᐯᓂᒥᑯᐊᐧᐨ ᐅᑕᔑᑫᐃᐧᓂᐠ ᐃᒪ ᐊᐸᒪᑐᐠ.
ᑕᐧᕑᐃᐢ ᑭᔭᐱᐨ ᑲᓄᑫ ᒪᐊᐧᐨ ᓂᐢᑕᑦ ᐁᑲᓇᐊᐧᐸᑕᐠ ᐅᒪᓯᓇᑌᔑᒥᑯᐃᐧᐣ.
“ᐣᑭᒪᐤ,” ᑭᐃᓇᒋᒧ. “ᐁᑲᓇᐊᐧᐸᒥᑎᓱᔭᐣ ᑭᔭᓂᒪᐣ.”
ᑲᑭᑲᓇᐊᐸᐧᑕᐠ ᐅᒪᓯᓇᑌᔑᒥᑯᐃᐧᐣ ᐊᒥᐦᐃᒪ ᑲᑭᐅᒋ ᓂᓯᑕᐁᐧᑕᐠ ᐊᓂᐣ ᐁᔑᓇᑲᐧᓂᐠ ᐅᐱᒪᑎᓯᐃᐧᐣ ᒥᓇ ᐁᓯᓴᐦᐃᑯᐨ ᑲᑎᐯᓂᒥᑯᐨ ᐅᒪᐡᑭᑭᑫᐃᐧᐣ.
“ᐣᑭᐅᓀᑕᓇᐸᐣ ᑲᐧᔭᐠ ᒋᐱᒧᑐᔭᐣ ᐣᐱᒪᑎᓯᐃᐧᐣ ᐁᑲᐧ ᑲᐃᐧᐣ ᒪᓭᓯᐠ ᐊᐱᐣ ᒋᑭᐅᒋᓯᓭᔭᐣ,” ᑭᐃᑭᑐ.
ᑲᐃᐧᐣ ᑫᑲᐟ ᒋᑭᐅᒋ ᐃᓯᓭᓂᐠ ᒋᒪᓯᓇᑌᔑᒪᑲᓄᐨ ᑕᐧᕑᐃᐢ. ᐊᐱ ᒪᐡᑭᑭᐃᐧᑭᒪᐃᐧᐣ ᐅᑕᓄᑭᐠ ᑲᐃᔕᐊᐧᐨ ᐅᑕᔑᑫᐃᐧᓂᐠ ᒣᑲᐧᐨ 2010 ᑲᔭᑭᐊᐧᓂᐠ ᐁᑲᐧ ᑲᑭ ᑲᑫᐧᒋᒪᐊᐧᐸᐣ ᑕᐧᕑᐃᐢᐅᐣ ᒋᑎᐸᑐᑕᒥᓂᐨ ᒪᐡᑭᑭᑫᐃᐧᓂ, ᑲᐧᐣᑕ ᑭᐃᐃᑭᑐ.
“ᑲᐧᐣᑕ ᐱᑯ ᐣᑭᐊᐃᓇᒋᒧᑕᐊᐧᐠ,” ᐃᑭᑐ. “ᐊᒥ ᑲᑭᐃᓀᑕᒪᐣ, ᐊᐣᑕᐡ ᐃᐧᐣ ᑲᑕᐨ ᐁᐅᒋ ᑲᑫᐧᑭᐊᐧᓂᒧᔭᐣ. ᒥᑕᐡ ᑲᐃᔑᑭᐁᐧ ᑲᓄᓇᑲᐧ ᐁᑲᐧ ᐣᑭᐃᐧᑕᒪᐊᐧᐠ, ᐁᐦᐊ, ᓂᐊᐧᓂᐊᐸᒋᑐᐣ ᒪᐡᑭᑭᐣ, ᒥᓇᐊᐧ ᑕᐡ ᐣᑭᐊᓄᓂᑯᐠ ᒋᑎᐸᒋᒧᔭᐣ.”
ᐊᐱ ᑲᐅᐡᑭᓭᐠ 2011, ᑭᑲᑫᐧᒋᒪᑲᓄ ᒋᒪᓯᓇᑌᔑᒪᑲᓄᐨ, ᑭᓇᑯᒧ ᑕᐡ.
“ᐣᑭᑲᐧᐡᑯᓇᑕᐣ, ᐣᑭᑭᒧᒋ ᒥᓴᐁᐧᐣᑕᐣ ᐅᐁᐧ ᐁᐃᐧᑐᑕᒪᐣ, ᐁᐃᐧ ᑲᑫᐧᐃᐧᒋᐦᐊᑲᐧ ᐊᐃᐧᔭᐠ,” ᑭᐃᑭᑐ.
ᒥᔑᓄᐱᓯᑦ ᐅᑭᐱᒥ ᒪᒪᓯᓇᑌᔑᒪᐊᐧᐣ, ᐅᒪᓯᓇᑌᓯᒋᑫᐊᓄᑭᐠ ᑭᐊᐃᔕᐊᐧᐠ ᐊᐸᒪᑐᐠ ᐁᑭᒪᓯᓇᑌᔑᒪᐊᐧᐨ ᑕᐧᕑᐃᐢᐅᐣ ᑲᐃᔑᑲᐯᔑᓂᐨ, ᐁᑲᐧ ᐊᐱᐣ ᐅᑭᔭᓂ ᒪᓯᓇᑌᔑᒪᐊᐧᐣ ᑲᑭᔭᓂᔕᐨ ᑲᐃᔑᐸᓱᐣᑕᐧ ᐁᐧᑎ ᑎᕑᐊᔾᑎᐣ ᐁᒪᐧᔦ ᐊᓂᔕᐨ ᐃᐧᒋᐦᐃᐁᐧᐃᐧᑲᒥᑯᐠ ᑕᐣᑐᕑ ᐯ ᑲᔭᑭᓯᑲᐧᓂᐠ.
ᑲᑭᐃᔑᓂᑲᑌᐠ ᒪᓯᓇᑌᓯᒋᑲᐣ ᑲᐃᔑᓇᑕᐁᐧᑕᒪᐣ ᒋᐃᔑᓇᑲᐧᐠ ᑭᐱᒪᑎᓯᐃᐧᐣ ᒥᐢᑕᐦᐃ ᑭᐅᐣᒋᒪᑲᓂ ᑕᐧᕑᐃᐢ ᐅᑎᐸᒋᒥᑯᐃᐧᐣ ᐱᑯ ᐊᐣᑎ ᑎᐸᒋᒧᐃᐧᓇᐣ ᑲᐅᒋᐊᓄᑲᑌᑭᐣ ᒥᓇ ᐱᑯ ᐊᐃᐧᔭᐠ ᐁᑭᐅᒋ ᑭᑫᐣᑕᒧᐊᐧᐨ.
ᐅᑕᓇᐠ ᐱᓯᑦ, ᑭᑲᑫᐧᒋᒪᑲᓄ ᒋᑎᐸᒋᒧᐨ ᓯᐱᓯ ᓇᑐᑕᒧᐃᐧᓂᐠ ᐊᐱᑕᐃᐧ ᐊᐧᑲᓭ ᒥᓂᑯᐠ. ᐁᑲᐧ ᐊᐱᐣ ᒥᓇ ᑯᑕᐠ ᐸᑲᐣ ᑎᐸᒋᒧᐃᐧᓂ ᑭᐱᐅᒋ ᑲᑫᐧᒋᒪᑲᓄ ᒋᒪᓯᓇᑌᔑᒪᑲᓄᐨ. ᓄᑯᒥᑫ ᑕᐡ ᑭᐃᔕᐸᓂᐠ ᐊᐸᒪᑐᐠ ᐁᑭᐊᑕᐃᐧ ᒪᓯᓇᑌᔑᒪᐊᐧᐨ ᑕᐧᕑᐃᐢᐅᐣ ᒣᑲᐧᐨ ᑭᔐᐱᓯᒧᐣ 10 ᑲᐃᓇᑭᓱᓂᐨ.
ᑯᑕᑭᔭᐠ ᐊᐃᔭᐧᐠ ᐅᑭᐱᑲᑲᓄᓇᐊᐧᐣ ᑕᐧᕑᐃᐢᐅᐣ.
“ᒥᔑᐣ ᐊᐃᐧᔭᐠ ᐣᑭᐱᓇᓇᓯᑲᑯᐠ ᒥᓇ ᐣᑭᐱ ᒪᒪᓯᓇᐦᐊᒪᑯᐠ ᒥᓯᐁᐧ ᑲᐅᒋ ᐊᐧᐸᒋᑲᑌᐠ ᐱᐊᐧᐱᑯᐠ,” ᑭᐃᑭᑐ. “ᐃᑭᐁᐧᓂᐊᐧᐠ ᐅᑎ ᒪᐊᐧᐨ ᑲᐅᐡᑭ ᐅᒪᒪᒥᒪᐃᐧᐊᐧᐨ. ᐣᑭᐃᐧᑕᒪᑯᐠ ᐁᑭᐅᒋ ᒋᑭᐡᑲᒪᐊᐧᑲᐧ ᒥᓇ ᐁᑭᐅᒋ ᒥᓀᐧᑕᒧᐊᐧᐨ ᐁᑲ ᐃᐧᓀᑕᐊᐧ ᐅᐁᐧᓂ ᐁᐃᓯᓭᐊᐧᐨ.”
ᒥᓯᐁᐧ ᐱᑯ ᐅᐣᒋ ᓇᓂᓯᑕᐃᐧᓇᐊᐧᑲᓄ. ᒣᑲᐧᐨ ᐁᐱᐦᐅᐸᐣ ᐊᐧᓂᓇᐊᐧᑲᐠ ᐱᒥᓭᐃᐧᑲᒥᑯᐠ ᐁᐃᔕᐸᐣ ᐊᒋᑯᓴᑲᐦᐃᑲᓂᐠ, ᑕᐧᕑᐃᐢ ᐅᑭ ᒥᐧᑫᐣᑕᐣ ᐊᐃᐧᔭᐣ ᐁᑲᑲᓇᐊᐧᐸᒥᑯᐨ.
“ᑫᑲᐱ ᑕᐡ ᑭᒋᔭᐦᐊ ᐣᑭᐱᐅᒋ ᓇᓯᑲᐠ, ᐁᑲᓇᐊᐧᐸᒥᔑᐨ, ᐁᐃᓂᔑᐨ, ᑕᐧᕑᐃᐢ, ᐅ ᑭᓂᒋᑲ.” ᐃᑭᑐ ᐁᑭᐁᐧᑲᓄᓂᑫᐨ. “ᐣᑭᐃᐧᑕᒪᐠ ᐁᑭᐊᐧᐸᒥᔑᐨ ᑲᑭᒪᓯᓇᑌᓭᐊᐧᐠ ᐁᑲᐧ ᐣᑭᔕᐁᐧᓂᒥᐠ.”
ᒣᑲᐧᐨ ᒉᐣᐁᐧᕑᐃ ᐱᓯᑦ, ᑕᐧᕑᐃᐢ ᑭᒪᒪᑲᑌᑕᑦ ᑲᑭᐱᒪᓯᓇᐦᐊᒪᑯᐨ ᑭᒋᔭᐦᐊᐣ ᐁᐧᑎ ᓀᐣᑲᐱᐦᐊᓄᐠ. ᒥᑕᐡ ᑲᐃᓇᓯᓇᐦᐊᒪᑯᐨ ᐁᑭᓄᐣᑕᐊᐧᐨ ᓯᐱᓯ ᓇᑐᑕᒧᐃᐧᓂᐠ ᑲᑭᑕᑎᐸᒋᒧᐨ ᒥᓇ ᒥᑐᓂ ᐱᑯ ᐁᑭ ᑭᒋᓀᑕᐣᑕᒥᐦᐃᑯᐨ ᑌᐯᐧᐃᐧᓂᐠ, ᓱᑭᑌᐦᐁᐃᐧᓂᐠ ᒥᓇ ᑲᑭᑕᐁᐧᑕᒧᐃᐧᓂᐠ ᑲᑭᐃᔑᐸᑭᑎᓂᑎᓱᐨ ᒋᑎᐸᒋᒥᑎᓱᐨ ᒥᐱᑯ ᐊᐱᐣ ᑲᐃᔑ ᐅᐣᒋᑲᐊᐧᐱᐨ.
ᒥᓇᐊᐧ ᐅᑭᐃᑯᐣ ᐃᐁᐧ ᑲᐃᑭᑐᓇᓂᐊᐧᐠ ᐅᐸᑭᓇᑫᑕᒪᑫ ᒧᔕᐠ ᐁᐊᐧᓂᐊᐸᒋᒋᑲᑌᐠ, ᐁᑲᐧ ᐅᑭᐃᓀᐣᑕᐣ ᐃᐧᐣ ᑕᐧᕑᐃᐢ ᑌᐯᐧ ᐱᑯ ᐁᐸᑭᓇᑫᑕᒪᑫᐨ.
“ᑲᑲᑫᐧ ᐸᑭᓇᑕᒪᐣ ᑲᑎᐯᓂᒥᑯᔭᐣ ᑭᑕᓂᒥᓭᐃᐧᐣ ᒥᓇ ᒋᑭᑭᓇᐊᐧᒋᐡᑲᒪᑫᔭᐣ ᑭᑕᔑᑫᐃᐧᓂᐠ ᐊᒥᐦᐃᐁᐧ ᓂᐣ ᐁᔑᑲᓇᐊᐧᐸᑕᒪᐣ ᐁᐸᑭᓇᑫᑕᒪᑫᔭᐣ,” ᑭᐃᓇᓯᓇᐦᐃᑫ.
ᐊᐱ ᐁᑲᑫᐧᒋᒪᑲᓄᐨ ᑕᐧᕑᐃᐢ ᑭᐡᐱᐣ ᐃᔑᑲᓇᐊᐧᐸᒥᑎᓱᑫᐧᐣ ᑲᑭᐃᑯᐨ ᑭᒋᔭᐦᐊᐣ, ᔐᒪᐠ ᑭᐃᑭᑐ ᑲᐃᐧᐣ.
ᑭᑭᐱᑐᐁᐧᓭ ᐁᓇᓇᑲᑕᐁᐧᐣᑕᐠ.
“ᓇᑫᐱᑯ, ᐊᒥᑲᓇᐦᐃ,” ᑭᔭᓂᑭᑐ. “ᐣᑲᑫᐧᐃᐧᒋᐦᐊᐠ ᐃᑯ ᐊᐃᐧᔭᐠ ᒋᐱᒪᒋᐦᐃᑎᓱᐊᐧᐨ.”
ᑲᑭᒪᓯᓇᑌᔑᒪᑲᓄᐨ ᐊᒥᐦᐃᒪ ᐊᐱᐣ ᑲᑭᐅᐣᒋ ᑭᑫᐣᑕᐠ ᑕᐧᕑᐃᐢ, ᐊᐊᐧᔑᒣ ᐱᑯ ᐅᑕᓄᑲᑕᐣ ᐁᐃᐧ ᑲᑫᐧᐃᐧᒋᐦᐃᐁᐧᐨ.
ᑲᑫᐧ ᔕᑯᓱᒥᐁᐧ ᐅᑕᔑᑫᐃᐧᓂᐠ ᒋᑭᒪᒋᒋᑲᑌᓂᐠ ᐅᐡᑲᑎᓯᐃᐧ ᐱᒧᒋᑫᐃᐧᓂ, ᒥᓇ ᓄᑯᒥᑫ ᑭᒪᑕᓄᑭ ᒋᑕᑭᐧᐨ ᐅᐡᑲᑎᓴᐠ ᐊᐱᑕᒪᑫᐃᐧᓂᐠ, ᐊᓂᔑᓇᐯ ᐊᐢᑭ ᐅᐡᑲᑎᓯᐃᐧ ᐊᐱᑕᑫᐃᐧᐣ.
ᐁᑲᐧ ᒥᓇ ᐊᐃᔕ ᑲᐱᐅᐣᒋ ᐊᐣᑐᒪᑲᓄᐨ ᒋᐊᐣᑕᐃᐧ ᑕᑎᐸᒋᒧᐨ ᑲᑕᔑ ᐅᑯᒪᐊᐧᒋᐦᐃᑎᓇᓂᐊᐧᓂᐠ ᐱᑯ ᐊᐣᑎ ᑌᑎᐸᐦᐃ.
“ᑲᑭᒪᓯᓇᑌᔑᒥᑯᔭᐣ ᐣᑭᐅᒋ ᐃᐧᒋᐦᐃᑯᐣ ᒋᐅᑦᐱᑲᐸᐃᐧᔭᐣ, ᐁᑲ ᑫᑯᐣ ᒋᑲᑐᔭᐣ,” ᑭᐃᑭᑐ ᑕᐧᕑᐃᐢ ᑲᑭᐊᔭᒥᐦᐊᐨ ᐃᐧᒋᐅᐡᑲᑎᓴᐣ ᐃᒪ ᐅᐡᑲᑎᓴᐠ ᓂᑲᐣ ᐅᐣᒋ ᒪᐊᐧᒋᐦᐃᑐᐃᐧᓂᐠ. “ᐣᑭᐅᒋ ᐃᐧᒋᐦᐃᑯᐣ ᒋᑫᐧᑭᓭᐦᐃᑎᓱᔭᐣ. ᐣᑭᐅᒋ ᐃᐧᒋᐦᐃᑯᐣ ᐊᓂᐣ ᑫᐃᔑ ᑲᓇᐊᐧᐸᑕᒪᐣ ᐱᒪᑎᓯᐃᐧᐣ. ᐣᑭᐅᒋ ᐃᐧᒋᐦᐃᑯᐣ ᐊᓂᐣ ᑫᐃᔑᒋᑫᔭᐣ. ᐣᑐᒋᒥᓀᐧᑕᐣ ᑕᐡ ᐁᑲ ᐊᐱᐣ ᑲᒥᐣᒋᒪᐱᓱᔭᐣ.”
ᐊᐱ ᑲᑭᐃᐡᑲᐧ ᑭᔑᒋᑲᑌᐠ ᒪᓯᓇᑌᓯᒋᑲᐣ ᑲᐃᔑᓇᑕᐁᐧᑕᒪᐣ ᒋᐃᔑᓇᑲᐧᐠ ᑭᐱᒪᑎᓯᐃᐧᐣ ᑭᐃᐧᐣᒋᑫᒪᑲᐣ ᑕᐧᕑᐃᐢ ᐁᑭᑭᐁᐧ ᐸᐣᑭᔑᐣᐠ ᓂᐦᓱᑯᐣ ᑲᐃᐡᑲᐧᑭᐁᐧᐨ ᑲᑭᐱᐅᐣᒋ ᓴᑲᐦᐊᐠ ᐃᐧᒋᐦᐃᐁᐧᐃᐧᑲᒥᑯᐠ. ᑕᐧᕑᐃᐢ ᑭᐃᓇᒋᒧ ᐅᒪ ᐊᐧᐊᐧᑌ ᑎᐸᒋᒧᐃᐧᓂᐠ ᐃᐡᑲᐧᔭᐨ ᐊᐱᐣ ᑲᑭᐊᐸᒋᑐᐸᐣ ᒪᐡᑭᑭᑫᐃᐧᐣ ᑲᔭᓂ ᒪᑕᑭᓱᓂᐨ ᒪᑯᔐᑭᔑᑲᓂᐱᓯᒧᐣ. ᑭᐃᐧᐣᒋᑲᑌᐠ ᐃᒪ ᑎᐸᒋᒧᐃᐧᓂᐠ ᐁᑲ ᑫᑯᐣ ᐁᑕᑲᐧᐠ ᑫᑭᐅᒋ ᐊᓂᑯ ᐃᐧᒋᐦᐃᑕᐧ ᐃᐡᑯᓂᑲᓂᐠ ᑲᐃᐡᑲᐧ ᑭᔑᑐᐊᐧᐨ ᐃᐧᒋᐦᐃᐁᐧᐃᐧᑲᒥᑯᐠ, ᐁᑲᐧ ᑕᐧᕑᐃᐢ ᑭᐃᑭᑐ ᒪᐊᐧᐨ ᐃᑯ ᐁᓇᓂᓴᓀᑕᑲᐧᐠ ᐊᐱᐣ ᑲᑭᐁᐧᐨ ᐊᐃᐧᔭ ᐅᑕᔑᑫᐃᐧᓂᐠ ᐊᓂᐡ ᑲᑎᐯᓂᒥᑯᐊᐧᐨ ᒪᐡᑭᑭᑫᐃᐧᓂ ᐊᐊᐧᔑᒣ 80 ᐱᕑᓭᐣᐟ ᐁᐊᔭᒪᑲᐠ ᐃᐡᑯᓂᑲᓂᐠ.
ᔕᑯᐨ ᑕᐧᕑᐃᐢ ᐅᑭᐃᐧᐣᑕᒪᐊᐧᐣ ᐃᐧᒋᐅᐡᑲᑎᓴᐣ ᓄᑯᒥᑫ ᐁᑭᐅᑕᐱᓇᐠ ᑲᐱᒥ ᒪᐡᑭᑭᑫᐦᐃᑕᐧ, ᐃᐁᐧ ᒪᐡᑭᑭ ᐁᑲ ᒋᐅᒋ ᓇᑕᐁᐧᐣᑕᒧᐊᐧᐨ ᑲᑎᐯᓂᒥᑯᐊᐧᐨ ᑲᑭᐸᑲᒋᐊᐸᒋᑐᐊᐧᐨ ᑐᑲᐣ ᑭᒋ ᐃᐧᓴᑫᑕᒧᒪᐡᑭᑭᐣ, ᐁᑲᐧ ᑕᐡ ᐊᒥ ᐁᑫᐧᓇᐠ ᒪᐊᐧᐨ ᑭᓀᐧᐡ ᐁᑲ ᐁᔭᐸᒋᑐᐨ ᒪᐡᑭᑭᑫᐃᐧᓂ ᐊᑯᓇᐠ ᐊᐱᐣ ᑲᑭᑲᑫᐧ ᐳᓂᑐᐸᐣ.
“ᑭᔭᐱᐨ ᐃᑯ ᐣᑕᓄᑲᑕᐣ,” ᑭᐃᓇᒋᒧ. “ᑐᑲᐣ ᐃᑯ ᑲᑭᐃᑭᑐᔭᐸᐣ ᑲᒪᓯᓇᑌᔑᒥᑯᔭᐣ, ᑲᐃᐧᓂᐣ ᐃᐧᑲ ᑕᐅᐣᒋ ᐃᐡᑲᐧᓭᓯᓄᐣ ᐅᐁᐧ ᒋᒪᒥᑲᑕᒪᐣ, ᒥᑕᐡ ᐃᑯ ᑫᐃᔑ ᐱᒥᒪᒥᑲᒪᑕᐣ ᐸᓂᒪ ᐱᑯ ᑭᐃᐡᑲᐧᓭᐠ ᐣᐱᒪᑎᓯᐃᐧᐣ.”


Email to a Friend
qr code
add to del.icio.us

Stumble It!

Post new comment

Comment policy

All comments submitted to Wawatay News Online must have a correct name, location and email address of the user. Wawatay will not approve comments without the required information.

The approval of comments will also be subjected to relevancy, laws of defamation and good taste.

Once posted, comments become the property of Wawatay News. Wawatay News reserves the right to publish or use this comment in any way in the future for online use, in print, and by any other media at the discretion of Wawatay News.

The content of this field is kept private and will not be shown publicly.