Click for more information.
view counter

ᐊᒥ ᐁᑲᐧ ᒋᐊᓂᔑ ᑲᑫᐧ ᓴᑲᑫᐣᑕᒧᐊᐧᐨ ᐊᐧᑯᒪᑲᓇᐠ

Thursday May 26, 2011

ᒐᐧᕑᑎᐣ ᐊᐧᐸᐢ ᑲᑭᐅᐣᒋᐨ ᐅᑕᔑᑫᐃᐧᓂᐠ ᐁᐧᐱᑫᐧᐠ ᑭᐃᔑᓇᐦᐃᓇᑲᓂᐃᐧ ᒣᑲᐧᐨ ᒪᑯᐱᓯᑦ 16 ᑲᐃᓇᑭᓱᓂᐨ.

“ᒥᐢᑕᐦᐃ ᑭᐊᔭᒪᑲᐣ ᒧᔑᐦᐅᐃᐧᐣ ᒣᑲᐧᐨ ᑲᐱᒥᓇᐦᐃᓂᑲᓂᐊᐧᐠ,” ᐃᑭᑐ ᑭᒋᐅᑭᒪᑲᐣ ᐢᑕᐣ ᐯᕑᑎ. “ᒪᐊᐧᐨ ᐃᑯ ᑭᑐᑭᐡᑲᑫᒪᑲᐣ. ᐃᑭᐁᐧᓂᐊᐧᐠ ᒪᐊᐧᐨ ᐅᑭ ᑭᒋᐊᓂᒥᐦᐃᑯᓇᐊᐧ ᑫᒋᐊᐧᐠ ᑲᑭᐊᐧᑯᒪᐊᐧᐨ, ᐅᓂᑭᐦᐃᑯᐣ, ᒥᓇ ᐃᐧᒋᓂᑕᐃᐧᓂᒪᑲᓇᐣ. ᒪᐊᐧᐨ ᐃᑯ ᐣᑌᐦᐃᐠ ᓂᑭᐅᒋᑐᑭᐡᑲᑯᐣ ᐊᓂᐡ ᐁᑭᑫᐣᑕᒪᐣ ᐊᓂᐣ ᐁᐃᓇᒪᐣᒋᐦᐅᐊᐧᐨ ᐊᐧᑯᒪᑲᓇᐠ ᐅᐁᐧᓂ ᐅᑎᓯᓭᐃᐧᓂᐊᐧ.”

ᐯᕑᑎ ᑫᐃᐧᐣ ᐅᑭᐊᐧᓂᐦᐊᐸᓂᐣ ᐅᑯᓯᓴᐣ ᓭᓯᑯᐨ ᐁᑭ ᐅᐣᒋᐊᐧᓂᐦᐊᐨ ᓇᐣᑕ ᓂᓴᐧᓱᔭᑭ ᐅᑕᓇᐠ.

“ᐣᑭᑫᐣᑕᐣ ᑕᐡ ᐊᓂᐣ ᐁᐱᒋᐊᑫᐧᐣᑕᑲᐧᓂᐠ ᒣᑲᐧᐨ ᑲᐱᒥᐃᐧᒋᐃᐧᑯᐊᐧᐨ,” ᐯᕑᑎ ᐃᑭᑐ.

ᐯᕑᑎ ᐃᑭᑐ ᐃᐁᐧ ᒥᑎᑯᐊᐧᐡ ᑲᑭᐃᔑᐱᓇᐦᐃᑲᑌᐠ ᒥᔭᐤ ᑲᐃᐧᐣ ᒋᐅᐣᒋ ᐸᑭᓂᑲᑌᐠ ᒥᓇ ᑲᐃᐧᐣ ᒋᐅᐣᒋ ᐸᑭᑎᓂᑲᑌᐠ ᒋᐊᐧᐸᐣᒋᑲᑌᐠ.

“ᑭᐱᐊᐧᐱᑯᐊᐧᐣ ᐃᐁᐧ ᒥᑎᑯᐊᐧᐡ ᐁᑲᐧ ᒥᔑᐣ ᐊᐃᐧᔭᐠ ᐅᑭᒪᓯᓇᐦᐊᓇᐊᐧ ᑫᑯᓇᐣ ᐃᒪ ᐊᐧᑭᒋᒥᑎᑯᐊᐧᐡ ᑲᒪᑲᑌᐃᐧᐱᐦᐃᑫᓭᓂᐠ ᒪᓯᓇᐦᐃᑲᓇᑎᑯᓂ ᐁᑭᔭᐸᒋᑐᐊᐧᐨ,” ᐯᕑᑎ ᐃᑭᑐ. “ᑭᒥᔑᓄᐊᐧᐠ ᐅᐡᑲᑎᓴᐠ ᑲᑭᐱᔕᐊᐧᐨ ᒥᓇ ᒥᐢᑕᐦᐃ ᒧᔑᐦᐅᐃᐧᐣ ᐅᑭᐊᔭᐊᓇᐊᐧ. ᒥᐢᑕᐦᐃ ᐅᐣᒋᑲᐊᐧᐱᐃᐧᐣ ᐣᑭᐊᐧᐸᑕᐣ ᑌᐯᐧ ᐱᑯ ᐁᓇᑲᐧᐠ ᐁᑭᓴᑭᐦᐊᑲᓂᐃᐧᐨ ᒐᐧᕑᑎᐣ ᐅᑕᔑᑫᐃᐧᓂᐠ.”

ᑭᒋᐅᑭᒪᑲᓀᐢ ᑌᕑᐃ ᐊᐧᐳᐢ ᒥᓇ ᑯᑕᑭᔭᐠ ᓂᔑᐣ ᐊᓂᔑᓇᐯ ᐊᐢᑭ ᐅᑭᒪᐠ ᑫᐃᐧᓇᐊᐧ ᑭᐱᔕᐊᐧᐠ ᑲᑭᐃᔑᓇᐦᐃᓂᑲᓄᐊᐧᓂᐠ, ᐁᑲᐧ ᑲᔦ ᒪᑕᐊᐧ ᐱᒧᒋᑫᐃᐧᓂᐠ ᑲᑕᓇᓄᑭᑕᒪᑫᐊᐧᐨ, ᒪᑕᐊᐧ ᑭᑭᓄᐦᐊᒪᑫᐃᐧᑲᒥᑯᐠ ᒥᓇ ᑌᑎᐸᐦᐃ ᑕᔑᑫᐃᐧᓇᐣ ᑲᐊᔭᑭᐣ ᑭᐱᐅᐣᒋᐊᐧᐠ.

ᐁᑲᐧ ᒉᐣᑭᐣᐢ ᒋᐸᐃᑲᒥᑯᐠ ᑭᑕᔑᒪᐊᐧᑐᐡᑲᐊᐧᐠ ᐊᐧᑯᒪᑲᓇᐠ ᒥᓇ ᑲᑭᒥᓄᐃᐧᒋᐊᐧᐊᐧᐨ ᒐᐧᕑᑎᓄᐣ ᒣᑲᐧᐨ ᒪᑯᐱᓯᑦ 14 ᐃᒪ ᑕᐣᑐᕑ ᐯ.

ᒐᐧᕑᑎᐣ ᐊᐧᐸᐢ ᓇᐦᐃᓇᑲᓂᐃᐧ

ᐁᐧᑎ ᒥᓇᐊᐧ ᑭᑕᔑ ᐊᔭᒥᒋᑲᓂᐊᐧᐣ ᒣᑲᐧᐨ ᒪᑯᐱᓯᑦ 13 ᑲᐃᓇᑭᓱᐨ ᓇᓀᐤ ᑲᒥᓂᐣᑎᑫᐧᔭ ᓯᐱᐠ ᐯᔓᐨ ᑭᒋᐊᑕᓱᓂᑲᒥᑯᐣ ᑲᐃᔑᐸᐸᑕᑭᑌᑭᐣ ᐊᐧᐸᓄᐠ ᐃᓀᑫ ᒉᒥᐢ ᒥᑲᓇᐠ ᐊᔓᑲᓂᐠ.

ᒪᑯᐱᓯᑦ 11 ᑲᐃᓇᑭᓱᓂᐨ ᑲᑭᑫᒋᓇᐁᐧᐣᑕᑲᐧᓂᐠ ᐃᐧᐣ ᐃᐧᐁᓂ ᐃᐧᔭᐤ ᒐᐧᕑᑎᐣ ᒥᑕᐡ ᐊᐱᐣ ᑲᑭᐸᑭᑎᓂᑎᓱᐊᐧᐨ ᒋᐱᐣᑎᑫᐡᑲᑯᐊᐧᐨ ᒪᐃᐧᐃᐧᐣ.

ᑭᒪᐃᐧᓇᓂᐊᐧᐣ ᐊᐱ ᐃᐁᐧ ᑲᐅᓇᑯᔑᐠ ᐊᐧᐁᐧ ᓫᐃᓫᐃᔭᐣ ᔑᑲᓇᑫᐧᑊ, ᐃᐧᐣ ᒪᔭᑦ ᑲᑭᐱᒥ ᓂᑲᓂᐱᒧᑐᐨ ᑲᑭᓇᓇᐣᑐᓇᐊᐧᑲᓂᐃᐧᐨ ᒐᐧᕑᑎᐣ ᐊᐊᐧᔑᒣ ᓂᐦᓱᐱᓯᑦ, ᐁᑎᐸᒋᒧᑕᐊᐧᐨ ᑲᑭᓇᓇᑐᓂᑫᐊᐧᐨ ᒥᓇ ᑯᑕᑭᔭᐠ ᐃᒪ ᑲᑭᐊᔭᐊᐧᐨ ᑲᐯᔑᐃᐧᑲᒥᑯᐠ ᐁᑭᒥᑭᑲᑌᐠ ᒥᔭᐤ ᒪᑯᐱᓯᑦ 10 ᑲᐃᓇᑭᓱᐨ ᑲᒥᓂᐢᑎᑫᐧᔭ ᓯᐱᐠ ᐁᑲᐧ ᑌᐯᐧ ᒥᐦᐊᐁᐧ ᒐᐧᕑᑎᐣ.

“ᑭᒋᒪᐡᑭᑭᐃᐧᓂ ᑲᓇᓇᑲᒋᑐᐨ ᒥᔭᐊᐧᐣ ᐅᑭᐱᑲᓄᓇᐣ ᐅᒪᒪᒥᒪᐣ ᐁᑲᐧ ᐅᑭᐃᐧᐣᑕᒪᐊᐧᐣ ᑫᒋᓇᐨ ᐃᓂᐁᐧᓂᐊᐧᐣ ᐅᑯᓯᓴᐣ,” ᑭᐃᑭᑐ ᔑᑲᓇᑫᐧᑊ, ᑲᑭᓂᑲᓂᐡᑲᐠ ᓇᓇᑐᓂᑫᐃᐧᐣ 50 ᐊᑯᓇᐠ 100 ᑲᑭᑕᓯᐊᐧᐨ ᐅᐃᐧᒋᑕᐧᐠ ᑲᑭᓇᓇᑐᓇᐊᐧᐊᐧᐨ ᐅᐡᑲᑎᓴᐣ ᐊᐱᐣ ᓂᐢᑕᑦ ᑲᑭᐊᐧᓂᐦᐊᑲᓄᐸᐣ ᑭᔐᐱᓯᑦ 7 ᑲᐃᓇᑭᓱᐨ. “ᒐᐧᕑᑎᐣ ᐊᐦᐊᐁᐧ.”

ᐁᐧᐱᑫᐧ ᑲᐅᐣᒋᑭᒋᐦᐊᐃᐧᐡᑲᒪᑫᐨ ᓄᐃᐧ ᐊᐧᐢᐊᐧ ᐅᑭᐊᓂ ᐊᔭᒥᒋᑫᑕᒪᐊᐧᐣ ᑲᑭᐊᐧᑯᒪᐊᐧᐨ ᒥᓇ ᑲᑭᓴᑭᐦᐊᐊᐧᐨ ᑲᑭᐊᐧᓂᐦᐊᐊᐧᐨ.

“ᒪᐊᐧᐨ ᐃᑯ ᑭᐱᐊᓂᒣᐣᑕᒧᐠ ᐃᒪ ᑲᐃᔑ ᐅᐊᐧᑯᒪᑲᓂᐊᐧᐨ ᒥᓇ ᐱᑯ ᐃᒪ ᐁᐧᐱᑫᐧᐠ,” ᐃᑭᑐ ᒪᑕᐊᐧ ᐱᒧᒋᑫᐃᐧᐣ ᑲᓂᑲᓂᐡᑲᐠ ᑌᐱᐟ ᐸᐧᓫ ᐊᒋᓂᐱᐣᐢᑲᑦ, ᑫᐃᐧᐣ ᐃᒪ ᑭᐊᔭ ᒣᑲᐧᐨ ᐊᐱᐣ ᑲᐸᑭᑎᓂᑲᑌᐠ ᑎᐸᒋᒧᐃᐧᐣ. “ᐁᑲᐧ ᒥᓇ ᔕᑯᐨ, ᐊᔕ ᐊᐸᐣ ᐁᑭᑫᐣᑕᒧᐊᐧᐨ ᐊᓂᐣ ᑲᑭᐊᐃᐣᑎᓂᐨ ᒐᐧᕑᑎᓄᐣ, ᐊᒋᐦᐃᒪ ᑫᔭᓄᒋ ᐃᐧᒋᐦᐃᑯᐊᐧᐨ ᒋᐊᓂᐸᑭᒋᐡᑲᑯᐊᐧᐨ ᑎᐯᐣᒋᑫᐃᐧᓇᐣ ᒥᓇ ᐃᒪ ᑕᔑᑫᐃᐧᓂᐠ ᐃᑭᐁᐧᓂᐊᐧᐠ ᐅᑎ ᑲᔦ ᒪᐊᐧᐨ ᑲᑭᐃᐧᒋ ᑭᑭᓄᐦᐊᒪᑯᓯᒪᐨ ᐃᒪ ᒪᑕᐊᐧ ᑭᑭᓄᐦᐊᒪᑫᐃᐧᑲᒥᑯᐠ. ᒪᐊᐧᐨ ᐃᑯ ᑭᐱᐊᓂᒣᐣᑕᒧᐠ ᓂᔓᐱᓯᑦ.”

“ᐣᑐᒋ ᐊᔭᒥᒋᑫᑕᒪᐊᐧᒥᐣ ᑲᑭᐊᐧᓂᐦᐊᐧᐨ ᑲᓴᑭᐦᐊᐊᐧᐨ ᐊᓂᐡ ᓄᒪᑫ ᑕᐃᓯᓭᓂ ᒋᔭᓂᑭᑫᐊᐧᐨ. ᒥᔑᓄᐊᐧᐠ ᐊᐃᐧᔭᐠ ᐅᒪ ᒪᑕᐊᐧ ᑕᔑᑫᐃᐧᓇᐣ ᑲᐅᒋ ᐱᒥᐊᔭᓱᓇᐊᐧᐨ ᑲᐱᒥᐊᓂᒣᐣᑕᒥᓂᐨ ᑎᐯᐣᒋᑫᐃᐧᓇᐣ.”

ᐁᐧᐱᑫᐧ ᐅᑭᒪᑲᐣ ᑲᓀᓂᔭᐢ ᐊᐧᐸᐢ ᐅᑭᑎᐸᒋᒪᐣ ᒐᐧᕑᑎᐣ ᐊᐧᐸᐢ ᒪᐊᐧᐨ ᐁᑭ ᑭᒋᓀᐣᑕᐠ ᐅᑕᔑᑫᐃᐧᓂᐠ ᐁᐊᔭᐨ ᒥᓇ ᐅᑭ ᑭᒋᓀᐣᑕᐣ ᒣᑕᐁᐧᐃᐧᓂ.

“ᐊᐧᐁᐧ ᐅᐡᑲᑎᐢ ᐊᒥ ᑲᑭᐅᐣᒋ ᐃᔕᐨ ᑕᐣᑐᕑ ᐯ ᐅᑌᓇᐠ ᐁᑭᐊᐣᑕᐃᐧ ᑭᑭᓄᐦᐊᒪᑯᓯᐨ,” ᐃᑭᑐ ᐅᑭᒪᑲᐣ. “ᐅᑭᒥᓀᐣᑕᐣ ᑲᔦ ᐱᒪᑫᐧᐸᐦᐃᑫᐃᐧᓂ ᒥᓇ ᑯᑕᑭᔭᐣ ᒣᑕᐁᐧᐃᐧᓇᐣ.”

ᐅᑭᒪᑲᐣ ᐃᑭᑐ ᒪᐊᐧᐨ ᑭᒋᑭᓀᐧᐡ ᑭᐃᓀᐣᑕᑲᐧᓂ ᑲᑭᐸᐱᐦᐅᐊᐧᐨ ᐃᐁᐧᓂ ᑲᑭᔑᑲᓂᐠ ᐃᒪ ᐅᑕᔑᑫᐃᐧᓂᐠ ᒣᑲᐧᐨ ᑲᑭᒪᓇᓇᑕᐃᐧᑭᑫᒋᑲᑌᓂᐠ ᒥᔭᐃᐧᓂ.

“ᓄᑯᑦ ᑲᑭᔑᑲᐠ ᐅᒪ ᑕᔑᑫᐃᐧᓂᐠ ᑲᐯᑭᔑᑲ ᑭᐱᐦᐅᓇᓂᐊᐧᐣ ᐁᑲᐧ ᑕᐡ ᐊᔕ ᑭᑭᐅᑎᑕᒥᐣ ᒋᐊᐧᑲᐃᐧᔭᐠ ᒥᓇ ᒋᐊᓄᑲᑕᒪᐠ ᑭᐸᑭᐣᑌᑕᒧᐃᐧᓂᓇᐣ,” ᑭᐃᑭᑐ ᐅᑭᒪᑲᐣ.

ᓂᐢᑕᑦ ᑲᑭᐸᑭᑎᓂᑲᑌᑭᐸᐣ ᑎᐸᒋᒧᐃᐧᐣ ᑲᑭᐃᔑᒥᑭᑫᓇᓂᐊᐧᐠ ᒣᑲᐧᐨ ᒪᑯᐱᓯᑦ 11 ᑲᑭᓇᓇᑲᒋᒋᑲᑌᐠ ᒥᔭᐤ ᐁᑭᓂᓴᐸᐁᐧᐨ, ᐊᐧᐁᐧ ᑲᑭᐃᓇᒋᒧᐨ ᑕᐣᑐᕑ ᐯ ᔑᒪᑲᓂᐡ.

ᑲᐃᐧᐣ ᑲᔦ ᐃᓀᐣᒋᑲᑌᓯᐣ ᑐᑲᐣ ᓂᐸᑕᑫᐃᐧᓂᐠ ᐁᑭᐅᒋ ᐃᐡᑲᐧᐱᒪᑎᓯᐨ.

ᑕᐣᑐᕑ ᐯ ᔑᒪᑲᓂᔕᐠ ᑭᐃᓇᒋᒧᐊᐧᐠ ᐅᑯᐁᐧᓂᐊᐧᐠ ᑲᐸᐸᒥᐱᓱᐊᐧᐨ ᒋᒪᓂᐠ ᐃᐧᓇᐊᐧ ᑲᑭᒥᑲᒧᐊᐧᐨ ᒐᐧᕑᑎᐣ ᐊᐧᐸᐢ ᐅᐃᐧᔭᐤ ᐁᐊᑲᐧᐣᑌᓂᐠ ᐯᔓᐨ ᑭᒋᐊᑕᓱᓂᑲᒥᑯᐣ ᑲᐃᔑᐸᐸᑕᑭᑌᑭᐣ ᐊᐧᐸᓄᐠ ᐃᓀᑫ ᒉᒥᐢ ᒥᑲᓇᐠ ᐊᔓᑲᓂᐠ. 15 ᑲᑭᑕᓱᔭᑭᐃᐧᓀᐨ ᐅᐡᑲᑎᐢ ᑭᐸᑭᓇᑫᐸᐣ ᒥᒋᐟ ᐱ ᐱᒪᑫᐧᐸᐦᐃᑫᐃᐧᓂᐠ ᑲᑭ ᑭᐸᐦᐃᑫᐃᐧᓂᓂᐃᐧᐨ ᒪᒋᐨ ᑭᐊᐧᐸᒪᑲᓂᐃᐧᐸᐣ ᑭᔐᐱᓯᑦ 7 ᑲᐃᓇᑭᓱᓂᐨ ᐊᐸᐣ ᐁᑲᐸᑯᐸᓀᐣ ᑭᒋᐅᑕᐸᓂᐠ ᑲᐃᔑᐊᔭᑭᓀᑭᐱᒋᐨ ᐅᑌᓇ ᒥᑲᓇᐠ ᐃᐁᐧ ᐁᐅᓇᑯᔑᓂᐠ ᐯᔓᐨ ᐃᒪ ᑲᑭᐃᔑᑲᐯᔑᐨ ᐊᐧᑲᐦᐃᑲᓂᐠ. ᐊᒥ ᑲᑭᑎᐸᒋᒧᓇᓂᐊᐧᐠ ᐁᐊᐧᓂᐦᐊᑲᓂᐃᐧᐨ ᑲᐊᓂᐊᐧᐸᓂᐠ.

“ᒐᐧᕑᑎᐣ ᑕᑲᓄᑫᐣᑕᐊᐧᑲᓂᐃᐧ ᒪᐊᐧᐨ ᐁᑭᓴᑭᑐᐨ ᐅᐱᒪᑎᓯᐃᐧᐣ ᒥᓇ ᑲᑭ ᑭᒋᓀᐣᑕᐠ ᐱᒪᑫᐧᐸᐦᐃᑫᐃᐧᐣ, ᐊᐊᐧᔑᒣ ᐅᑭᑲᑫᐧ ᑲᐡᑭᑐᐣ ᒋᔭᓂ ᓇᑲᒋᐨ ᑲᐧᔭᐠ ᐁᑭᐱᒥᔭᓄᑲᑕᐠ, ᑭᐃᑭᑐ ᐊᐧᐳᐢ, ᐃᐧᐣ ᐃᐁᐧᓂ ᑲᐱᒥᐃᐧᑐᐨ ᐊᓂᔑᓇᐯ ᐊᐢᑭ ᑭᑭᓄᐦᐊᒪᑫᐃᐧ ᐱᒥᐃᐧᒋᑫᐃᐧᓂ ᐁᑲᐧ ᒥᓇ ᑫᐃᐧᐣ ᑲᐯᑭᔑᑲ ᐅᑭᐊᐧᐃᐧᒋᐊᐧᐣ ᑲᑭᓇᓇᑐᓂᑫᐊᐧᐨ.

ᐊᐧᐳᐢ ᐅᑭᓇᓇᑯᒪᐣ ᑲᑭᓇ ᑲᑭᐱᐊᐧᐃᐧᒋᑕᐧᐊᐧᐨ ᒥᓇ ᓂᐦᓯᐣ ᔑᒪᑲᓂᔑᐃᐧ ᐊᓄᑭᑕᒪᑫᐃᐧᓇᐣ ᑲᑭᐱᒥ ᐃᐧᒋᐦᐃᐁᐧᒪᑲᑭᐣ ᐁᓇᓇᑐᓇᐊᐧᑲᓂᐃᐧᐨ ᒐᐧᕑᑎᐣ ᒥᓂᑯᐠ ᐃᑯ ᐊᐱᐣ ᑲᑭᐊᐧᓂᐦᐊᑲᓂᐃᐧᐸᐣ.

“ᐣᑭᐱᒥ ᐊᐧᐃᐧᒋᐊᐧᒥᐣ ᐅᑯᒥᒪ,” ᐃᑭᑐ ᔑᑲᓇᑫᐧᑊ ᑲᑭᐊᓂᒧᒪᐨ ᑲᑭᓇᓇᑐᓂᑫᐊᐧᐨ. “ᑲᐃᐧᐣ ᒋᐅᒋᒥᔑᓄᐊᐧᐨ ᑕᓱᑭᔑᑲ ᐃᒪ ᑲᑭᐸᐱᔕᐊᐧᐨ. ᐁᑲᐧ ᐊᐧᐁᐧ ᐅᑯᒥᒪ, ᑲᐃᐧᐣ ᐃᐧᐣ ᒋᑭᐅᐣᒋ ᐳᓂᒋᑫᐨ.”

ᒐᐧᕑᑎᐣ ᐊᐧᐸᐢ ᐊᒥᐦᐊᐁᐧ ᐊᔕ ᓂᓴᐧᓱ ᐊᓂᔑᓇᐯ ᐊᐢᑭ ᐅᐡᑲᑎᐢ ᐁᐅᒋ ᐃᐡᑲᐧᐱᒪᑎᓯᐨ ᑫᑲᐟ ᐃᑯ ᐯᔑᑲᐧᐣ ᐁᐅᐣᑕᐱᓀᐊᐧᐨ ᐊᑯᓇᐠ 2000 ᑲᐅᐣᒋᐊᐦᑭᐊᐧᐠ ᐊᐸᐣ ᐊᑯ ᐦᐊᐡ ᐢᑯᓫ ᑲᐱᐃᐡᑯᓂᐃᐧᐊᐧᐨ ᑕᐣᑐᕑ ᐯ ᐅᑌᓇᐠ.

“ᑲᐃᐧᐣ ᒪᔑ ᒥᑐᓂ ᒋᑭᑫᐣᑕᒪᐠ ᑫᑯᓀᐣ ᑲᑭᐅᒋ ᐊᐧᓂᐦᐊᑲᓂᐃᐧᑫᐧᐣ ᒐᐧᕑᑎᐣ, ᐣᑭᑫᑕᒥᐣ ᐃᐧᓂᑯ ᐅᐡᑲᑎᓴᐠ ᐊᓂᔑᓇᐯ ᐊᐢᑭ ᑲᐅᐣᒋᐊᐧᐨ ᐁᑲ ᐁᐊᔭᐊᐧᐊᐧᐨ ᑫᑭᐅᐣᒋ ᐱᒥᐊᔭᓴᐧᐸᒥᑯᐊᐧᐸᐣ ᐊᓂᐡ ᐁᑲ ᐁᑭᑫᐣᑕᒧᐊᐧᐨ ᐅᑌᓇᐊᐧᑎᓯᐃᐧᓂ ᐊᐧᓴ ᑲᔦ ᐁᐅᐣᑐᓭᐊᐧᐨ ᑲᓇᑲᑕᒧᐊᐧᐨ ᐅᑕᔑᑫᐃᐧᓂᐊᐧ,” ᐃᑭᑐ ᐊᐧᐳᐢ. “ᑲᑭᓇ ᐅᑯᐁᐧᓂᐊᐧᐠ ᐊᔕ ᑲᑭᐱᐊᐧᓂᐦᐃᑕᐧ ᒥᑐᓂ ᑭᑕᓂᒥᐦᐃᑯᒥᐣ ᐁᑲᐧ ᑕᐡ ᒋᑭᑲᑫᐧ ᐳᓂᓭᑭᐸᐣ. ᓂᑲᓄᑕᒥᐣ ᑕᐡ ᐅᑯᐁᐧᓂᐊᐧᐠ ᐅᐣᑌᕑᐃᔪ ᑭᒋᐅᑭᒪᐠ ᒥᓇ ᑲᓇᑕ ᑭᒋᐅᑭᒪ ᒋᑭᐃᐧᑕᓄᑭᒪᐊᐧᐸᐣ ᑲᐅᐣᒋ ᐊᓂᔑᓂᓂᐃᐧ ᓂᑲᓂᑕᒪᑫᐊᐧᐨ ᒥᓇ ᐱᑯ ᑭᑭᓄᐦᐊᒪᑫᐃᐧᐣ ᑲᐊᓄᑲᑕᒧᐊᐧᐨ ᒋᑭᐅᓇᑕᒪᐃᐧᑕᐧᐸᐣ ᑲᐧᔭᐠ ᒋᐃᔑᓇᑲᐧᓂᐠ ᐅᐱᒥᐃᐧᒋᐦᐃᑯᐃᐧᓂᐊᐧ ᑭᑭᓄᐦᐊᒪᐊᐧᑲᓇᐠ ᑲᓇᑲᑕᒧᐊᐧᐨ ᐅᑕᔑᑫᐃᐧᓂᐊᐧ ᐦᐊᐡ ᐢᑯᓫ ᑲᐊᐣᑕᐃᐧ ᑭᑭᓄᐦᐊᒪᐃᐧᑕᐧ ᐅᑌᓇᐠ ᐁᑲᐧ ᒥᓇ ᒋᑭᐅᒋ ᐃᐧᑕᓄᑭᒥᑯᔭᑭᐸᐣ ᓂᓇᐃᐧᐟ ᒋᐅᓇᑐᔭᐠ ᑭᑭᓄᐦᐊᒪᑫᐃᐧ ᐊᓄᑭᑕᒪᑫᐃᐧ ᐃᐧᒋᐦᐃᐁᐧᐃᐧᓇᐣ ᑫᐃᐧᒋᐦᐃᑯᐊᐧᐨ ᐊᓂᔑᓂᓂᐊᐧᐠ ᑲᐃᓯᓭᐠ ᒥᓯᐁᐧ ᑲᓇᑕ ᐊᐦᑭᐠ ᒋᐃᓇᑌᐠ.”

ᑕᐣᑐᕑ ᐯ ᒥᓇ ᓴᐱᕑᐃᔭᕑ ᑭᐁᐧᑎᓄᐠ ᐅᑭᒪᐅᓂ ᐅᑭᒪ ᑊᕑᐅᐢ ᐦᐊᔭᕑ ᑫᐃᐧᐣ ᑭᐃᔕ ᑲᑭᑕᔑ ᐅᑯᐡᑲᐊᐧᐸᐣ ᐁᑭᐊᐣᑕᐃᐧ ᐊᐧᐸᒪᐨ ᒐᐧᐣᑎᐣ ᐅᓂᑭᐦᐃᑯᐣ.

“ᐣᑫᓂᐣ ᓂᑕᔭᐊᐧ ᓂᔭᓄᔕᑊ ᐁᑕᓱᔭᑭᐃᐧᓀᐨ ᓂᑯᓯᐢ ᐁᑲᐧ ᑕᐡ ᑲᐃᐧᐣ ᓂᑭᑫᐣᑕᓯᐣ ᐊᓂᐣ ᐁᓀᐣᑕᑲᐧᓄᑫᐧᐣ ᐊᐱᐣ ᑲᒪᒋᓂᔕᐊᐧᑲᓄᐨ ᐊᐧᓴ ᒋᐊᐣᑕᐃᐧ ᑭᑭᓄᐦᐊᒪᑯᓯᐨ, ᑲᐃᐧᐣ ᓂᑕᑲᐡᑭᑐᓯᐣ ᒋᐸᑭᑎᓇᑭᐸᐣ,” ᑲᐦᐊᔭᕑ ᑭᐃᑭᑐ. “ᓂᒥᓀᐧᐣᑕᐣ ᐯᔓᐨ ᑲᐊᐧᐸᒪᐠ ᒥᓇ ᐁᑭᒋᓀᓂᒪᐨ ᐅᐊᐧᑯᒪᑲᓇᐣ. ᒥᑕᐡ ᑫᑭᑐᒋᑲᑌᑭᐸᐣ ᒋᐊᐣᒋᓭᒋᑲᑌᐠ ᐁᑲ ᐊᐧᓴ ᒋᑭᐃᔑᓂᔕᐦᐅᐣᑕᐧᐸᐣ ᐊᐊᐧᔑᔕᐠ ᒋᐊᐣᑕᐃᐧ ᑭᑭᓄᐦᐊᒪᑯᓯᐊᐧᐨ.”

ᐁᐧᐱᑫᐧ ᐅᑭᒪᑲᐣ ᑲᐃᐧᐣ ᐅᓂᓯᑕᐁᐣᑕᓯᐣ ᑫᑯᓀᐣ ᐅᐁᐧᓂ ᑲᑭᐅᐣᒋ ᐃᓯᓭᓂᐨ ᐅᐡᑲᑎᓴᐣ ᒣᑲᐧᐨ ᐁᐱᒥ ᑭᑭᓄᐦᐊᒪᑯᓯᓂᐨ ᐃᒪ ᑕᐣᑐᕑ ᐯ ᐅᑌᓇᐠ.

“ᑕᑲᐧᓄᐣ ᑲᑫᐧᑌᐧᐃᐧᓇᐣ ᐊᓂᐣ ᑫᑭᐃᔑ ᐃᐧᒋᐦᐃᑕᐧᐸᐣ ᑭᑐᐡᑲᑎᓯᒥᓇᓂᐠ ᑲᑭ ᑭᑭᓄᐦᐊᑯᓯᐊᐧᐨ ᐅᑌᓇᐠ,” ᑭᐃᑭᑐ ᐅᑭᒪᑲᐣ.

ᑭᐁᐧᑎᓄᐠ ᐊᓂᔑᓇᐯ ᑭᑭᓄᐦᐊᒪᑫᐃᐧᐣ ᑲᐱᒥᐃᐧᑐᐊᐧᐨ ᑲᓂᑲᓂᐡᑲᐠ ᒉᓂᐱᕑ ᒪᓂᑐᐊᐧᐱ ᐅᑭᐸᑭᑎᓇᐣ ᐅᑎᑭᑐᐃᐧᐣ ᒋᑭᐅᓇᒋᑲᑌᐠ ᑫᒋᓇᐨ ᑫᐃᔑ ᐊᔭᐣᑲᐧᒥ ᑲᓇᐁᐧᐣᑕᑯᓯᐊᐧᐨ ᐁᐣᐁᐣᐃᓯ ᑭᑭᓄᐦᐊᒪᐊᐧᑲᓇᐠ ᐊᐱ ᒪᑯᐱᓯᑦ 11 ᑌᓇᐢ ᑲᕑᒧᕑᑎ ᐦᐊᔾ ᐢᑯᓫ ᑲᑭᔑᑐᐊᐧᐨ ᐅᑭᑭᓄᐦᐊᒪᑯᐃᐧᓂᐊᐧ ᑲᐸᑭᑎᓂᑲᑌᐠ ᐅᒪᑯᔐᐦᐃᑯᐃᐧᓂᐊᐧ.

“ᐊᔭᐊᐧᐣ ᐅᓇᒋᑫᐃᐧᓇᐣ ᑫᑭᐊᐸᒋᒋᑲᑌᑲᐧᐸᐣ ᐁᑲᐧ ᒥᓇ ᑫᔭᓂ ᐃᐧᐣᒋᑲᑌᑭᐣ ᐱᐊᐧᐱᑯᐠ ᑲᐃᔑᐊᑐᔭᐠ,” ᑭᐃᑭᑐ ᒪᓂᑐᐊᐧᐱ. “ᑭᔭᑦ ᐃᑯ ᑫᑯᓇᐣ ᐃᐧᐱᐃᐧᐣᑕᒣᐠ ᐣᑲᐅᑕᐱᓇᒥᐣ. ᓂᓇᑕᐁᐧᐣᑕᒥᐣ ᐅᐡᑭ ᐃᓀᐣᑕᒧᐃᐧᓇᐣ ᒥᓇ ᓇᓇᑲᑕᐁᐧᐣᑕᒧᐃᐧᓇᐣ.”


Email to a Friend
qr code
add to del.icio.us

Stumble It!

Post new comment

Comment policy

All comments submitted to Wawatay News Online must have a correct name, location and email address of the user. Wawatay will not approve comments without the required information.

The approval of comments will also be subjected to relevancy, laws of defamation and good taste.

Once posted, comments become the property of Wawatay News. Wawatay News reserves the right to publish or use this comment in any way in the future for online use, in print, and by any other media at the discretion of Wawatay News.

The content of this field is kept private and will not be shown publicly.