view counter

ᐳᑐᑀᐢ ᒪᒋᑕᐎᐣ ᐅᒋ ᑲᐡᑭᒋᑲᑌ ᒋᐊᔭᒥᐗᐨ ᐅᐡᑲᑎᓴᐠ

Thursday December 20, 2012

ᑯᑕᓯ ᐅᐡᑭᓂᑭᑴᐠ ᐁᐱᐅᑕᓭᐗᐨ ᒥᓯᐌ ᑭᐌᑎᓄᐠ ᐅᐣᑌᕒᐃᔪ ᑭᐎᑕᒪᑎᐗᐠ ᑲᑭᐃᔑᒥᑲᒧᐗᐨ ᐱᔑᑾᒋᒋᑫᐎᐣ ᒥᓇ ᐅᐸᑯᓭᑕᒧᐎᓂᐗ ᒋᐊᒋᓭᐠ ᑫᑯᐣ ᐃᐃᒪ ᐳᑐᑀᐢ ᒪᒋᑕᐗᐣ ᐃᐃᒪ ᐗᓂᓇᐗᑲᐣᐠ᙮
ᐅᑕᓇᐠ ᑲᐱ ᐱᓯᒧᐗᐠ ᑭᑭᑭᓄᒪᐗᑲᓀᐗᐠ ᒥᓇ ᑭᒐᑲᑌᓯᒋᑫᐗᐠ, ᐅᐡᑲᑎᓴᐠ ᐅᑭᐸᑭᑎᓇᓇᐗ ᐅᑕᓄᑭᐎᓂᐗ ᑲᑭᒪᒋᒋᑲᑌᐠ ᐁᐸᑭᓂᑲᑌᐠ ᒣᑾᐨ ᑎᓭᒼᐳᕒ 11 ᐃᐃᒪ ᐁ ᑊᕒᐊᒼ ᒐᑲᑌᓯᒋᑫᐎᑲᒥᐠ ᐗᓂᓇᐗᑲᐣᐠ᙮
ᐊᒪᐣᑕ ᓬᐊᔭᐣ ᐁᐅᒋᐨ ᐎᑴᑐᐠ ᐃᐡᑯᓂᑲᓂᐠ, ᐁᑭᐎᑕᒪᐗᐨ ᐗᐗᑌᐣ ᑲᑭᐅᒋᐎᒋᑐᐨ ᐅᐅᐌᓂ ᒪᒋᑕᐎᓂᓂ ᐁᑭᓇᑭᐡᑲᐠ ᐁᑭ ᐱᔑᑾᒋᑐᑕᐗᑲᓀᐨ ᒥᓇ ᐁᑭᐸᑯᓭᑕᐠ ᒋᑭᐎᑕᑭᐸᐣ ᒥᓇ ᒋᓄᑕᐗᑲᓀᐨ ᒥᓇ ᒋᐅᒋᑭᑫᑕᒧᐗᐨ “ᐁᑲ ᐁᐯᔑᑯᐗᐨ”, ᐁᑭᐃᑭᑐᐨ ᑲᑭᐸᑭᓂᑲᑌᐠ ᐅᐅᐌ ᐊᓄᑭᐎᐣ ᐁᑭᒪᒪᑲᑌᑕᐠ᙮
“ᑭᒪᒪᑲᑌᑕᐣ ᐅᐅᐌ ᑎᓄᑲᐣ ᓂᐣ ᐁᑭᑭᔑᑐᐗᐣ ᐊᓄᑭᐎᐣ ᒋᐅᒋᐎᒋᐦᐊᑲᓀᐨ ᔭᐎᔭ ᒥᓯᑌᑲᒥᐠ ᒥᓇ ᑯᑕᑭᔭᐣ ᐃᐡᑯᓂᑲᓇᐣ ᐅᐅᒪ ᑲᓇᑕ,” ᓬᐊᔭᐣ ᐃᑭᑐ᙮ “ᑭᐅᒋᑭᑫᑕᐣ ᑲᑭᓇ ᔭᐎᔭ ᐁᐅᑕᔭᒥᐨ ᒥᓇ ᐱᔑᑾᒋᒋᑫᐎᐣ ᐁᑲ ᐁᑕ ᐁᔭᔭᐠ ᐃᐃᒪ ᑎᐡᑯᓂᑲᓂᐠ ᒥᓇ ᒥᓯᑌᑲᒥᐠ ᐁᔭᔭᐠ ᐃᐃᐌ ᐃᔑᒋᑫᐎᐣ ᒥᓇ ᑲᑭᓇ ᔭᐎᔭ ᒋᑭᑎᐸᒋᒧᐸᐣ᙮”
ᐃᐃᐌ ᐳᑐᑀᐢ ᒪᒋᑕᐎᐣ ᐅᑭᒪᒋᑐᐣ ᐳᕒᐁᐣᑕ ᑐᐱᐠ ᑲᐃᔑᐊᓂᑭᐨ ᐅᐣᑌᕒᐃᔪ ᐊᓂᔑᓂᓂᐤ ᐃᑴ ᒪᒋᑕᐎᐣ, ᐁᑭᐃᓀᒋᑲᑌᐠ ᒋᐅᒋᑭᑫᑕᑯᒋᑲᑌᐠ ᐱᔑᑾᒋᒋᑫᐎᐣ ᒥᓇ ᐁᔑᒋᑫᒪᑲᐠ ᐃᐃᒪ ᐗᓂᓇᐗᑲᐣᐠ᙮
ᐅᐅᐌ ᒪᒋᑕᐎᐣ ᑭᐸᑭᓂᑲᑌ ᑲᑭᓇ ᐃᑴᐗᐠ ᐁᐣᑕᓱᐊᐦᑭᐗᐨ ᒋᑭᑕᑶᐗᐨ, ᔕᑯᐨ ᐅᐡᑭᓂᑭᑴᐠ ᐅᑭᐅᑕᐱᓇᓇᐗ ᒋᑭᒪᒋᑕᐗᐨ ᐅᑎᐸᒋᒧᐎᓂᐗ᙮
“ᐅᒋᐗᐸᒋᑲᑌ ᐁᑭᑫᑕᑯᐠ (ᐅᐡᑲᑎᓴᐠ) ᐁᓇᑕᐌᑕᒧᐗᐨ ᒋᑭᐊᒋᑲᓇᐗᐸᒋᑲᑌᑭᐸᐣ ᑫᑯᐣ,” ᑐᐱᐠ ᐃᑭᑐ᙮ “ᑲᑭ ᐎᒋᑲᐸᐎᑕᐗᒥᐣ ᑕᐡ, ᒋᐱᒥᑭᑭᓇᐗᑲᓉᐗᐨ ᒋᐊᓂᐅᑕᐱᓇᒧᐗᐨ ᓂᑲᓂᑕᒪᑫᐎᓇᐣ᙮ ᒪᐗᐨ ᒥᑕᐦᐃ ᑫᑭ ᐃᑭᑐᐗᐨ ᐅᐡᑲᑎᓴᐠ, ᑭᐡᐱᐣ ᒥᓇᑲᓀᐗᐨ ᑫᑭ ᐅᒋᑲᑭᑐᐗᐸᐣ᙮”
ᐅᐅᐌ ᐳᑐᑀᐢ ᒪᒋᑕᐎᐣ ᑭᒪᒋᒋᑲᑌᐸᐣ ᓯᑌᒼᐳᕒ᙮ ᐁᐣᑕᔀ ᑲᐱᒥᑯᓇᑲᐠ ᐅᐠᑲᑎᓴᐠ ᑭᒪᐗᒋᐦᐃᑎᐗᐠ ᐁᐎᑭᑫᑕᒧᐗᐨ ᒐᑲᑌᓯᒋᑫᐎᐣ, ᐁᑭᐊᓂᒧᑕᒧᐗᐨ ᐱᔑᑾᒋᒋᑫᐎᐣ ᐃᐃᒪ ᐃᐡᑯᓂᑲᓂᐠ, ᒥᓇ ᐁᑭ ᐸᐸᒥᒐᑲᑌᓯᒋᑫᐗᐨ ᒥᓯᐌ ᐗᓂᓇᐗᑲᐣᐠ᙮
ᑐᐱᐠ ᑭᐃᑭᑐ ᓇᐱᐨ ᐎᐸᐨ ᐅᑭᑭᑫᑕᓇᐗ ᐅᐅᐌ ᒪᒋᑕᐎᐣ ᐊᐗᔑᒣ ᑫᑯᐣ ᐁᑭᑕᑯᓂᑲᑌᐠ ᑲᐎᐣ ᐃᑴᑕ ᒐᑲᑌᓯᒋᑫᐎᐣ᙮
“ᐊᐗᔑᒣ ᐱᑯ ᑫᑯᐣ ᑭᑕᑯᓂᑲᑌ,” ᑐᐱᐠ ᐃᑭᑐ᙮ “ᑭᐗᐸᒪᒥᐣ ᐃᑭᐌᓂᐗᐠ ᐅᐡᑭᓂᑭᑴᐠ ᐊᐗᔑᒣ ᐁᑭᐊᓂᑭᑫᑕᒧᐗᐨ ᒥᓇ ᐁᓂ ᑲᐡᑭᑕᒪᓱᐗᐨ, ᒋᑭᐅᒋ ᐊᓂ ᐊᐣᒋᑲᓇᐗᐸᒋᑲᑌᑭᐸᐣ ᑫᑯᓇᐣ᙮”
ᑕᒣᕒᐊ ᑭᔭᐡ ᐗᐎᐁᑲᒪᐠ ᐁᐅᒋᐨ ᐅᑭᑌᐺᑕᐗᐣ ᑐᐱᐠ ᑲᑭᐃᑭᑐᓂᐨ ᑲᑭᐃᔑᐗᐸᑕᒥᓂᐨ᙮ ᒣᑾᐨ ᐗᐗᑌ ᑲᐊᔭᒥᐦᐃᑯᐨ ᑭᔭᐡ ᑭᐃᑭᑐ ᐁᑭᑕᑶᐨ ᐅᐅᐌᓂ ᒪᒋᑕᐎᓂᓂ ᒋᑭᐅᒋ ᐎᒋᐦᐊᐸᐣ ᔭᐎᔭᐣ ᐁᑲ ᐁᐯᔑᑯᓂᐨ᙮ ᒥᓇ ᐅᑭᐎᐣᑕᐣ ᐁᑭᐸᑯᓭᑕᐠ ᒋᑭᐎᑕᐠ ᑲᐃᔑᐯᔑᑯᐨ ᒋᐊᓂᐅᐱᑭᐨ ᑲᑭ ᐱᐃᓯᓭᐨ ᐅᑕᓇᐠ ᒋᑭ ᐅᒋᑲᐡᑭᑐᐨ ᒋᐎᒋᐦᐊᐨ ᑯᑕᑭᔭᐣ ᔭᐎᔭᐣ᙮
“ᑲᑭᐃᓀᑕᒪᐣ ᐁᑭᐊᓂ ᒪᐡᑲᐎᓯᔭᐣ ᑎᓀᑕᒧᐎᓂᐠ,” ᑭᔭᐡ ᐃᑭᑐ᙮ “ᑭᓄᓱᑫᓂᒼ ᐱᔑᔑᐠ ᐱᒋᐁᐃ ᓂᐎᔭᐎᐠ, ᒥᐌ ᑲᑭᐃᓀᑕᒪᐣ ᐁᑭᓴᑭᑎᓇᒪᐣ ᑲᑭᓇ ᑫᑯᐣ ᑲᑭᐱᐃᓯᓭᔭᐣ ᐅᑕᓇᐠ, ᒥᓇ ᐁᑭᐱᑎᑫᐎᑐᔭᐣ ᒥᓄ ᑫᑯᐣ ᐃᐃᒪ ᐱᒪᑎᓯᐎᓂᐠ᙮”
ᒥᐌᑕᐡ ᑭᔭᐡ, ᒥᓇ ᑯᑕᑭᔭᐠ ᐅᐡᑭᓂᑭᑴᐠ ᑲᑭᐎᒋᑐᐗᐨ ᒪᒋᑕᐎᓂᓂ, ᐁᐗᐸᑕᒧᐗᐨ ᒐᑲᑌᓯᒋᑲᓇᐣ ᒥᓇ ᐃᑭᑐᐎᓇᐣ ᑲᑭᒪᓯᓇᐦᐊᒧᐗᐨ ᒣᑾᐨ ᑲᑭᐸᑭᓂᑲᑌᐠ ᐅᑕᓄᑭᐎᓂᐗ ᑭᐅᒋᐃᐡᐯᓂᒧᐗᐠ ᒥᓄᑫᑯᓂᓂ᙮
“ᑭᑭᒋᓀᑕᐣ ᒥᓇ ᑭᑭᒋᓀᓂᒥᑎᐢ ᑲᑭᐱᔕᔭᐣ ᐅᐅᒪ ᒪᒋᑕᐎᐣ,” ᑭᔭᐡ ᐃᑭᑐ᙮ “ᓂᐗᐸᒥᑎᐢ ᒋᐎᒋᐦᐊᑾ ᔭᐎᔭᐠ ᒋᐅᑎᓇᒧᐗᐨ ᐎᒋᐦᐃᐌᐎᓇᐣ᙮”
ᑐᐱᐠ ᐃᑭᑐ ᐅᐅᐌ ᐳᑐᑀᐢ ᒪᒋᑕᐎᐣ ᒥᓇᐗ ᑕᐱᒥᐊᓄᑭᒋᑲᑌ ᒋᐱᑭᐌᐡᑲᒪᑲᐠ ᐅᐅᒪ ᐗᓂᓇᐗᑲᐣᐠ᙮ ᒥᓇ ᐅᑭᐎᑕᐣ ᐅᐅᐌ ᒪᒋᑕᐎᐣ ᒋᑭᑐᒋᑲᑌᑭᐸᐣ ᐊᐣᑎᐱᑯ ᐃᐡᑯᓂᑲᓂᐠ ᑭᐡᐱᐣ ᓇᑕᐌᑕᐠ ᐅᑐᐡᑲᑎᓯᒥᐗ ᐎᓄᑕᐗᐨ ᒋᑎᐸᒋᒧᓂᐨ ᒥᓇ ᑯᑕᑭᔭᐠ ᐊᓂᔑᓂᓂᐗᐠ᙮
ᑎᐸᒋᒧᐎᓇᐣ ᑲᑭᐗᐸᑕᓇᐗ ᐃᐃᒪ ᐗᓂᓇᐗᑲᐣᐠ ᐁ-ᑊᕒᐁᒼ ᒐᑲᑌᓯᒋᑫᐎᑲᒥᑯᐠ ᒣᑾᐨ ᑎᓭᒼᐳᕒ᙮


Email to a Friend
qr code
add to del.icio.us

Stumble It!

Post new comment

Comment policy

All comments submitted to Wawatay News Online must have a correct name, location and email address of the user. Wawatay will not approve comments without the required information.

The approval of comments will also be subjected to relevancy, laws of defamation and good taste.

Once posted, comments become the property of Wawatay News. Wawatay News reserves the right to publish or use this comment in any way in the future for online use, in print, and by any other media at the discretion of Wawatay News.

The content of this field is kept private and will not be shown publicly.