Nishwachinoon kepiminisha-i-katekin chiwichichikateg dashikewin Eabametoong

Thursday November 25, 2010

Anooki-inchi chinanakachitooch mikooshkachisewin okawichitoon chiniminooseki nidashikewininan, ikito eabametoong okimaakan Lewis Nate.

“Taminoose nidashikewininan anooki-inchi a-awe otanooki,” Nate ikito. “ pepakaan anookiwinan tapintikeshikamakanoon chipiwichi-i-koyaank kaki-o-shisitoyaank anookiwin.”

Wipa ta-ontina ke-anookitank, Nate ikito.

Mekwa wiin nookom, nishwachinoon anookiwinan nipiminisha-a-min o-oma nidashigewininaning. Kikinawachipi-i-katewan chipiminisha-i-kategin onikanishkamoog oki-apachitonawaan api kamikoshkachisek Oct.22. Nate ikito api katipatotek nimikoshkachisewininan mi-ima niki-apenimoomin chitepinichi shoonia chiwichichikatek nidashikewininan chitipatotek enishiwachichikemakakin mashkikinsaan shikwa mikasowin kaye saka-awewin shikwa nitakewin.

“Nookoom, kakina o-oma nidashikewininan niwitanookimananik aniin wa-ishiwichitooyaank o-owe indashikewininan weti nikanaya-ink,”Nate ikito, miwa-a kawi-anookichi okananatone-owan chiwitanookimikoochi chiniminwa-ayawachi nitanishinaabeminaak.

Nate owintanan nishwaaso anookiwinan kepiminisha-ikatenikin.

Nitam nikitipatotamin emikoshkachiseyaank pinishi March 31, ta-awashimese weti nikanaya-i.

“Ninkitakopi-owanan kiisis anshina peshiko aki pakitina shoonia,” Nate wintamake.

“Kishipin ishisek, tanitepise anisikwak kema kotak akiwaank.”

Nishwa ki-oshisichikate mikoshkachisewi-anookiwin. Asha kimachisemakan, ki-ikito.

“Ninatawentamin kwayaak chi-ishisek o-oma nidashikewininan,” Nate ikito.

“Nikitepinamin chinakisek wachi kananakachichikewachi. Nishtanashiniiwin dipa-ikan anookiwak takoniwewininiwak. Kaawin ki-ishisesinoon otanaank. Nisitawiinakwaan ewichi-iwemakaak.” Apane ka-anookiwachi takoniwewininiwak pakan mina ishise.

“Sekisiwak anishinaabek an-shina kipitinikatewan mashkikin o-oma nidashikewininan,” Nate ikito.

“Akosiwag anishinaabek e-apachitosikwa mashkikin. Ishpakinte wan mashkikin apane kakipitinikatekin.”

Takakanonawaak kaye tawichi-awak mi-owe anookiwin.

Niswa, asha kinakishikikate. Okimaawiwin kimaakoshkawa chiwichitoch okimaakanak, anookiwinan shikwa pepakaan onikanishkamook kiwichitowaak.

Niiwa anookiwin chi-oshisichikateg aniin ke-ishiminosek nidashikewininan pinish nikanaya-ink. Weweni ta-anookichikate chi-oshkimachitayaank shikwa chimino-ayamakaak indashikewininan, ke-ishinakachichikatekin mashkikin chikipitinikatek machitotamowin shikwa chikishichikatek wichi-itiwikamik.

Nanoo anookiwin miwiin o-owe chiminosek wiitanookitatiwin anishinaabek shikwa onikanishkamook.

“Kiwanisemakan aniin ke-ishiwichi-itiwach kichi-aya-ak shikwa oshkaya-ak,” Nate ikito. “Chimaachisek aniin ke-ishiwichi-anookitatiyaank chikikentakwaak aniin e-ishi-anookiyaank. Kaawin kiwichitosiwaak anishinaabek api kekoon ka-onechikatek mi-oma nidashikewinan.”

Niinkotwaso anookiwin, chininanakachichikatek shikwa chikikentakwaak taka chi-anookimaakak.

“Anishinaabek kaawin otepakenimaasiwawa-i onikanishkamoo-i,” Nate ikito.

“Ishinakwaan chiwichi-anookimaamkwa chitepakeniminkwa.”

Ishkwach anookiwin, chi-oshikapawichikatek o-owe dashikewin chiminosek pinish weti nikanaya-ink. Nipiwa-i kikakwe minochikate o-owe dashikewin weti otanaank.

“Ishinakwaan chi-apachitoyaank aniin ka-ishi-oshisichikatek mi-owe dashikewin,” ikito. Piminisha-amaank nishwaaso anookiwinan taniminose kidashikewinian, Nate ikito, minawaa miweti chi-inapiyaank nikanaya-i.

“Pepanki ki-ishikenaniwan chi-ontami-itwa o-oma dashikewink,” Nate ikito.

“chikiwe-otapinamaak aniin ke-ishiminosek kipimaatisiwininan kaawin takashkichikatesinoon chi-onetakwaak dashikewin kishipin ochanimisek dashikewin. Ishinakwaan chi-anookitamaak kakinekonan o-oma nidashikewinan.”

Mi-owe peshik kaki-ishiwichitoyaank o-oma nidashikewininan chi-ochiminwayaamaakak nikamoowin Oct. 22 -24, Elaine Boyce shikwa kakiwitanookimikooch chimaawachi-itiwach.

“Kichi-inentakwan kamawachi-itink dashikewink,” Boyce, anishinaabe ishikishwewin kikinwa-amake, ikito.

Kapekishik ki-anookinaniwan shikwa kikinwa-amakewinan pinish etipikaank kinikamonaniwan.

“Weweni ki-oshisichikatewan kakina kekoon ki-onchi makaan ninte-inaank,” Boyce ikito.

“Wiinke nikimoshitomin. Mishi-i kaki-onchi machitoyaank oonchi nitanishinaabeminanik.”

Awashime ninkotwaak kiwichitowaak mi-ima nikamowinik.

Keyapi tapiwichitowaak minawa kawimawachi-itiyaank mi-oma John C. Yesno School Dec. 10 -12.

“Niminwetamin minawa ewi-antokeyaank,” Boyce ikito.